ប្រពន្ធចុងកាប់ប្ដី៧ប៉័ងតោ ព្រោះប្រច័ណ្ឌប្ដីរាំបទស្លូឱបស្រីក្មេង

សុក្រ, 05 កុម្ភៈ 2010 16:32

កំពង់ឆ្នាំង ៖ ព្រោះតែភ្លើងស្នេហ៍ប្រច័ណ្ឌស្រ្តីជាប្រពន្ធចុងគេម្នាក់ បានយកកាំបិតប៉័ងតោកាប់ ប្ដីខ្លួនឯង៧កាំបិតរងរបួសជាទម្ងន់ ព្រោះតែពេលលេងរាំវង់ រាំបទ ស្លូ ប្ដីទៅរាំឱបស្រីផេ្សង។

ហេតុការណ៍នេះបានកើតឡើងនៅវេលាម៉ោង ២៣យប់ថ្ងៃទី០៤ ខែកុម្ភៈ ឆ្នាំ២០១០ ក្នុងភូមិ អណ្ដូងច្រុះ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ជាលំនៅដ្ឋានរបស់ប្រពន្ធចុង។ បុរសរងគ្រោះ មានឈ្មោះ យូ សុផល អាយុ៣៨ឆ្នាំ មានមុខរបរជាជាងសំណង់ រស់នៅភូមិទី៧ សង្កាត់ខ្សាម ក្រុងកំពង់ឆ្នាំង មានប្រពន្ធដើមឈ្មោះញ៉េប លែន អាយុ៤៨ឆ្នាំ មានកូនប្រុសម្នាក់ អាយុ១៥ឆ្នាំ។ មិត្ត ភក្ដិ ជនរងគ្រោះជាជាងសំណង់ដូចគ្នា ដែលបានឃើញហេតុការណ៍នោះបាននិយាយឲ្យដឹងនៅក្នុង មន្ទីរពេទ្យខេត្តថា គាត់និងជនរងគ្រោះបាននាំគ្នាទៅលេងរាំវង់ក្នុងភូមិអណ្ដូងច្រុះ នៅយប់ថ្ងៃទី០៤ ខែកុម្ភៈ ឆ្នាំ២០១០ ពេលនោះឈ្មោះតូច មុំ អាយុ៣២ឆ្នាំ ជាប្រពន្ធចុងឈ្មោះយូ សុផល ក៏ទៅលេង ដែរ។ ពេលយប់បន្តិចអ្នកចាក់ធុងបាសក៏ចាក់បទស្លូម្ដង ពេលនោះឈ្មោះយូ សុផលក៏បានរាំឱបគ្នា ជាមួយស្រីក្រមុំម្នាក់ ក្រោយពីរាំបទស្លូចប់ ឈ្មោះតូច មុំ ក៏ឈ្លោះប្រកែកជេរបញ្ចោរប្ដី ព្រោះតែក្ដីប្រ ច័ណ្ឌ ហើយក៏បណ្ដើរគ្នាមកផ្ទះវិញ។

នៅតាមផ្លូវមកផ្ទះ តូច មុំ ឲ្យប្ដីជូននាងទៅបត់ជើង ប្ដីក៏មិនព្រមជូន មិនព្រមចាំ ក៏រិតតែធ្វើ ឲ្យតូច មុំ កាន់តែខឹងឡើងទ្វេដងថែមទៀត ពេលទៅដល់ផ្ទះវិញការឈ្លោះប្រកែកជេរគ្នាកកើតឡើង ទៅវិញទៅមក។ ខណៈឈ្មោះតូច មុំ ក៏បានយកកាំបិតកកុកកញ្ចាស់មួយមកកាន់កំញើញប្ដីៗក៏នៅ តែមិនខ្លាច បន្ទាប់មកគេក៏បោះកាំបិតកញ្ចាស់ចោល ទាញកាំបិតប៉័ងតោដ៏មុតមួយមកកាប់ចិញ្ច្រាំប្ដី តែម្ដង ប៉ុន្តែយូ សុផល អត់តដៃជាមួយប្រពន្ធចុងទេ គឺចេះតែរងនិងគេច តែគេចអត់រួតក៏ត្រូវប្រពន្ធ ចុងកាប់ចំ៧កាំបិត។ ឈ្មោះយូ សុផល បានរាប់មុខរបួសខ្លួនឯងប្រាប់កម្ពុជាថ្មីដឹងថា គេកាប់គាត់៧ កាំបិត គឺត្រចៀកឆ្វេង២កាំបិត ថ្ងាស់១កាំបិត ក្បាលក្រោយ១កាំបិត ទ្រូង១កាំបិត ដើមដៃឆ្វេង២កាំបិត។ ក្រោយពេលកើតហេតុ បងថ្លៃរបស់ប្រពន្ធចុងបានបើកម៉ូតូឌុបគាត់មកពេទ្យឃុំរលាប្អៀរ ដោយមិត្តភក្ដិគាត់ជិះឱបពីក្រោយ បន្ទាប់មកពេទ្យឃុំក៏ទូរស័ព្ទហៅឡានពេទ្យខេត្តដឹកមកខេត្ត វេលាម៉ោង២៣ និង៣០នាទីយប់។

ឈ្មោះញ៉េប លែន ជាប្រពន្ធដើមបាននិយាយថា ប្រពន្ធចុងកាប់ប្ដី តែគាត់ជាប្រពន្ធដើមបែរជា មកទ្រាំមើលប្ដី ព្រោះតែអាណិតគេ តែប្ដីនាងអត់អាណិតនាងទេ គេលួចមានប្រពន្ធចុង៩ខែមក ហើយ ដោយប្រពន្ធចុងជាស្រីក្មេង ប៉ុន្តែដល់ពេលគេរកក្មេងជាងនេះទៀត ក៏ត្រូវប៉័ងតោអ៊ីចឹង៕