មន្ត្រីរដ្ឋាភិបាលច្រានចោលរបាយការណ៍ ស្ដីពីស្ថានភាពសិទ្ធិមនុស្សរបស់អាដហុក

សុក្រ, 05 កុម្ភៈ 2010 14:21

ភ្នំពេញ ៖ សមាគមការពារសិទ្ធិមនុស្សអាដហុកបានបង្ហាញរបាយការណ៍មួយ ស្ដីពីស្ថានភាព សិទ្ធិមនុស្សសំរាប់ឆ្នាំ២០០៩នៅកម្ពុជា ដែលរបាយការណ៍នោះ បានបង្ហាញថា ស្ថានភាពសិទិ្ធមនុស្សជាទូទៅនៅ កម្ពុជាបានធ្លាក់ចុះជាងឆ្នាំ ២០០៨ ជាពិសេសផ្នែកសិទ្ធិសេរីភាព នៃការបញ្ចេញ មតិ ប៉ុន្តែមន្ត្រីរាជរដ្ឋាភិបាលអះអាងថា របាយការណ៍នោះមិនអាចទទួលយកបានទេ។

កាលពីព្រឹកថ្ងៃទី០៤ ខែកុម្ភៈ ឆ្នាំ២០១០ សមាគមការពារសិទ្ធិមនុស្សអាដហុក បានផ្សព្វផ្សាយរបាយការណ៍មួយស្ដីពីស្ថានភាពសិទ្ធិមនុស្សនៅកម្ពុជា សំរាប់ ឆ្នាំ២០០៩ ដែលរបាយការណ៍ នោះមានចំនួន៥៤ទំព័រ បានអត្ថាធិប្បាយទាក់ទងទៅនឹងសិទ្ធិសេរីភាព តាមផ្នែកនីមួយៗមានផ្នែក បញ្ចេញមតិ ការគំរាមកំហែង អំពើហិង្សាលើស្រ្តីនិងកុមារ ការជួញដូរផ្លូវភេទ ការបណ្ដេញចេញដោយបង្ខំ និងជំលោះដីធ្លី ព្រមទាំងប្រព័ន្ធយុត្តិធម៌ជាដើម។

លោកធន សារាយ ប្រធានសមាគមអាដហុកបានថ្លែងនៅក្នុងសន្និសីទសារព័ត៌មាន នាព្រឹក ថ្ងៃទី០៤ ខែកុម្ភៈនោះថា ស្ថានភាពសិទ្ធិមនុស្សជាទូទៅសំរាប់ឆ្នាំ២០០៩ បានធ្លាក់ចុះជាងឆ្នាំ២០០៨ ហើយនិយាយជារួមដែលយើងលើកយកជាគោលការណ៍ធំ គឺសិទ្ធិសេរីភាព នៃការបញ្ចេញមតិ ទាំង ការបញ្ចេញមតិផ្ទាល់ តាមទីសាធារណៈ និងប្រព័ន្ធផ្សព្វផ្សាយជាដើម។ លោកបន្តថា ជាទូទៅនៅ ពេលក្រោយបោះឆ្នោតម្ដងៗ តែងតែមានការរឹតត្បិតចំពោះសិទ្ធិសេរីភាពផ្សេងៗ តែងតែមានការរឹត ត្បិតចំពោះសិទ្ធិសេរីភាពផេ្សងៗ ហើយបានធូរស្រាលទៅវិញនៅពេលជិតបោះឆ្នោតម្ដងៗ។

លោកឱម យ៉ិនទៀង ទីប្រឹក្សារាជរដ្ឋាភិបាល និងជាប្រធានស្ថាប័នសិទ្ធិមនុស្ស របស់រាជរដ្ឋា ភិបាលកម្ពុជា បានប្រាប់កម្ពុជាថ្មីកាលពីរសៀលថ្ងៃព្រហស្បតិ៍ ទី០៤ ខែកុម្ភៈឲ្យដឹងថា នៅពេលដែលអង្គការ សមាគមទាំងនោះនិយាយថា សិទ្ធិសេរីភាពនៃការបញ្ចេញមតិនៅកម្ពុជាបានចុះខ្សោយនោះ ការបញ្ចេញមតិរបស់អង្គការ សមាគមទាំងនោះនៅកម្ពុជាក៏កាន់តែមានភាពខ្លាំងក្លា ជាងមុន។ លោកបញ្ជាក់ថា «ខ្ញុំមិនដឹងការពិតស្ថិតនៅត្រង់ណាទេ មិនដឹងថា នៅពេលខ្លួនកំពុង បញ្ចេញមតិយ៉ាងខ្លាំង ហើយស្រែកថាអត់មានសិទ្ធិបញ្ចេញមតិ ខ្ញុំក៏មិនដឹងថា ត្រូវគិតយ៉ាងម៉េចដែរ។ ក្នុងនាមជាអង្គការមួយទទួលកិច្ចការសិទ្ធិមនុស្ស ហើយដោយស្ថានការណ៍សិទ្ធិមនុស្សនៅ កម្ពុជាមិនមានការរីកចំរើន តើមានប្រយោជន៍អ្វី ដូច្នេះមានន័យថា គាត់គួរតែរំលាយស្ថាប័នគាត់ ចោលទៅ។ វត្តមានរបស់គាត់មិនអាចរួមចំណែកធ្វើឲ្យស្ថានភាពសិទ្ធិមនុស្សនៅ កម្ពុជាបានល្អប្រ សើរ»៕

ព័ត៌មានថ្មីបំផុត

សំរាប់បុគ្គលិក

ព័ត៌មានស្ដីពីគ្រោះថ្នាក់ចរាចរនៅទូទាំងប្រទេសសម្រាប់ថ្ងៃទី០៤ ខែកញ្ញា ឆ្នាំ២០១០ មានចំនួន១០លើក ស្លាប់៤នាក់

ភ្នំពេញ ៖ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បានឲ្យដឹងថាគ្រោះថ្នាក់ចរាចរសម្រាប់ថ្ងៃទី៤ ខែកញ្ញា កើតឡើងចំនួន១០លើក បណ្ដាលឲ្យមនុស្សស្លាប់ ៤នាក់(ប្រុស) រងរបួសធ្ងន់៩នាក់(ប្រុស៧) របួសស្រាល៣នាក់(ប្រុស១)។ គ្រោះថ្នាក់ចរាចរសម្រាប់ថ្ងៃទី៤ ខែកញ្ញានេះ បើប្រៀបធៀបថ្ងៃទី៣ ខែកញ្ញាកន្លងទៅឃើញថា មានសភាពកើនឡើង២លើកនិងអ្នកស្លាប់មានការកើនឡើងម្នាក់៕