គ្មានជនបរទេសណាមកសុំចែកទឹកដីនៅប្រាសាទព្រះវិហារបានទេ

អាទិត្យ, 07 កុម្ភៈ 2010 09:16

សម្ដេចនាយករដ្ឋមន្ត្រី បានមានប្រសាសន៍នៅក្នុងពិធី ជំនួបជាមួយកងទ័ពនៅ ប្រាសាទព្រះ វិហារខណៈដែលកំពុងពិសារនំបញ្ចុកជាមិត្តភាពថា ទីនេះជាទឹកដី របស់កម្ពុជាមិនមែនជាទឹកដីរបស់ អ្នកណាទេ ហើយក៏មិនចាំបាច់ត្រូវតែសុំច្បាប់អ្នកណា ដើម្បីចូលមកកាន់ ទឹកដីរបស់ខ្លួននោះដែរ។

កាលពីព្រឹកថ្ងៃទី០៦ ខែកុម្ភៈ ឆ្នាំ២០១០ នៅក្នុងដំណើរទស្សនកិច្ចរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទៅកាន់តំបន់ប្រាសាទព្រះ វិហារ សម្ដេចបានចុះសួរសុខទុកជាមួយនាយទាហាន ពលទាហានទាំងអស់ ដែលកំពុងឈរជើង ការពារនៅតាមខ្សែបន្ទាត់ព្រំដែន ហើយខណៈដែលកំពុងពិសានំបញ្ចុករួមគ្នានៅចំណុច៥មករា ជាមួយកងកម្លាំងប្រដាប់អាវុធជាច្រើននោះ សម្ដេចបានមានប្រសាសន៍ព្រមានធ្ងន់ៗចំពោះការលើក ឡើងរបស់ភាគីសៀមថា ប្រាសាទព្រះវិហារគឺជារបស់ខ្មែរដូច្នេះការឡើងមកកាន់ប្រាសាទព្រះវិហារ មិនចាំបាច់សុំអ្នកណាទេ ហើយក៏គ្មានបរទេសណាអាចមកសុំចែកទឹកដីប្រាសាទព្រះវិហារបានដែរ។

ជាមួយគ្នានោះ សម្ដេចនាយករដ្ឋមន្រ្តីក៏បានផ្ដាំផ្ញើទៅប្រតិភូទាហានសៀម ប្រមាណ២៤នាក់ ខណៈជួបគ្នានៅចំណុចពយតាឌីឲ្យដឹងផងដែរថា ទីនេះគឺជាទឹកដីរបស់កម្ពុជាហើយព្រះវិហារ គឺជាប្រាសាទរបស់កម្ពុជាឯដំណើរ ទស្សនកិច្ចនេះ គឺដើម្បីសួរសុខទុក្ខកងទ័ពកម្ពុជាអត់មានដើរនៅលើដី អ្នកណាទេ ហើយក៏មិនចាំបាច់សុំច្បាប់បរទេសណាដែរ ព្រោះចំណុចទាំងអស់នេះគឺជារបស់កម្ពុជា។ សម្ដេចបានបញ្ជាក់ផងដែរថា ពួកគណៈប្រតិភូសៀមមិនអាចជួបស្វាគមន៍នៅក្នុងវត្តកែវ សិក្ខាគិរីស្វារៈ ប៉ុន្តែអាចជួបនៅទីតាំងផ្សេងបាន។ ហេតុដូច្នេះហើយ ទើបសម្ដេចអនុញ្ញាតឲ្យប្រតិភូ ខាងសៀមជួបនៅចំណុចពយតាឌី។ សម្ដេចនាយករដ្ឋមន្ត្រីក៏បានមានប្រសាសន៍ឲ្យដឹងផងដែរថា នៅតំបន់ប្រាសាទព្រះវិហារគ្មានតំបន់ត្រួតស៊ីគ្នាទេ ដែលមានតែភាគីសៀមប៉ុណ្ណោះ ដែលលើកឡើងថា មានដីត្រួតស៊ីគ្នា។

ទាក់ទងទៅនឹងការជួបជាមួយគណៈប្រតិភូសៀមនោះ សម្ដេចនាយករដ្ឋមន្ត្រី បញ្ជាក់ថា មិន មែនសម្ដេចនាយករដ្ឋមន្ត្រីទៅស្វាគមន៍ពួកកងទ័ពសៀមទេ គឺ ថាកងទ័ពសៀមបានសុំជួបហើយបាន អនុញ្ញាតឲ្យចូលតាមច្រកខាងមុខ ប្រាសាទ ដោយបើកផ្លូវមួយច្រកឲ្យពួកគេធ្វើដំណើរ ហើយប្រាប់ ឲ្យចេញទៅវិញតាមផ្លូវដដែលដោយមិនអនុញ្ញាតឲ្យដើររហេតរហូតទេ។

សូមបញ្ជាក់ថា នៅក្នុងពិធីបរិភោគនំបញ្ចុករួមគ្នារវាងនាយទាហានពលទាហានចំណុច៥ មករានោះ គេបានរៀបចំសម្លជាង២០ខ្ទះ និងនំអន្សមជ្រូកផងដែរ។ សកម្មភាពនៃការចុះសួរសុខទុក្ខ របស់សម្ដេចនាយករដ្ឋមន្រ្តីនាព្រឹកនោះ បានធ្វើឲ្យនាយទាហានពលទាហានទាំងអស់ដែលកំពុង ឈរជើងការពារនូវខ្សែ ក្រវាត់ព្រំដែនកម្ពុជា-ថៃ មានទឹកចិត្តយ៉ាងខ្លាំង ដោយកន្លងមកមិននឹកស្មានថា បានឃើញសម្ដេចនាយករដ្ឋមន្រ្តីធ្វើទស្សនកិច្ចនៅតាមព្រំដែន ហើយឡើងទៅកាន់ប្រាសាទ ព្រះ វិហារបែបនេះទេ។ ពីព្រោះថា មុននឹងដំណើរទស្សនកិច្ចនេះមានស្ថានភាពតានតឹង ហើយខាងកង ទ័ពសៀមគេបានព្រមានទុកជាស្រេចថា បើពួកគេឡើងប្រាសាទព្រះវិហារមិនបាន សម្ដេចនាយក រដ្ឋមន្ត្រីក៏មិនអាចឡើងប្រាសាទព្រះវិហារបានដែរ។ ចំណែកសម្ដេចនាយករដ្ឋមន្ត្រីបានតាំងចិត្តរួច ជាស្រេចរួចទៅហើយថា ទោះបីជាមួយជំហានស្លាប់ក៏ត្រូវតែឡើងទៅលើប្រាសាទព្រះវិហារឲ្យបាន ពីព្រោះសម្ដេចឡើងទៅកាន់ប្រាសាទព្រះវិហារដែលជារបស់ខ្មែរមិនបានជាន់ក្បាលអ្នកណាទេ។

សូមបញ្ជាក់ថា ខណៈដែលសម្ដេចនាយករដ្ឋមន្រ្តីឡើងមកដល់ប្រាសាទព្រះ វិហារប្រមាណ ៣០នាទី មានបញ្ហាប្រឈមមុខដាក់គ្នាមួយបានកើតឡើងស្ទើរតែផ្ទុះអាវុធ ដោយសារតែកងទ័ពកម្ពុជាបានហាមឃាត់ទាហានសៀម១០នាក់ ដែលឈរជើងនៅវត្តកែវសិក្ខាគិរីស្វារៈ ជាយូរមកហើយនោះ មិនឲ្យឡើងមកកាន់វត្តបន្តទៅទៀតដើម្បីទុកលទ្ធភាពឲ្យសម្ដេចនាយករដ្ឋមន្ត្រីធ្វើ ទស្សនកិច្ច។

តាមសេចក្ដីរាយការណ៍ ពីមេបញ្ជាការកងយោធពលខេមរភូមិន្ទដែលឈរជើង ការពារជួរមុខ ប្រចាំនៅប្រាសាទតាមាន់បានឲ្យដឹងថា កងទ័ពសៀមបានព្យាយាមឡើងមកមុខប្រាសាទតាមាន់ ប៉ុន្តែត្រូវបានកងទ័ពកម្ពុជាភ្ជង់កាំភ្លើងឲ្យត្រឡប់ទៅវិញ ដែលការបញ្ចេញដោយចុងកាណុងឲ្យទាហានសៀមត្រឡប់ទៅវិញនោះ បានប្រឈមមុខដាក់គ្នាយ៉ាងខ្លាំង។

លោកនាក់ វង្ស មេបញ្ជាការកងពលលេខ៤២ ដែលកំពុងឈរជើងការពារនៅប្រាសាទតាមាន់បានមានប្រសាសន៍ថា នៅរសៀលថ្ងៃទី០៦ ខែកុម្ភៈ ឆ្នាំ២០១០នេះ កំលាំងទ័ពសៀមប្រមាណ២០០នាក់ បានព្យាយាមឡើងមកកាន់ប្រាសាទតាមាន់ តែកងទ័ពកម្ពុជាបានលើកកាំភ្លើងភ្ជង់ បញ្ជាឲ្យត្រឡប់ទៅក្រោយវិញ ដែលការបញ្ជានោះបានធ្វើឲ្យពួកទាហានសៀមខឹងយ៉ាងខ្លាំង ហើយ ប៉ះសំដីគ្នាជាមួយទាហានខ្មែរទៅវិញទៅមក បង្កឲ្យភាពតានតឹងស្ទើរតែផ្ទុះអាវុធកើត ឡើង ។ លោក បន្តថា ពួកទាហានសៀមធ្វើបែបនោះជាការអុកឡុករំខានដល់ដំណើរទស្សនកិច្ចរបស់នាយករដ្ឋមន្រ្តីកម្ពុជា។

លោកនាក់ វង្ស បានថ្លែងឲ្យដឹងទៀតថា ឥឡូវនេះយើងកំពុងតែប្រើកាំភ្លើងពួកទាហានសៀម ឲ្យដកចេញពីមុខប្រាសាទតាមាន់ ហើយពួកគេក៏បានសុខចិត្តដកទៅវិញ ប៉ុន្តែការត្រឡប់ថយក្រោយវិញនោះ មិនដឹងគេមានបំណងយ៉ាងណាទៀតទេ។ ដូច្នេះដំណើរទស្សនកិច្ចរបស់សម្ដេច នាយករដ្ឋមន្ត្រីនៅថ្ងៃទី០៨ ខែកុម្ភៈខាងមុខអាចនឹងមានភាពតានតឹងដូចនៅប្រាសាទព្រះវិហារនេះ ដែរ។

ចំណែកមេទ័ពរបស់កម្ពុជាលោកឧត្ដមសេនីយ៍ជា តារា ក៏បានមានប្រសាសន៍ឲ្យដឹងដែរថា ការរំខានរបស់ទាហានសៀមក៏ដូចជារដ្ឋាភិបាលសៀមចំពោះ ប្រទេសកម្ពុជា គេមិនត្រឹមតែរំខាននៅ ប្រាសាទព្រះវិហារទេ តែថែមទាំងរំខាននៅប្រាសាទតាមាន់ទៀត។ ដូច្នេះ មហិច្ឆតាដ៏ខ្មៅងងឹតរបស់ រដ្ឋាភិបាលសៀម គឺការបំផ្លាញប្រទេសរបស់ខ្លួនឯងទៅវិញទេ។ និយាយជារួមរដ្ឋាភិបាលសៀម មាន បំណងរំលោភដែនដីកម្ពុជាយ៉ាងពិតប្រាកដ៕