កុមារីកំព្រាម្ដាយស្លាប់ ដោយស្នាដៃឪពុក ត្រូវជីដូនយកមកចិញ្ចឹមក្នុងជីវភាពទាល់ក្រ

កុមារីកំព្រាម្ដាយស្លាប់ ដោយស្នាដៃឪពុក ត្រូវជីដូនយកមកចិញ្ចឹមក្នុងជីវភាពទាល់ក្រ

ព្រហស្បតិ, 04 កុម្ភៈ 2010 18:07

ខេត្តកំពង់ឆ្នាំង ៖ កុមារីកំព្រា២នាក់បងប្អូនដែលម្ដាយបានស្លាប់ដោយសារស្នាដៃឪពុកកំណាច វាយធ្វើបាប នោះ បច្ចុប្បន្នបានមករស់នៅក្នុងបន្ទុកជីដូន ដែលជាស្រ្តីមេម៉ាយគ្មានផ្ទះសំបែង គ្មានមុខរបរ និងទ្រព្យសម្បតិ្តអ្វីឡើយ ហើយបច្ចុប្បន្នរស់នៅដោយសារ ជំនួយឧបត្ថម្ភពីសប្បុរសជន តែប៉ុណ្ណោះ។

កុមារីតូចជាប្អូនអាយុបាន១ខែកន្លះ ហើយកាលពីម្ដាយគេស្លាប់គេអាយុទើបតែបាន១០ថ្ងៃ តែប៉ុណ្ណោះ ពីមុនរូបគេត្រូវបានឪពុកមារ និងម្ដាយមីងបង្កើតទទួលយកចិញ្ចឹម នៅក្នុងភូមិទ្រាជើង ឃុំ ស្រែថ្មី ស្រុករលាប្អៀរ ចំណែកកុមារីបងឈ្មោះគង់ គឹមឡាង អាយុ១០ឆ្នាំ ត្រូវជីដូនទទួលយកទៅ ចិញ្ចឹម។

ស្រ្តីមេម៉ាយជាជីដូនរបស់កុមារីកំព្រា បានរៀបរាប់ទាំងបង្ហូរទឹកភ្នែកថា សព្វថ្ងៃក្រៅពីចៅកំព្រាម្ដាយទាំង២នាក់ គាត់ក៏ត្រូវចិញ្ចឹមចៅស្រីតូចម្នាក់ទៀត ដែលឪពុកម្ដាយទីទាល់ក្រ ជាប់រវល់ធ្វើ ការងារយកកូនមកផ្ញើហ្នឹងគាត់។ អ្នកមីងបានបន្តថា គាត់មានការបារម្ភជាខ្លាំង ព្រោះគាត់ត្រូវចិញ្ចឹម ចៅៗដល់ទៅ៣នាក់ទៀត មិនអាចទៅធ្វើការជាកម្មករបានទៀតទេ តើអនាគតគាត់ត្រូវដោះស្រាយ ជីវភាពបែបណាទៅ ឬត្រូវរស់នៅរង់ចាំតែអំណោយពីសប្បុរសជនរហូតទៅ។

ដោយឡែកចៅស្រីឈ្មោះគង់ គឹមឡាង អាយុ១០ឆ្នាំ មានគេសុំយកទៅដាក់នៅមណ្ឌលកុមារ កំព្រាដែរ ប៉ុន្តែនាងភ័យខ្លាចមិនព្រមទៅនៅព្រោះធ្លាប់ឪពុកចុងវាយធ្វើបាបកាលពីមុន។ ម៉្យាងទៀត គេមិនទាន់ត្រូវបានសមត្ថកិច្ចចាប់ខ្លួននៅឡើយ ខ្លាចគេមកសងសឹកទៀត។

ឪពុកកំណាចរូបនោះឈ្មោះអ៊ុន សៅមាន ហៅណាង អាយុ៣០ឆ្នាំ មានស្រុកកំណើតនៅស្រុកអូររាំងឪ ខេត្តកំពង់ចាម រូបគេមានម្រាមដៃតែ៦ទេ គឺពិការដាច់ម្រាមដៃខាងស្ដាំ៤ នៅសល់តែ មេដៃមួយប៉ុណ្ណោះ គេពាក់តែអាវដៃវែងរហូត ដើម្បីបានយកដៃអាវទាញគ្របលើម្រាមដៃកំបុត។

ឈ្មោះ អ៊ុន សៅមាន ហៅណាងមានប្រពន្ធឈ្មោះសុខ ផល្លី អាយុ៣០ឆ្នាំ ក្នុងពេលជាកម្មករ ធ្វើសំណង់នៅផ្សារព្រហ្ម ក្រុងប៉ៃលិន ហើយបានពង្រាត់គ្នាមកនៅជាមួយម្ដាយចុង នៅភូមិត្រពាំង អញ្ចាញ ឃុំស្វាយជ្រុំ ស្រុករលាប្អៀរ។ ១ឆ្នាំក្រោយមក ក៏មានកូនស្រី១ ប៉ុន្តែពេលប្រពន្ធសំរាលកូន ទើបតែបាន១០ថ្ងៃ ឈ្មោះណាង ដោយសារតែកូនដើមឈ្មោះគង់ គឹមឡាង បានរត់មកនៅជាមួយអ៊ំ បង្កើត ដោយសារតែគេវាយធ្វើបាបពេកនោះ ក៏ត្រូវឈ្មោះណាង ខឹងវាយធ្វើបាបប្រពន្ធ ដែលទើបតែសរសៃខ្ចីបាន១០ថ្ងៃ ឲ្យទៅតាមយកកូនឈ្មោះគង់ គឹមឡាង មកផ្ទះវិញ។ មិនតែប៉ុណ្ណោះគេបាន គំរាមលើកកូនង៉ែតតូចបោកសម្លាប់ទៀតផង ធ្វើឲ្យឈ្មោះសុខ ផល្លី ជាម្ដាយដែលទទួលការវាយដំ ធ្វើបាបស្រាប់ផងនោះ តក់ស្លុតទាស់រឹងថ្គាម ហើយស្លាប់នៅថ្ងៃទី០៤ ខែមករា ឆ្នាំ២០១០ ក្រោយពីប្ដី វាយធ្វើបាបបាន១ថ្ងៃ។

ក្រុមគ្រួសារជនរងគ្រោះ សំណូមពរឲ្យសមត្ថកិច្ចជួយចាប់ខ្លួនឈ្មោះអ៊ុន សៅមាន ហៅណាង មកផ្ដន្ទាទោសឲ្យបានឆាប់រហ័សផង ទើបពួកគេគ្មានការព្រួយបារម្ភ៕