ប្រើម្ស៉ៅ TNT បំផ្ទុះថ្មភ្នំ ធ្វើវារីអគ្គិសនីខុសបច្ចេកទេស ផ្ទុះរបួសកម្មករ៥នាក់

ប្រើម្ស៉ៅ TNT បំផ្ទុះថ្មភ្នំ ធ្វើវារីអគ្គិសនីខុសបច្ចេកទេស ផ្ទុះរបួសកម្មករ៥នាក់

ព្រហស្បតិ, 04 កុម្ភៈ 2010 16:50

ភ្នំពេញ ៖ យ៉ាងហោចណាស់មនុស្សចំនួន៥នាក់ បានទទួលរងរបួសធ្ងន់ និងស្រាល ហើយ ត្រូវបានគេបញ្ជូនមកកាន់មន្ទីរពេទ្យកាល់ម៉ែត ដើម្បីធ្វើការ សង្រ្គោះអាយុជីវិត ចំនួន៤នាក់ ក្នុងនោះ មានជនជាតិចិនម្នាក់ផង ដោយសារតែខុសបច្ចេកទេស ផ្ទុះម៉្សៅឆ្នៃ TNT ដែលពួកគាត់ស្វានខៃថ្មភ្នំ ដើម្បីបំផ្ទុះបំបែកថ្មដាក់ទុយោទឹកធ្វើវារីអគ្គិសនី នៅតំបន់គីរីរម្យ ដែលគ្រប់គ្រងដោយក្រុមហ៊ុនចិន។

ក្រុមជនរងគ្រោះត្រូវបានបញ្ជូនមកដល់មន្ទីរពេទ្យកាល់ម៉ែត កាលពីវេលាម៉ោង ១២ និង៥០ នាទីថ្ងៃត្រង់ បន្ទាប់ពីដូចហេតុការណ៍ផ្ទុះកាលពីវេលាម៉ោង ១០ព្រឹក ថ្ងៃទី០៣ ខែកុម្ភៈ ឆ្នាំ២០១០ នៅចំណុចការដ្ឋានធ្វើវារីអគ្គិសនី ក្នុងតំបន់គីរីរម្យ៣ ស្ថិតក្នុងសុ្រកភ្នំស្រួច ខេត្ដកំពង់ស្ពឺ។

ជនរងគ្រោះទាំង៥នាក់មានឈ្មោះ ទី១-ផាន់ ភា ភេទប្រុស អាយុ៣៧ឆ្នាំ មុខរបរ កម្មករ ទី២-អ៊ុំ សុវណ្ណា ភេទប្រុស អាយុ៣៦ឆ្នាំ មុខរបរកម្មករ ទី៣-កែវ សុផល ភេទប្រុសអាយុ៣១ឆ្នាំ មុខរបរ កម្មករដូចគ្នា ទី៤-វ៉ាង ជិនណេ ភេទប្រុស អាយុ៥៨ឆ្នាំ ជនជាតិចិន។ ចំណែកបុរសរងគ្រោះម្នាក់ ទៀតដែលរងរបួសស្រាលជាងគេ ពុំត្រូវបានបញ្ជូនមកសង្គ្រោះនៅពេទ្យកាល់ម៉ែតឡើយ ហើយអ្នក ទាំងអស់គ្នានោះបានរងរបួសស្ទើរតែសុះសាច់ ដោយអំបែងថ្ម។

តាមប្រភពព័ត៌មានពីមិត្តភក្ដិជនរងគ្រោះបានឲ្យដឹងថា ខណៈពេលពួកគេបាន ចោះរូងថ្មដាក់ រំសេវម៉្សៅ TNT ដើម្បីបំផ្ទុះបំបែកថ្មនោះ ទំនងជាខុសបច្ចេកទេស ស្រាប់តែផ្ទុះឡើងបណ្ដាលឲ្យ ក្រុមជនរងគ្រោះទាំង៥នាក់នោះ ដែលកំពុងតែបំពេញការងារនៅក្នុងរូងភ្នំនោះបណ្ដាលឲ្យរងរបួស រដូករណែល ស្រែកឲ្យគេជួយ បន្ទាប់មកមិត្តភក្ដិដែលមិនរងរបួសបានប្រញាប់ប្រញាល់ដឹក ជនរង គ្រោះទាំងនោះមកកាន់ពេទ្យកាល់ម៉ែត។

បច្ចុប្បន្ន អ្នករងរបួសធ្ងន់ទាំង៤នាក់ កំពុងសង្គ្រោះនៅមន្ទីរពេទ្យកាល់ម៉ែត ដើម្បីវះកាត់យកអំបែងថ្ម ដែលមុតស្ទើរសុះសាច់នោះ ហើយក៏មានអ្នកខ្លះទៀតអាចប៉ះពាល់គ្រាប់ភ្នែកផងដែរ៕