មានសប្បុរសជនចេញលុយធ្វើផ្លូវតែអាជ្ញាធរគ្មានសមត្ថភាពសំរួលអ្នកសង់ផ្ទះរំលោភយកផ្លូវ

មានសប្បុរសជនចេញលុយធ្វើផ្លូវតែអាជ្ញាធរគ្មានសមត្ថភាពសំរួលអ្នកសង់ផ្ទះរំលោភយកផ្លូវ

ព្រហស្បតិ, 04 កុម្ភៈ 2010 14:40

ភ្នំពេញ ៖ ផ្លូវលំមួយខ្សែប្រវែងកន្ទុយអណ្ដើកតែវាមានសារៈសំខាន់សំរាប់ប្រជាពលរដ្ឋ ដែល រស់នៅចេញចូលតាមផ្លូវនេះ។ កន្លងមកផ្លូវនេះមានភក់ជ្រាំពិបាក ធ្វើដំណើរ ប៉ុន្តែដោយមានសប្បុរស ជនចេញលុយធ្វើជាបន្តបន្ទាប់បន្តិចម្ដងទើបអាចធ្វើដំណើរបានស្រួល។

អ្វីដែលប្រជាពលរដ្ឋហួសចិត្តនឹកស្មានមិនដល់នោះ ដោយសារអាជ្ញាធរសង្កាត់កាកាប ខណ្ឌ ដង្កោ មិនបានចុះទៅសំរួលដល់ប្រជាពលរដ្ឋប្រហែល២ទៅ៣គ្រួសាររស់នៅដើមផ្លូវនេះរុះរើសំណង់ រំលោភយកផ្លូវនេះចេញបន្តិចឡើយ។

ផ្លូវលំដែលប្រជាពលរដ្ឋលើកយកមកនិយាយនាពេលនេះ មានទទឹងប្រហែល ១០ម៉ែត្រ និង បណ្ដោយជិត១០០ម៉ែត្រប៉ុណ្ណោះ ដែលស្ថិតនៅក្នុងភូមិតាងួន សង្កាត់កាកាប ខណ្ឌដង្កោ ភ្ជាប់ពីផ្លូវ ២០០៤ ចូលទៅក្នុងព្រលានយន្តហោះអន្តរជាតិភ្នំពេញ ដែលអមសងខាងផ្លូវមានផ្ទះសំបែងរបស់ ប្រជាពលរដ្ឋរស់នៅស្អេកស្កះ ទើបជំរុញឲ្យមានការស្ថាបនាជួសជុលពីសប្បុរសជន។

តាមការអះអាងពីប្រជាពលរដ្ឋនិយាយថា ផ្ទះពីរអមសងខាងផ្លូវនេះសង់រំលោភយកដីផ្លូវម្ខាង ប្រហែលជាងមួយម៉ែត្រ។ នៅពេលមានបញ្ហាបែបនេះអាជ្ញាធរសង្កាត់ចុះមកមើលពីស្ថានភាពផ្លូវនេះដែរ តែបានត្រឹមតែមកមើលកំសាន្ត ប៉ុណ្ណោះ គ្មានសមត្ថភាពសំរួលដល់ម្ចាស់ផ្ទះ ដើម្បីឲ្យសប្បុរសជនមានទឹកចិត្តធ្វើនោះទេ ពោលគឺលោកចៅសង្កាត់កាកាប ឈ្មោះសុខ អ៊ែល បានត្រឹមតែ និយាយថា «ការប៉ះពាល់ផ្ទះគេវាលំបាកណាស់» ។ សំដីបែបនេះត្រូវបានប្រជាពលរដ្ឋរិះគន់ថា មិន សមធ្វើជាចៅសង្កាត់នោះទេ បើគ្រាន់តែមនុស្ស២គ្រួសារសង់ផ្ទះរំលោភយកដីផ្លូវម្ខាង១ម៉ែត្រមិន ហ៊ាននិយាយសំរួលគេផង បែបនេះតើឲ្យទៅដឹកនាំអភិវឌ្ឍន៍មនុស្សមួយសង្កាត់ម្ដេចនឹងកើតទៅ៕