អាមេរិក-កូរ៉េខាងត្បូង នឹងធ្វើសមយុទ្ធយោធានៅចុងអាទិត្យនេះ

ពុធ, 21 កក្កដា 2010 15:24

ប្រទេសអាមេរិក និងកូរ៉េខាងត្បូង នឹងបើកការធ្វើសមយុទ្ធយោធារួមគ្នានៅចុងអាទិត្យនេះ ដើម្បីរៀបចំខ្លួនរបស់ពួកគេឲ្យកាន់តែខ្លាំងឡើង ប្រឆាំងនឹងការឈ្លានពានរបស់កូរ៉េខាងជើងទោះបី ជាមានការព្រមានពីក្រុងព្យុងយ៉ាងថា ការធ្វើសមយុទ្ធយោធានេះ នឹងធ្វើឲ្យភាពតានតឹងកាន់តែខ្លាំង ឡើងនៅឧបទ្វីបកូរ៉េនេះក៏ដោយចុះ។

រដ្ឋមន្រ្តីក្រសួងការពារប្រទេសអាមេរិក លោករ៉ូបឺត ហ្គេត បាននិយាយថា ក្រុងវ៉ាស៊ីនតោន និងក្រុងសេអ៊ូល ចង់បញ្ជូននូវ«សារដ៏ច្បាស់លាស់»មួយ ទៅឲ្យកូរ៉េខាងជើងបន្ទាប់ពីការលិចនាវា ចម្បាំងមួយគ្រឿងរបស់កូរ៉េខាងត្បូង នៅក្នុងខែមិនានេះមក។

លោកហ្គេត និងលោកគីម តេយុង នៃកូរ៉េខាងត្បូង បាននិយាយនៅក្នុងសេចក្ដីថ្លែងការណ៍ រួមមួយដែលចេញផ្សាយកាលពីថ្ងៃអង្គារ បន្ទាប់ពីការចរចារបស់ពួកគេមកនោះថា«ការការពារទាំង នេះ ដែលមានការបញ្ចូលគ្នានូវការធ្វើសមយុទ្ធយោធានោះ គឺសំដៅបញ្ជូនសារដ៏ច្បាស់មួយទៅឲ្យ កូរ៉េខាងជើង ដែលត្រូវបញ្ឈប់នូវអាកប្បកិរិយាឈ្លានពាននេះទៅ និងថាយើងបានសន្យាជាមួយគ្នា ដើម្បីធ្វើឲ្យបានល្អប្រសើរនូវសមត្ថភាពការពារដែលបញ្ចូលគ្នារបស់យើង»។

អាមេរិកនិងកូរ៉េខាងត្បូងបាននិយាយថា កូរ៉េខាងជើងត្រូវចេញសងចំពោះការលិចនាវា Cheonan នៅក្នុងការវាយប្រហារខាងយោធាដ៏អាក្រក់បំផុត ទៅលើប្រទេសកូរ៉េខាងត្បូង ចាប់តាំងពី សង្រ្គាមកូរ៉េឆ្នាំ១៩៥០-១៩៥៣នោះមក។ប្រទេសកូរ៉េទាំងពីរ នៅតែស្ថិតនៅក្នុងស្ថានភាពនៃសង្រ្គាម ដោយសារតែសង្រ្គាមបានបញ្ចប់ដោយយុទ្ធសន្តិភាព មិនមែនជាសន្ធិសញ្ញាសន្តិភាពនោះទេ។

រដ្ឋមន្រ្តីក្រសួងការបរទេសកូរ៉េខាងត្បូង លោកយូ មីយុងវ៉ាន បាននិយាយប្រាប់បណ្ដាញ ទូរទស្សន៍YNT នៅក្នុងបទសម្ភាសន៍មួយ កាលពីថ្ងៃអង្គារថា ក្រុងវ៉ាស៊ីនតោនកំពុងតែពិចារណា ដាក់ទណ្ឌកម្មបន្ថែម ប្រឆាំងនឹងប្រទេសកូរ៉េខាងជើង។ លោកបាននិយាយថា លោករំពឹងថាអាមេរិក នឹងប្រកាសអំពីបញ្ហានេះនៅក្នុងថ្ងៃពុធ។

កូរ៉េខាងត្បូង និងអាមេរិក មានផែនការធ្វើសមយុទ្ធយោធារួមគ្នាខាងជើងទឹកនិងជើងអាកាស រយៈពេល៤ថ្ងៃ ដែលបានដាក់ឈ្មោះថា«ស្មារតី មិនចេះចាញ់» នៅឆ្នេរខាងកើតឧបទ្វីបកូរ៉េ ចាប់ពីថ្ងៃ២៥ ដល់ថ្ងៃទី២៨ កក្កដា។

ទាហានអាមេរិក និងកូរ៉េខាងត្បូង ប្រហែល៨០០០នាក់ នាវាចម្បាំងនិងនាវាមុជទឹកជាង២០ គ្រឿងរួមទាំងនាវាផ្ទុកយន្តហោះ USS George Washington និងយន្តហោះ២០០គ្រឿង នឹងត្រូវចូលរួម នៅក្នុងការធ្វើសមយុទ្ធយោធានេះ។ យន្តហោះវាយប្រហារ ប្រភេទF-22 Raptor ជាយន្តហោះវាយ ប្រហារជឿនលឿនបំផុត នៅលើពិភពលោក នឹងចូលរួមជាលើកដំបូងនៅក្នុងលំហាត់យោធានេះ៕

ព័ត៌មានថ្មីបំផុត

សំរាប់បុគ្គលិក

ព័ត៌មានស្ដីពីគ្រោះថ្នាក់ចរាចរនៅទូទាំងប្រទេសសម្រាប់ថ្ងៃទី០៧ ខែកញ្ញា ឆ្នាំ២០១០ មានចំនួន៩លើក ស្លាប់២នាក់

ភ្នំពេញ ៖ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បានឲ្យដឹងថាគ្រោះថ្នាក់ចរាចរសម្រាប់ថ្ងៃទី៧ ខែកញ្ញា កើតឡើងចំនួន៩លើក បណ្ដាលឲ្យមនុស្សស្លាប់ ២នាក់(ប្រុស) រងរបួសធ្ងន់១០នាក់(ប្រុស៩) របួសស្រាល៤នាក់(ប្រុស)។ គ្រោះថ្នាក់ចរាចរសម្រាប់ថ្ងៃទី៧ ខែកញ្ញានេះ បើប្រៀបធៀបថ្ងៃទី៦ ខែកញ្ញាកន្លងទៅឃើញថា មានសភាពថយចុះ៣លើកនិងអ្នកស្លាប់មានការថយចុះ៤នាក់៕