ច្រកទេសចរណ៍ប្រាសាទព្រះវិហារបើកឡើងវិញ ប្រសិនបើសភាពការណ៍វិលទៅរកដូចមុនថ្ងៃ១៥ កក្កដា២០០៨

ច្រកទេសចរណ៍ប្រាសាទព្រះវិហារបើកឡើងវិញ ប្រសិនបើសភាពការណ៍វិលទៅរកដូចមុនថ្ងៃ១៥ កក្កដា២០០៨

អាទិត្យ, 07 កុម្ភៈ 2010 09:20

សម្ដេចអគ្គមហាសេនាបតីតេជោ ហ៊ុន សែន នាយឧត្ដមសេនីយ៍ផុតលេខផ្កាយមាស៥ នាយករដ្ឋមន្ត្រីនៃ ព្រះរាជាណាចក្រកម្ពុជា បានថ្លែងជាសារនយោបាយ ទៅកាន់កងទ័ព និងប្រជាជន ថៃដែលរស់នៅតាមព្រំដែនថា ប្រសិនបើសភាពការណ៍វិលត្រឡប់ទៅរកដូច មុនថ្ងៃទី១៥ ខែកក្កដា ឆ្នាំ២០០៨មុនពេលដែលកងទ័ពថៃលើកកងទ័ពចូលមកឈ្លានពានវត្តកែវសិក្ខាគិរីស្វារៈ ខ្ញុំនឹងបើក ច្រកព្រំដែនប្រាសាទព្រះវិហារឲ្យទេសចរណ៍ឡើងមកទស្សនាប្រាសាទព្រះវិហារដូចដើមវិញ។

សម្ដេចនាយករដ្ឋមន្ត្រីថ្លែងដូច្នេះ ក្នុងខណៈដែលសម្ដេចនិងលោកជំទាវ អញ្ជើញចុះសាកសួរ សុខទុក្ខនាយទាហាន នាយទាហានរង ពលទាហាននិងប្រជាពលរដ្ឋនៅតំបន់ប្រាសាទព្រះវិហារ ព្រំដែនកម្ពុជា-ថៃ និងសម្ពោធទីបញ្ជាការកងពលធំអន្តរាគមន៍លេខ៣ ស្ថិតក្នុងស្រុកជាំក្សាន្ត ខេត្ត ព្រះវិហារនាព្រឹកថ្ងៃទី០៦ ខែកុម្ភៈ ឆ្នាំ២០១០។

សម្ដេចតេជោថ្លែងថា ខ្ញុំសូមជំរាបទៅប្រជាជនខេត្តស៊ីសាកេត ខេត្តហួហ៊ីនក្ដី ខ្ញុំដឹងថាប្រជា ពលរដ្ឋថៃក៏មានការមិនសប្បាយចិត្តជាមួយនឹងសភាពការណ៍ ដែលបានកើតឡើង ដែលធ្វើឲ្យប្រជា ពលរដ្ឋថៃនៅម្ខាងទៀត នៃប្រាសាទព្រះវិហារជួបការលំបាកអំពីជីវភាពបាត់បង់ប្រាក់ចំណូល ដែល ធ្លាប់បានមកពីសេវាទេសចរណ៍។ រឿងនេះវាស៊ីសងទៅលើរដ្ឋាភិបាលទីក្រុងបាងកកឆ្លើយ តបបញ្ហា នេះយ៉ាងណាតែប៉ុណ្ណោះ។ ប្រាសាទនេះជាប្រាសាទរបស់ខ្មែរ ហើយខ្មែរចង់បិទពេលណាស្រេចតែ ខ្មែរ ប៉ុន្តែខ្មែរបើកតែដោយសារការឈ្លានពាននៅថ្ងៃទី១៥ ខែកក្កដា កម្ពុជាបង្ខំចិត្តបិទច្រកនេះ ដែល ធ្វើឲ្យប្រជាជនខាងថៃជួបការលំបាកបាត់ចំណូល។

សម្ដេចថ្លែងថា«សូមកុំភ័ន្តច្រឡំថា ប្រាសាទព្រះវិហារមានតែច្រកមកពីប្រទេសថៃនោះ ទៅ តាមច្រកណាក៏បានដែរ។ យើងខិតខំបញ្ចៀសការប៉ះទង្គិចដោយអាវុធនិងការប្រឈមមុខដោយ យោធាដែលកន្លងមកយើងធ្វើបានមួយកំរិត ហើយខិតខំបង្កបរិយាកាលជឿទុកចិត្តគ្នាតាមរយៈការ ជួបគ្នាធ្វើសកម្មភាព ខាងវប្បធម៌និងកីឡារួមគ្នា។ ការបាញ់គ្នាវាអាក្រក់ណាស់ ការនិយាយរកគ្នា ការ សន្ទនា ការទាក់ទងគ្នាទើបជាការល្អ ប៉ុន្តែបញ្ហានេះវាអត់ចំណុះលើកម្ពុជាទេ វាចំណុះទាំងស្រុងទៅ លើឥរិយាបថនៃរដ្ឋាភិបាលទីក្រុងបាងកកឆ្លើយតបបែបណា៕