សំរេចចិត្តលោតទឹកលើស្ពានជ្រោយចង្វា ព្រោះជំពាក់លុយធនាគារ

សុក្រ, 05 កុម្ភៈ 2010 17:17

ភ្នំពេញ ៖ ដោយសារតែខ្លាចគេរឹបអូសយកផ្ទះសំបែង ហើយម៉្យាងទៀត គ្មានលទ្ធភាពសងការប្រាក់ ឲ្យធនាគារនោះ ស្រ្តីម្នាក់ដែលជំពាក់ប្រាក់ធនាគារបាន សំរេចចិត្តមកលើស្ពានជ្រោយចង្វា ដើម្បីលោតទឹក សម្លាប់ខ្លួនតែសំណាងល្អ ដែរ បានប៉ូលិសជួយចាប់ឃាត់ទាន់ពេលវេលា ទើបធ្វើឲ្យការប៉ុនប៉ងធ្វើអត្តឃាតរបស់ស្រ្តីរូបនោះមិន បានសំរេចឡើយ។

ហេតុការណ៍ប៉ុនប៉ងលោតទឹកសម្លាប់ខ្លួននោះ បានកើតឡើងកាលពីវេលា ម៉ោង៧និង៣០នាទីព្រឹកថ្ងៃទី០៥ ខែកុម្ភៈ ឆ្នាំ២០១០ នៅលើស្ពានជ្រោយចង្វា ចំហៀងខាងលិចក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ស្រ្ដីដែលប៉ុនប៉ងធ្វើអត្តឃាតនោះឈ្មោះបេ គឹមអេង អាយុ៤០ឆ្នាំ មុខរបរគ្មាន មានប្ដីឈ្មោះ ជាង គឹមឈឿន មុខរបរគ្មាន និងមានកូនចំនួន៣នាក់ ស្នាក់នៅក្នុងផ្ទះជួលក្នុងសង្កាត់ទឹកថ្លា ខណ្ឌ សែនសុខ និងមានស្រុកកំណើតនៅភូមិឃុំផ្ទះកណ្ដាល ស្រុកស្រីសន្ធរ ខេត្តកំពង់ចាម។

ប្រភពព័ត៌មានពីកន្លែងកើតហេតុ បានឲ្យដឹងថានៅពេលកើតហេតុគេបាន ឃើញស្រ្ដីវ័យចំណាស់ម្នាក់ បានជិះមកឈប់នៅគល់ស្ពានជ្រោយចង្វាត្រើយ ខាងលិច ហើយស្រ្ដីរូបនោះចុះពីលើម៉ូ តូឌុប។ ដោយមានស្ពាយកាបូបនិងកាន់កន្ត្រកដាក់ខោអាវផងនោះ បានដើរឡើងលើស្ពានជ្រោយ ចង្វា ដោយមានមុខស្រពាប់ស្រពោនរបៀបមនុស្សពិបាកចិត្ត លុះពេលដើរជិតដល់ពាក់កណ្ដាល ស្ពានដោយបំរុងតែឡើងលើបង្កាន់ដៃស្ពាន ដើម្បីលោតទឹកសម្លាប់ខ្លួននោះ ក៏ត្រូវបានប៉ូលិសដែលយាមកាមនៅលើស្ពានឃើញទាន់ ក៏រត់មកឃាត់ទាន់ពេលវេលា។

ប្រភពព័ត៌មានបានបន្តទៀតថា ក្រោយពេលប៉ូលិសជួយអន្តរាគមន៍ចាប់ឃាត់ ស្រ្តីរូបនោះ ដែលមានបំណងចង់លោតទឹកសម្លាប់ខ្លួនទាន់ពេល ហើយប៉ូលិសបាននាំមកសួរនាំរឿងហេតុនៅ គោលដៅស្នាក់ការស្ពានត្រើយខាងលិច បន្ទាប់មកស្រ្ដីរូបនោះបានប្រាប់ប៉ូលិសថា មូលហេតុដែល ធ្វើឲ្យរូបគាត់ចង់គិតខ្លីដូច្នេះ ដោយសារតែគ្រួសារគាត់ក្រីក្រពេកបានខ្ចីលុយធនាគារនៅឯស្រុក កំណើតរបស់គាត់ចំនួន១០០០ដុល្លារ ដើម្បីរកស៊ីតែការខ្ចីលុយនោះគាត់ត្រូវ សងរំលោះប្រចាំខែ ហើយកាលពីខែមុននោះដោយសារពួកគាត់គ្មានលទ្ធភាព និងបង់នោះបានសំរេចចិត្តយកម៉ូតូកញ្ចាស់របស់ប្ដី ដែលកំពុងតែរត់ឌុបចិញ្ចឹម ប្រពន្ធកូន ទៅបញ្ចាំបានលុយ ១៥០ដុល្លារ ដើម្បីបង់ការ ប្រាក់ឲ្យធនាគារ លុះដល់ខែនេះទៀតគាត់គ្មានលទ្ធភាពនឹងបង់ការប្រាក់ឲ្យធនាគារនោះ គេនឹងរឹប អូសយកផ្ទះសំបែងនៅឯស្រុកតែម្ដង ហើយម៉្យាងទៀតនៅមុនពេលកើតហេតុ នេះ គាត់មានទំនាស់ ជាមួយប្ដី បានហៅប្ដីមិនព្រមស្ដីរកផងនោះ ទើបនៅព្រឹកនេះគាត់បានសំរេចចិត្តមកលោតទឹកលើ ស្ពានជ្រោយចង្វា ដើម្បីបញ្ចប់ជីវិត ពីព្រោះគាត់តូចចិត្តនឹងវាសនាដែលក្រីក្រពេក ហើយជំពាក់លុយ ធនាគារទៀតផង។

បន្ទាប់ពីសួរនាំដឹងរឿងរួចហើយ ប៉ូលិសបានអប់រំណែនាំឲ្យស្រ្តីរូបនោះឈប់ មានបំណងចង់ គិតខ្លីដូច្នេះតទៅទៀត ហើយក៏ឲ្យគាត់វិលត្រឡប់មកផ្ទះសំបែងវិញផងដែរ៕