រថយន្តដឹកសិស្ស បុកគូទគោយន្តខ្ទាតធ្លាក់ផ្លូវរបួស៧នាក់

អង្គារ, 27 កក្កដា 2010 18:21

កំពង់ចាម ៖ រថយន្តមួយគ្រឿង របស់សាលាឯកជនឈ្មោះសាលាចំណេះទូទៅអន្តរជាតិសេតថិ៍ ដែលមានទីតាំងស្ថិតនៅក្នុងភូមិទី១០ សង្កាត់កំពង់ចាម ក្រុងកំពង់ចាម ខណៈពេលដែលកំពុងបើកដឹក សិស្សមកកាន់សាលារៀន បានបុកគូទគោយន្តពីក្រោយពេញមួយទំហឹង បណ្ដាលឲ្យគោយន្តខ្ទាត បត់ក្បាលមកក្រោយ ធ្លាក់ចូលទៅក្នុងរណ្ដៅមួយ នៅជាប់ចិញ្ចើមផ្លូវ។ ឯរថយន្តក៏ហោះចេញពីផ្លូវដែរ ក្នុងនោះមនុស្សជិះទាំងសងខាងរបួសធ្ងន់ស្រាលចំនួន៧នាក់។

ហេតុការណ៍នេះបានកើតឡើង កាលពីវេលាម៉ោង១៣ និង៤០នាទី ថ្ងៃទី២៦ ខែកក្កដា ឆ្នាំ ២០១០ នៅលើដងផ្លូវជាតិលេខ៧ ខាងត្បូងគល់ស្ពានគីហ្សូណា ប្រហែល១គីឡូម៉ែត្រ ស្ថិតក្នុងភូមិ ទន្លេបិតលើ ឃុំទន្លេបិត ស្រុកត្បូងឃ្មុំ ខេត្តកំពង់ចាម។

លោកអនុសេនីយត្រី ឆាយ វុទ្ធី នាយផ្នែកនគរបាលសណ្ដាប់ធ្នាប់សាធារណៈ ស្រុកត្បូងឃ្មុំ បានប្រាប់កម្ពុជាថ្មីថា រថយន្តរបស់សាលាឯកជនដែលបានបុកគូទគោយន្តខាងលើនេះម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2H3171 បើកបរដោយឈ្មោះបឿ អៀ ភេទប្រុស អាយុ២០ឆ្នាំ មាន ទីលំនៅភូមិបារាយ ឃុំខ្វិតធំ ស្រុកព្រៃឈរ ខេត្តកំពង់ចាម។ លោកបានបន្តថា កូនសិស្សជិះមាន ប្រមាណ១០នាក់ មាន៤នាក់រងរបួសស្រាលៗ។ចំណែកអ្នកជិះគោយន្តមានគ្នា៣នាក់របួសទាំង៣។

លោកនាយផ្នែកបានបន្តថា រថយន្តនិងគោយន្តបើកស្របទិសគ្នា ពេលមកដល់កន្លែងកើត ហេតុ រថយន្តសាំយ៉ុងរបស់សាលាឯកជនខាងលើ បានបើកវ៉ាគោយន្ត ប៉ុន្តែយកចង្កូតមិនផុត ក៏បាន បុកគោយន្តបណ្ដាលឲ្យគោយន្តត្រឡប់គូទទៅមុខបត់ក្បាលមកក្រោយ ហើយខ្ទាតធ្លាក់ចូលរណ្ដៅ ជ្រៅដែលនៅជាប់និងចិញ្ចើមផ្លូវខាងស្ដាំដៃ។

ក្រោយពេលកើតហេតុសមត្ថកិច្ចបានទូរស័ព្ទហៅឡានសាមុយ មកដឹកអ្នករបួសទៅមន្ទីរពេទ្យក្រុងកំពង់ចាម។ ចំណែករថយន្តនិងគោយន្តសមត្ថកិច្ចបានអូសយកទៅរក្សាទុកនៅអធិការដ្ឋាននគរបាលស្រុកត្បូងឃ្មុំ ដើម្បីធ្វើការដោះស្រាយ៕

ព័ត៌មានថ្មីបំផុត

សំរាប់បុគ្គលិក

ព័ត៌មានស្ដីពីគ្រោះថ្នាក់ចរាចរនៅទូទាំងប្រទេសសម្រាប់ថ្ងៃទី០៧ ខែកញ្ញា ឆ្នាំ២០១០ មានចំនួន៩លើក ស្លាប់២នាក់

ភ្នំពេញ ៖ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បានឲ្យដឹងថាគ្រោះថ្នាក់ចរាចរសម្រាប់ថ្ងៃទី៧ ខែកញ្ញា កើតឡើងចំនួន៩លើក បណ្ដាលឲ្យមនុស្សស្លាប់ ២នាក់(ប្រុស) រងរបួសធ្ងន់១០នាក់(ប្រុស៩) របួសស្រាល៤នាក់(ប្រុស)។ គ្រោះថ្នាក់ចរាចរសម្រាប់ថ្ងៃទី៧ ខែកញ្ញានេះ បើប្រៀបធៀបថ្ងៃទី៦ ខែកញ្ញាកន្លងទៅឃើញថា មានសភាពថយចុះ៣លើកនិងអ្នកស្លាប់មានការថយចុះ៤នាក់៕