បាសៀរ ប្រហែលជាប្រឈមមុខនឹងការចោទប្រកាន់ពីបទប្រល័យពូជសាសន៍

ព្រហស្បតិ, 04 កុម្ភៈ 2010 15:35

តុលាការឧក្រិដ្ឋកម្មអន្តរជាតិ នឹងពិចារណាឡើងវិញ ក្នុងការនាំយកការចោទប្រកាន់ ពីបទប្រ ល័យពូជសាសន៍ប្រឆាំងនឹងលោកប្រធានាធិបតីស៊ូដង់ អូម៉ា អាល់បាសៀរ បន្ទាប់ពីចៅក្រមបានធ្វើ តាមការអំពាវនាវមួយរបស់ពួករដ្ឋអាជ្ញានោះ។

កាលពីឆ្នាំទៅ តុលាការឧក្រិដ្ឋកម្មអន្តរជាតិ (ICC) បានចេញដីកាតាមចាប់ខ្លួនមួយចំពោះលោក បាសៀរ ពីបទចោទប្រកាន់ថាបានប្រព្រឹត្តអំពើឧក្រិដ្ឋកម្មនៅដាហ្វួរ។ សាលាបុរេជំនុំជំរះរបស់តុលាការនៅទីក្រុងឡាអេ ឥឡូវនេះនឹងធ្វើការសម្រេចអំពីថាតើនឹងបន្ថែម៣ករណីទៀត ពីបទប្រល័យពូជសាសន៍ ឬក៏យ៉ាងណានោះ។

មន្ត្រីជាន់ខ្ពស់របស់ប្រទេសស៊ូដង់ បាននិយាយថា ការសម្រេចនេះគឺមានការជាប់ទាក់ទង ទៅនឹងបញ្ហានយោបាយ នៅពេលដែលពួកឧទ្ទាមនៅដាហ្វួរ បានស្វាគមន៍ការចោទប្រកាន់នោះ។ ពួករដ្ឋអាជ្ញាបាននិយាយថា រដ្ឋាភិបាលរបស់លោកបាសៀរ បានស្វែងរកដើម្បីលុបបំបាត់ក្រុមជន ជាតិភាគតិច ចំនួន៣។ ពួកគេបានលើកហេតុផល កាលពីឆ្នាំកន្លងមកថា រដ្ឋាភិបាលនេះមានបំណង ដើម្បីបំផ្លាញជនជាតិភាគតិច Fur, MasalitនិងZaghawa។

ប្រសិនបើឥឡូវនេះ ការចោទប្រកាន់ពីបទប្រល័យពូជសាសន៍ត្រូវបានប្រព្រឹត្ត ទៅនោះ គឺជា លើកដំបូងហើយដែលការចោទប្រកាន់ របស់ICC ប្រឆាំងនឹងប្រមុខរដ្ឋដែលកំពុងកាន់មុខដំណែង នោះ។ ពួកមេដឹកនាំអាហ្រ្វិក និងអារ៉ាប់ បានប្រមូលផ្ដុំគ្នា នៅជុំវិញលោកបាសៀរ និងបណ្ដាប្រទេស ជាច្រើនទៀត បានបដិសេធន៍ការផ្ដល់កិត្តិយសដល់ដីកាតាមចាប់ខ្លួន ដែលមានស្រាប់នេះ។

ចៅក្រមអធិបតីលោក អ៊ែរគី កូរូឡា បាននិយាយថា សាលាបុរេជំនុំជំរះ នឹងធ្វើការសារជាថ្មី ដោយធ្វើតាមការប្ដឹងឧទ្ធរណ៍របស់រដ្ឋអាជ្ញា លោកល្វីស ម៉ូរ៉េណូ អូកាំប៉ូ។ ចៅក្រមរូបនេះបានបន្តថា ស្ដង់ដារភស្តុតាង ដែលបានកំណត់នៅក្នុងការសម្រេចពីលើកមុនមានកំរិតខ្ពស់ និងមានការទាមទារ ច្រើនជាងអ្វីដែលគេបានតម្រូវនោះ។

បញ្ចេញប្រតិកម្ម ទៅនឹងការសម្រេចនៅក្នុងទីក្រុងខារុម ណាតរ៉ាប៊ី អាបដេឡាវី ជាមន្ត្រីជាន់ ខ្ពស់របស់ក្រសួងព័ត៌មាន បានចោទប្រកាន់តុលាការនេះថា កំពុងតែស្វែងរកដើម្បីរារាំងការបោះ ឆ្នោតតាមលក្ខណៈប្រជាធិបតេយ្យ ដែលនឹងប្រព្រឹត្តទៅនៅក្នុងខែមេសានោះ។ មន្រ្តីរូបនេះបានបន្ត ថា «ដំណើរការរបស់ ICC គឺដើម្បីបញ្ចប់ការខិតខំប្រឹងប្រែងរបស់រដ្ឋាភិបាល ស៊ូដង់ ឆ្ពោះទៅរកការ បោះឆ្នោត និងការផ្លាស់ប្ដូរអំណាចដោយសន្តិភាពតែប៉ុណ្ណោះ៕