សមេ្ដចតេជោ ៖ គ្មានការចេះដឹងណាមួយដែលអាចទទួលបានពីការផ្ទេរដោយគ្មានការទទួលនោះទេ

សមេ្ដចតេជោ ៖ គ្មានការចេះដឹងណាមួយដែលអាចទទួលបានពីការផ្ទេរដោយគ្មានការទទួលនោះទេ

ពុធ, 03 កុម្ភៈ 2010 20:28

ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា បានមានប្រសាសន៍ក្នុងពិធីប្រគល់សញ្ញាបត្រ ដល់និស្សិត ចំនួន ១២៦៦នាក់ នៃវិទ្យាល័យវ៉ាន់ ដា នាព្រឹកថ្ងៃទី០៣ ខែកុម្ភៈ ឆ្នាំ២០១០ នៅវិទ្យាស្ថានជាតិអប់រំថា គ្មានការចេះដឹងណាមួយដែល អាចទទួលបានពីការផ្ទេរដោយគ្មានការទទួលនោះ ទេ នោះគឺជារឿងទ្វេទិសរវាងម្ខាងគ្រូ និងម្ខាងសិស្ស។

សម្ដេចថ្លែងថា ការសិក្សាមិនមែនជាការបញ្ចូលឈាមតាមរយៈមនុស្សម្នាក់ទៅ មនុស្សម្នាក់ បាននោះទេ ក៏ប៉ុន្តែវាជាការខិតខំដោយផ្ទាល់ ម្ខាងគឺសាស្រ្តាចារ្យដែលជាអ្នកណែនាំជាអ្នកចង្អុល បង្ហាញ និងផ្ទេរចំណេះដឹង ឯម្ខាងទៀតគឺស្ថិតនៅលើសមត្ថភាពស្រូបរបស់និស្សិតម្នាក់ៗផងដែរ។

សម្ដេចថ្លែងថា រាជរដ្ឋាភិបាលបានដាក់ចេញនូវយុទ្ធសាស្រ្តទូលំទូលាយសំរាប់ វិស័យអប់រំ ដែលមានលំអិតក្នុងយុទ្ធសាស្រ្ត«អប់រំសំរាប់ទាំងអស់គ្នា»។ ក្នុងការអនុវត្តន៍យុទ្ធសាស្រ្តនេះកន្លងមក តាមរយៈការធានាសមធម៌ ក្នុងការអប់រំមូលដ្ឋានរយៈពេល៩ឆ្នាំ សំរាប់កុមារគ្រប់រូប រាជរដ្ឋាភិបាល សំរេចបាននូវវឌ្ឍនភាពគួរជាទីមោទនៈ។ ជាក់ស្ដែង ការវិនិយោគលើការកសាងសាលារៀនគ្រប់កំរិត ត្រូវបានបង្កើតឡើងជាលំដាប់ពីមួយឆ្នាំទៅមួយឆ្នាំ។ រាជរដ្ឋាភិបាលបានអនុញ្ញាតឲ្យវិស័យ ឯកជនចូលរួមចំណែកផ្ដល់សេវាអប់រំនិងបណ្ដុះបណ្ដាលនៅគ្រប់កំរិតពីបឋមសិក្សារហូតដល់ ឧត្តម សិក្សា ដែលបច្ចុប្បន្ននៅទូទាំងប្រទេសយើងមានគ្រឹះស្ថានឧត្តមសិក្សាចំនួន៦៦ ដែលក្នុង នោះ២៤ គ្រឹះស្ថានជាកម្មសិទ្ធិរបស់រដ្ឋ និង៤២គ្រឹះស្ថានទៀតជារបស់ឯកជន។

សមេ្ដចតេជោ ក៏បានផ្ដាំផ្ញើដល់និស្សិត ជ័យលាភីទាំងអស់ត្រូវចេះប្រែក្លាយចំណេះដឹង ចំណេះធ្វើ និងទេពកោសល្យរបស់ខ្លួន ឲ្យទៅជាសកម្មភាពជាក់ស្ដែងព្រមទាំងប្រកាន់ខ្ជាប់ នូវក្រម សីលធម៌និងគុណធម៌ក្នុងការអភិវឌ្ឍន៍ជីវភាពរស់នៅរបស់ខ្លួន ក្រុមគ្រួសារខ្លួន និងសង្គមជាតិរបស់ ខ្លួន៕