ឃើញបងធំប្រុងប្រយុទ្ធគ្នារត់ទៅឃាត់ ត្រូវគេវាយ២ដំបងរយៈក្បាល

ពុធ, 03 កុម្ភៈ 2010 19:56

ខេត្តកំពង់ធំ ៖ យុវជនម្នាក់ ទប់ចិត្តមិនបានឃើញបងធំ២ក្រុម នៅភូមិជាប់គ្នាប្រុងប្រយុទ្ធគ្នា ក៏ស្ទុះទៅឃាត់ត្រូវបានក្រុមបងធំ ភាគីម្ខាងវាយត្រូវក្បាលពីក្រោយ ២ដំបង បណ្ដាលឲ្យរងរបួសធ្ងន់ និងប្រកាច់ដូចអន្ទង់ដួលដេកនៅលើដី ដោយសារតែការប៉ះពាល់សរសៃ ប្រាសាទជាខ្លាំង។

ហេតុការណ៍នោះ បានកើតឡើងកាលពីវេលាម៉ោង៩និង៣០នាទីយប់ថ្ងៃទី៣ ខែកុម្ភៈ ឆ្នាំ ២០១០ នៅភូមិថ្មគោល សង្កាត់ព្រែកតាហូ ក្រុងស្ទឹងសែន ខេត្តកំពង់ធំ។

យុវជនដែលរងរបួស ព្រោះតែទៅជួយឃាត់គេនោះ ឈ្មោះវ៉ាធី ណែត អាយុ២៥ឆ្នាំ នៅភូមិ ស្លាកែត ក្នុងសង្កាត់កើតហេតុខាងលើ។

យោងតាមប្រភពព័ត៌មានពីសាក្សី នៅកន្លែងកើតហេតុបាននិយាយឲ្យដឹងថា នៅមុនពេល កើតហេតុគេឃើញ ក្រុមយុវជនទំនើងទាំង២ក្រុមនោះ ផឹកស៊ីនៅផ្ទះអ្នកលក់ដូរគ្រឿងស្រវឹងមួយ កន្លែង នៅចុងភូមិស្លាកែត ជាប់និងភូមិថ្មគោល ហើយក្រុមយុវជនទំនើងទាំង០២ក្រុមនោះ មួយក្រុម នៅភូមិថ្មគោល និងមួយក្រុមទៀតនៅភូមិស្លាកែតនោះឯង។

ប្រភពព័ត៌មានដដែលនោះបានបន្តឲ្យដឹងថា នៅខណៈដែលបងធំទាំង២ក្រុម នោះផឹកស្រវឹង រៀងៗខ្លួនហើយនោះ ក៏ចាប់ផ្ដើមនិយាយទាស់សំដីគ្នា រហូតដល់បង្កើតជំលោះប្រុងប្រយុទ្ធគ្នាទៅ ហើយ។ ឃើញដូច្នេះ យុវជនរងគ្រោះក៏ស្ទុះទៅឃាត់ធ្វើឲ្យបងធំភាគីម្ខាង ដើរចេញទៅបាត់ទៅ នៅ តែភាគីម្ខាងទៀត ពេលនោះយុវជនឈ្មោះស៊ុំ នៅក្នុងក្រុមនោះក៏ស្ទុះទៅដកបង្គោលរបង មកវាយ ជនរងគ្រោះ២ដំបងចំក្បាលផ្នែកខាងក្រោយ បណ្ដាលឲ្យជនរងគ្រោះប្រកាច់រមួលដួលដេក ទៅលើ ដីមួយរំពេច ចំណែកជនដៃដល់ឈ្មោះស៊ុំ និងបក្ខពួកត្រូវបានរត់គេចខ្លួនអស់។

ជនរងគ្រោះកំពុងជួយសង្រ្គោះពីគ្រូពេទ្យខេត្តកំពង់ធំ ហើយអាការៈប្រកាច់ រមួល នៅលើគ្រែ ដែលធ្វើឲ្យក្រុមគ្រួសារស្រក់ទឹកភ្នែក ដោយក្ដីអាណិតអាសូរ៕