កម្ពុជាមិនទាន់ស្កប់ស្កល់នឹងទំហំពាណិជ្ជកម្មទ្វេទិស ដែលមានចំនួន១០.០០០លានដុល្លារ

សុក្រ, 05 កុម្ភៈ 2010 09:45

ភ្នំពេញ ៖ ថ្វីបើបានបង្ហាញពីទំហំពាណិជ្ជកម្មទាំងការនាំចេញ និងការនាំចូលរហូតមកដល់ ពេលនេះមានទំហំដល់ទៅ ១០.០០០លានដុល្លារក្ដី ក៏សម្ដេចអគ្គមហាសេនាបតីតេជោ ហ៊ុន សែន មានប្រសាសន៍កាលពីថ្ងៃទី០៤ ខែកុម្ភៈ ថាតួលេខនេះមិនទាន់ស្កប់ស្កល់សម្រាប់យើងនោះទេ ព្រោះ យើងត្រូវការទំហំលើសពីនេះ ដើម្បីរួមចំណែកដល់ការអភិវឌ្ឍន៍សេដ្ឋកិច្ចរបស់យើង។

ទំហំពាណិជ្ជកម្មទ្វេទិសនេះ ចំនួននៃការនាំចេញមានតែប្រមាណ ៤៥០០លានដុល្លារ តែប៉ុណ្ណោះ ឯការនាំចូលមានចំនួនប្រមាណ ៥៥០០លានដុល្លារ។ នៅក្នុងទំហំពាណិជ្ជកម្មទាំង១០ ០០០លានដុល្លារនេះ ទំហំពាណិជ្ជកម្មជាមួយប្រទេសវៀតណាម មានប្រមាណ២០០០លានដុល្លារ ជាមួយប្រទេសថៃមានប្រមាណ ២០០០លានដុល្លារ និងជាមួយប្រទេសចិនមានប្រមាណ ១០០០ លានដុល្លារ។ ថ្វីត្បិតតែទំហំពាណិជ្ជកម្មជាមួយប្រទេសថៃមានចំនួន២០០០ លានដុល្លារក៏ពិតមែន ក៏ប៉ុន្តែការនាំចេញ ពីកម្ពុជាកាលពីឆ្នាំ២០០៨ មានប្រមាណតែជាង៩០លានដុល្លារតែប៉ុណ្ណោះ។

នៅក្នុងពិធីសម្ពោធទីស្ដីការថ្មី របស់ក្រសួងពាណិជ្ជកម្ម ដែលប្ដូរពីទីតាំងនៅជាប់ផ្លូវនរោត្តម ទៅកាន់សង្កាត់ទឹកថ្លា ខណ្ឌសែនសុខ សមេ្ដចនាយករដ្ឋមន្រ្តីមានប្រសាសន៍ថាដើម្បីឲ្យទំហំពាណិជ្ជ កម្មរបស់យើងកាន់តែកើនឡើងនោះ យើងត្រូវបន្តជំរុញការពង្រឹង និងពង្រីកមូលដ្ឋាននាំចេញ ដែល នឹងធ្វើឲ្យកម្ពុជាមានលទ្ធភាពទាក់ទាញកាន់តែច្រើន ព្រមទាំងបន្តអនុវត្តលក្ខខណ្ឌអនុគ្រោះ ពន្ធ ដែលកម្ពុជាទទួលបានឲ្យមានប្រសិទ្ធភាពខ្ពស់ ជាពិសេសត្រូវខិតខំលើកស្ទួយផលិតផលក្នុងស្រុក តាមរយៈការអនុវត្តកម្មវិធីគាំទ្រដល់ការអភិវឌ្ឍ សហគ្រាសធុនតូច និងមធ្យម លើការកែច្នៃកសិផល សិប្បកម្ម នេសាទ ទេសចរណ៍ និងឧស្សាហកម្មកម្មន្តសាល។

សម្ដេចតេជោ ហ៊ុន សែន មានប្រសាសន៍ ថាត្រូវបន្តអនុវត្តឲ្យបានស៊ីជំរៅ នូវកម្មវិធីសមាហរណកម្មកម្ពុជាទៅក្នុងតំបន់ និងពិភពលោក ដោយត្រូវអនុវត្តឲ្យបានម៉ឺងម៉ាត់ និងខ្ជាប់ខ្ជួនចំពោះ លក្ខខណ្ឌ និងកាតព្វកិច្ចតម្រូវការនានាដូចមានចែងក្នុងកិច្ចព្រមព្រៀងពហុភាគី ដូចជាកិច្ចព្រមព្រៀងស្ដីពីពាណិជ្ជកម្ម ទំនិញអាស៊ាន ចិន ដែលកម្ពុជា និងចិនបានឯកភាពគ្នាចាប់ផ្ដើមអនុវត្តចាប់ពី ថ្ងៃទី១ ខែតុលា ឆ្នាំ២០០៩ កិច្ចព្រមព្រៀងស្ដីពីពាណិជ្ជកម្ម សេវាអាស៊ាន-ចិន កិច្ចព្រមព្រៀង ស្ដីពីភាពជាដៃគូសេដ្ឋកិច្ចគ្រប់ជ្រុងជ្រោយរវាងអាស៊ាន-ជប៉ុន កិច្ចព្រមព្រៀងក្របខណ្ឌ ស្ដីពីសហប្រ តិបត្តិការសេដ្ឋកិច្ចគ្រប់ជ្រុងជ្រោយអាស៊ាន-កូរ៉េ កិច្ចព្រមព្រៀងស្ដីពីពាណិជ្ជកម្មទំនិញអាស៊ាន-កូរ៉េ កិច្ចព្រមព្រៀង ស្ដីពីពាណិជ្ជកម្មសេវាអាស៊ាន-កូរ៉េ តំបន់ពាណិជ្ជកម្មសេរីអាស៊ាន សម្រាប់ប្រព័ន្ធ អនុគ្រោះពន្ធរួម កិច្ចព្រមព្រៀងពាណិជ្ជកម្មទំនិញអាស៊ាន ដែលវិធាននេះបានចូលជាធរមានចាប់ អនុវត្តពីថ្ងៃទី១ ខែមករា ឆ្នាំ២០១០នេះ។

លោកចម ប្រសិទ្ធ ទេសរដ្ឋមន្ត្រី រដ្ឋមន្រ្តីក្រសួងពាណិជ្ជកម្មថ្លែងថា អគារទីស្ដីការថ្មីរបស់ក្រ សួងពាណិជ្ជកម្មនេះ សាងសង់ឡើងមានលក្ខណៈច្របាច់ចូលគ្នា រវាងរចនាបទបែបបុរាណ និងរចនាបទបែបសម័យទំនើប ដោយគោរពតាមបទដ្ឋាននៃការសាងសង់អគារការិយាល័យ និងការកែ ច្នៃប្រឌិតយកបរិស្ថាន ធម្មជាតិជុំវិញមកប្រើប្រាស់ ដើម្បីផ្ដល់ឲ្យអគារនូវប្រព័ន្ធខ្យល់ ពន្លឺ និងការពារ កម្ដៅ ដែលទាំងនេះជាគោលការណ៍នៃការសន្សំសំចៃថាមពលអគ្គិសនី និងផ្ដល់មកវិញនូវផាសុក ភាពបែបធម្មជាតិ។ លោកទេសរដ្ឋមន្ត្រីមានប្រសាសន៍ថា ការដោះដូរទីស្ដីការក្រសួងពាណិជ្ជកម្មចាស់មានតម្លៃជាង៥លាន ៤៥០ពាន់ ៤៤៤ដុល្លារ ចំណែកទីស្ដីការថ្មីរបស់ក្រសួងមានតម្លៃជាង ៥លាន ៣១៣ពាន់ ៥១៣ដុល្លារ ដែលក្នុងនោះតម្លៃដី ១លាន ៩១១ពាន់ដុល្លារ តម្លៃសំណង់អគារ ជាង២លាន ៤៣៧ពាន់ ៧៣១ដុល្លារ និងតម្លៃបំពាក់គ្រឿងសង្ហារឹមជាង ១លាន ៦៤ម៉ឺនដុល្លារអាមេរិក៕

ព័ត៌មានថ្មីបំផុត

សំរាប់បុគ្គលិក

ព័ត៌មានស្ដីពីគ្រោះថ្នាក់ចរាចរនៅទូទាំងប្រទេសសម្រាប់ថ្ងៃទី០៤ ខែកញ្ញា ឆ្នាំ២០១០ មានចំនួន១០លើក ស្លាប់៤នាក់

ភ្នំពេញ ៖ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បានឲ្យដឹងថាគ្រោះថ្នាក់ចរាចរសម្រាប់ថ្ងៃទី៤ ខែកញ្ញា កើតឡើងចំនួន១០លើក បណ្ដាលឲ្យមនុស្សស្លាប់ ៤នាក់(ប្រុស) រងរបួសធ្ងន់៩នាក់(ប្រុស៧) របួសស្រាល៣នាក់(ប្រុស១)។ គ្រោះថ្នាក់ចរាចរសម្រាប់ថ្ងៃទី៤ ខែកញ្ញានេះ បើប្រៀបធៀបថ្ងៃទី៣ ខែកញ្ញាកន្លងទៅឃើញថា មានសភាពកើនឡើង២លើកនិងអ្នកស្លាប់មានការកើនឡើងម្នាក់៕