ប្រមុខរាជរដ្ឋាភិបាលអះអាងពីការរួមគ្នាការពារទឹកដីប្រឆាំងការឈ្លានពានពីបរទេស

ប្រមុខរាជរដ្ឋាភិបាលអះអាងពីការរួមគ្នាការពារទឹកដីប្រឆាំងការឈ្លានពានពីបរទេស

អាទិត្យ, 07 កុម្ភៈ 2010 09:24

សម្ដេចតេជោ ហ៊ុន សែន បានមានប្រសាសន៍បញ្ជាក់យ៉ាងរឹងមាំពីសមរភូមិជាយដែនជួរមុខ ពីការរួមគ្នា ការពារទឹកដី ប្រឆាំងការឈ្លានពានគ្រប់ប្រភេទពី បរទេស។

សម្ដេចនាយករដ្ឋមន្ត្រីបានថ្លែងក្នុងពិធីអញ្ជើញសួរសុខទុក្ខនាយទាហាន នាយទាហានរង ពលទាហាន និងប្រជាពលរដ្ឋនៅតំបន់ប្រាសាទព្រះវិហារព្រំដែនកម្ពុជា-ថៃ និងសម្ពោធទីបញ្ជាការ កងពលធំអន្តរាគមន៍លេខ៣ ដែលមានទីតាំងនៅភូមិពាក់ស្បែក ឃុំយាង ស្រុកជាំក្សាន្ត ខេត្តព្រះវិ ហារ នាព្រឹកថ្ងៃទី០៦ ខែកុម្ភៈ ឆ្នាំ២០១០។

សម្ដេចតេជោមានប្រសាសន៍ថា ទូលបង្គំខ្ញុំសូមទូលថ្វាយព្រះមហាក្សត្រ សម្ដេចឪ សម្ដេចម៉ែ បញ្ជាក់យ៉ាងរឹងមាំពីសមរភូមិជាយដែនជួរមុខថា កូនចៅ ចៅទួតរបស់ព្រះអង្គដែលជាអ្នកជំនាន់ក្រោយនឹងបន្តវេនពីព្រះអង្គខិតខំការពារនូវទឹកដី នៃព្រះរាជាណាចក្រកម្ពុជារបស់យើង ហើយនេះ ជាការទុកចិត្តរបស់ព្រះអង្គចំពោះថ្នាក់ដឹកនាំរដ្ឋាភិបាលកងយោធពលខេមរភូមិន្ទ នគរបាលជាតិ ហើយនិងកំលាំងប្រជាជនរួបរួមគ្នា ដើម្បីការពារទឹកដីប្រឆាំងនឹងការឈ្លានពាន ពីបរទេស។

សម្ដេចថ្លែងបន្តថា រាជរដ្ឋាភិបាលកម្ពុជាបញ្ជាក់ឡើងវិញថា បញ្ហាព្រំដែនត្រូវដោះស្រាយតាម ការចរចាសន្តិភាពដោយមិនប្រើប្រាស់កំលាំងដោះស្រាយ បញ្ហា ការប្រើប្រាស់កំលាំងធ្វើតែក្នុងករណីការពារខ្លួន ការពារទឹកដីតែប៉ុណ្ណោះ នេះជាគោលការណ៍ដែលមិនប្រែប្រួលរបស់រាជរដ្ឋាភិ បាលកម្ពុជា។ ការប្រើប្រាស់កំលាំងចាប់បង្ខំឲ្យយើងធ្វើនៅក្នុងពេលដែលគេឈ្លានពានយើងតែប៉ុណ្ណោះ ក្នុងគោលដៅនេះយើងមិនចូលដីគេ តែមិនអនុញ្ញាតឲ្យគេចូលដីយើង ខ្ញុំសូមបញ្ជាក់រថក្រោះ រថពាសដែក កាំភ្លើងគ្រប់ប្រភេទមិនមែនយកមកឲ្យអស់លោកតាំងពិព័រណ៍នោះទេ! យកមកឲ្យអស់លោកវាយខ្មាំង វាយខ្មាំងតែក្នុងទឹកដីកម្ពុជាតែប៉ុណ្ណោះ មិនឲ្យវាយគេក្នុងទឹកដីរបស់គេ ទេ។ យើងអត់ចង់បានការហូរឈាមណាមួយមិនថាខ្មែរ មិនថាថៃទេ! យើងចង់បានសន្តិភាព យើង ចង់បានមិត្តភាព និងសហប្រតិបត្តិការតែប៉ុណ្ណោះ ដូចក្នុងគោលដៅជាយុទ្ធសាស្រ្តរបស់យើង ដែល ចង់ប្រែក្លាយព្រំដែននៃប្រទេសជិតខាងឲ្យនៅជាព្រំដែនសន្តិភាព មិត្តភាពនិងសហប្រតិបត្តិការ។ ដូច្នេះ ខ្ញុំផ្ដល់បទបញ្ជាមិនឲ្យចូលទៅក្នុងដីគេ ទោះបីដោយវិធីណាក៏ដោយ ដូចជាលួចចូលទៅកាប់ ឈើរបស់គេនោះ សុទ្ធតែខុសច្បាប់ទាំងអស់ បង្កើតបញ្ហាហើយក៏មិនអនុញ្ញាតឲ្យគេចូលដីយើង ដូច កាលពីថ្ងៃទី១៥ កក្កដា ឆ្នាំ២០០៨ យើងជាប់បោះឆ្នោតនៅខាងក្នុងបានជារឿងរ៉ាវវាជាប់ដល់ថ្ងៃនេះ បើកុំបោះឆ្នោតថ្ងៃទី២៧ ខែកក្កដា ឆ្នាំ២០០៨មិនអាចមានសភាពការណ៍នៅថ្ងៃនេះទេ៕