សង្គមស៊ីវិល ៖ ទង្វើរបស់លោកសម រង្ស៊ីពិបាកជួយណាស់

សុក្រ, 05 កុម្ភៈ 2010 14:17

ភ្នំពេញ ៖ ប្រធានសមាគមការពារសិទ្ធិមនុស្សដ៏ធំមួយនៅកម្ពុជា បានថ្លែងបញ្ជាក់ថា ទង្វើរបស់លោកសម រង្ស៊ី ប្រធានគណបក្សជំទាស់នៅកម្ពុជា វាពិបាកនឹងជួយណាស់ ដោយសារតែទាក់ ទងផ្លូវច្បាប់។

ឆ្លើយតបទៅនឹងសំណួររបស់អ្នកសារព័ត៌មាន កាលពីព្រឹក ថ្ងៃទី០៤ ខែកុម្ភៈនេះ ដែល សួរថា ហេតុអ្វីបានជាការដាក់ទោសឲ្យលោកសម រង្ស៊ី ជាប់ពន្ធនាគាររយៈពេល២ឆ្នាំ និងបង់លុយ ពិន័យជាច្រើននោះ មិនមានសង្គមស៊ីវិលណាចាប់អារម្មណ៍ដូចពេលមុន? លោកធន សារាយ ប្រធានសមាគមការពារសិទ្ធិមនុស្សអាដហុក បានថ្លែងថា សកម្មភាពរបស់លោកសម រង្ស៊ី ទាក់ទងទៅ នឹងការដកបង្គោលព្រំដែន ដែលនាំឲ្យមានការដាក់ទោសនោះ សង្គមស៊ីវិលពិបាកជួយណាស់។ លោកបន្តថា លោកសម រង្ស៊ី ដកបង្គោលតំរុយព្រំដែនត្រូវច្បាប់ រដ្ឋាភិបាលពិតជាបន្ទោសថា យើង កាន់ជើងអ្នកធ្វើខុស។ ដូច្នេះប្រជាជនដទៃទៀតក៏អាចធ្វើរបៀបនេះបានដែរ។ ឲ្យតែមានអ្នកណា ដាក់បង្គោល ហើយខ្លួនមិនពេញចិត្តក៏ដកចេញ នេះជាគំរូមួយមិនល្អ ដូច្នេះយើងពិបាកនិយាយ ណាស់។ លោកបន្តថា ករណីលោកសម រង្ស៊ី លោកមិនទាន់ហ៊ានវាយតម្លៃថានយោបាយត្រូវបាន បញ្ចប់ឬយ៉ាងណានោះទេ ដោយសារច្បាប់បោះឆ្នោតដែលបានកំណត់ មិនឲ្យអ្នកដែលមានទោស ឈរឈ្មោះបោះឆ្នោត ប៉ុន្តែសំរាប់លោកសម រង្ស៊ី អាចមានការកែប្រែណាមួយ នៅពេលដែលការ បោះឆ្នោតជិតចូលមកដល់៕