ប្ដីប្រពន្ធទើបជួបជុំគ្នាវិញបានកន្លះខែ ប្ដីកំណាចវាយធ្វើបាបទៀតរហូតស្លាប់

ច័ន្ទ, 08 កុម្ភៈ 2010 17:06

ភ្នំពេញ ៖ ស្រ្តីម្នាក់ត្រូវបានក្រុមគ្រួសារបញ្ជូនមកកាន់មន្ទីរពេទ្យកាល់ម៉ែត ដើម្បីសង្គ្រោះអាយុជីវិតដោយ សារតែត្រូវប្ដីអប្រិយ វាយបណ្ដាលឲ្យរងរបួសយ៉ាង ធ្ងន់ធ្ងរ ក្រោយពេលបែកបាក់ស្នេហាចែកផ្លូវគ្នាអស់ រយៈពេលជាងមួយឆ្នាំហើយ ទើបមកសុំជានាគ្នាវិញ បានប្រហែលកន្លះខែ ប៉ុណ្ណោះ ឆ្លៀតឱកាសឪពុកម្ដាយក្មេកមិននៅផ្ទះ ប្ដីកំណាចរូបនោះបានប្រើអំពើហិង្សា លើប្រពន្ធ ថែមទៀត ហើយគេចខ្លួនបាត់តែម្ដង។

ជនរងគ្រោះត្រូវបានបញ្ជូនមកកាន់មន្ទីរពេទ្យកាល់ម៉ែត កាលពីវេលាម៉ោង១១ ព្រឹក ថ្ងៃទី០៨ ខែកុម្ភៈ ឆ្នាំ២០១០នេះ បន្ទាប់ពីត្រូវប្ដីកំណាចវាយធ្វើបាប កាលពីវេលាម៉ោងប្រហែល១រំលងអាធ្រាត្រ ថ្ងៃទី០៨ ខែកុម្ភៈ នៅក្នុងភូមិអូរកណ្ដាល ឃុំ-ស្រុកដងទង់ ខេត្តកំពត។

ស្ដ្រីរងគ្រោះ ដែលត្រូវប្ដីវាយបណ្ដាលឲ្យរងរបួសធ្ងន់មិនសង្ឃឹមរស់នោះឈ្មោះ ឡេង សុខា អាយុ ២៥ឆ្នាំ ស្នាក់នៅផ្ទះកើតហេតុបានរងរបួសមួយកន្លែងត្រង់លើចិញ្ចើមឆ្វេង ដែលប្ដីវាយនឹងវត្ថុ រឹង។ ចំណែកប្ដីកំណាចត្រូវបានគេស្គាល់ថាឈ្មោះ សុខ មឿន អាយុ៤១ឆ្នាំ មុខរបរ មេការផ្នែក អេ ស្កាវិចទ័រ (គ្រឿងចក្រកាយដី) មានស្រុកកំណើតនៅភូមិគគីរធំ ស្រុកកៀនស្វាយ ខេត្តកណ្ដាល បាន គេចខ្លួនបាត់ ក្រោយពេលវាយប្រហារប្រពន្ធបណ្ដាលឲ្យរងរបួសធ្ងន់ធ្ងរហើយ នោះ។

បើតាមការឲ្យដឹងពីអ៊ំប្រុសឈ្មោះ ផឹង សាអាន អាយុ៧៤ឆ្នាំ ដែលត្រូវជាឪពុកបង្កើតរបស់នារី រងគ្រោះបានឲ្យដឹងថា កូនស្រីបន្ទាប់ពៅរូបនេះបានរៀបការជាមួយប្ដីគេឈ្មោះ សុខ មឿន ប្រហែល ៣ឆ្នាំហើយ តែលុះពេលពួកគេមានកូនប្រុសម្នាក់ដែលទើបបាន៦ខែ ពួកគេទាំងពីរនាក់ប្ដីប្រពន្ធបាន លែងលះចែកផ្លូវដោយសំរួលបញ្ចប់ត្រឹមភូមិប៉ុណ្ណោះ ដោយមូលហេតុកូនប្រសារគាត់រូបនោះ មាន ស្រីថ្មីទៀត ធ្វើឲ្យប្រពន្ធរបស់គេទ្រាំរស់នៅជាមួយលែងបាន។

ឪពុកបង្កើតរបស់ស្រ្តីរងគ្រោះបានឲ្យដឹងថា បន្ទាប់ពីពួកគេលែងគ្នារយៈពេល ជាង១ឆ្នាំមក ហើយ ស្រាប់តែប្រហែលជាកន្លះខែមុននេះ កូនប្រសារគាត់រូបនោះបានមកអង្វរគាត់រួមទាំងប្រពន្ធ ដើម្បីសុំមូលជានានឹងគ្នាវិញ ហើយគាត់ថាឪពុកម្ដាយក៏មិនយល់ទាស់អ្វីដែល ឲ្យតែកូនចេះទទួល កំហុសឈប់ធ្វើបាបប្រពន្ធកូនតទៅទៀតនោះ វាបានហើយ។ តែការមូលគ្នានោះ ក៏មិនមានបញ្ហាអ្វីដែរ ក្នុងក្រុមគ្រួសារគេ លុះដល់យប់កើតហេតុនោះ ពេលគាត់រួមទាំងប្រពន្ធគាត់និងកូនស្រី ផេ្សងទៀត បានរវល់ទៅចូលរួមពិធីមង្គលការក្មួយនៅឯឃុំកោះស្លាឯណោះ លុះព្រឹកថ្ងៃទី០៨ ខែកុម្ភៈនេះ ស្រាប់តែគេប្រាប់ថា កូនស្រីគាត់ដែលទើបមូលគ្នាជាមួយប្ដីត្រូវបានប្ដីវាយ បណ្ដាលឲ្យរង របួសយ៉ាងធ្ងន់ដេកសន្លប់ក្នុងថ្លុកឈាមលែងដឹងខ្លួនរហូតមក តែគាត់មិនដឹងថា កូនស្រីគាត់ត្រូវប្ដី វាយដោយរឿងអ្វីឡើយ។

បើតាមអ៊ំស្រីម្នាក់ជាអ្នកជិតខាងផ្ទះរបស់ជនរងគ្រោះបានឲ្យដឹងថា នៅវេលា ម៉ោងប្រហែល ១រំលងអាធ្រាត្រយប់កើតហេតុនេះ គេបានឮសម្លេងម៉ូតូ ដែលប្ដីរបស់ជនរងគ្រោះជិះចេញពីផ្ទះ បន្ទាប់ពីវាយប្រពន្ធបណ្ដាលឲ្យរងរបួសយ៉ាង ធ្ងន់ធ្ងរ ហើយធ្វើឲ្យកូនប្រុសរបស់ពួកគេ ដែលមានអាយុជាង១ឆ្នាំ គេឮសម្លេងយំរហូត តែគេមិនចាប់អារម្មណ៍ឡើយ លុះពេលម៉ោងប្រហែល៥ព្រឹក ថ្ងៃទី០៨នេះ គេបានឮសម្លេងកូនប្រុសគេរូបនោះ នៅតែយំអត់បាត់នោះ ទើបអ៊ំស្រីរូបនោះបានទៅ មើល ស្រាប់តែឃើញកូនក្មេងរូបនោះយំឱបម្ដាយ ដោយប្រឡាក់ឈាមពេញខ្លួន ចំណែកម្ដាយរបស់ គេត្រូវប្ដីវាយបែកក្បាលត្រង់លើចិញ្ចើមឆ្វេងសន្លប់ក្នុងថ្លុកឈាមលែងដឹងខ្លួនរហូតមក។ បន្ទាប់មក ក៏គាត់បានឆោឡោ ប្រាប់គេឯងក៏ដូចជាឲ្យគេទៅប្រាប់ឪពុកម្ដាយរបស់នាងមកមើលផងដែរ។

បើតាមក្រុមគ្រូពេទ្យកាល់ម៉ែត បានឲ្យដឹងថា ស្រ្តីរងគ្រោះរូបនោះមានលក្ខណៈធ្ងន់ធ្ងរណាស់ អាចប៉ះពាល់ដល់ខួរក្បាលទៀតផង ហើយក៏មិនសូវមានសង្ឃឹមផងដែរ តែទោះជាយ៉ាងណាក្រុម គ្រូពេទ្យកំពុងតែជួយសង្គ្រោះ។ តែជាអកុសល ស្រ្តីរងគ្រោះបានស្លាប់នៅវេលាម៉ោង១៤ និង៣០ នាទី ថ្ងៃទី០៨ ខែកុម្ភៈ ឆ្នាំ២០១០នេះបាត់ទៅហើយ៕

ព័ត៌មានថ្មីបំផុត

សំរាប់បុគ្គលិក

ព័ត៌មានស្ដីពីគ្រោះថ្នាក់ចរាចរនៅទូទាំងប្រទេសសម្រាប់ថ្ងៃទី០៤ ខែកញ្ញា ឆ្នាំ២០១០ មានចំនួន១០លើក ស្លាប់៤នាក់

ភ្នំពេញ ៖ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បានឲ្យដឹងថាគ្រោះថ្នាក់ចរាចរសម្រាប់ថ្ងៃទី៤ ខែកញ្ញា កើតឡើងចំនួន១០លើក បណ្ដាលឲ្យមនុស្សស្លាប់ ៤នាក់(ប្រុស) រងរបួសធ្ងន់៩នាក់(ប្រុស៧) របួសស្រាល៣នាក់(ប្រុស១)។ គ្រោះថ្នាក់ចរាចរសម្រាប់ថ្ងៃទី៤ ខែកញ្ញានេះ បើប្រៀបធៀបថ្ងៃទី៣ ខែកញ្ញាកន្លងទៅឃើញថា មានសភាពកើនឡើង២លើកនិងអ្នកស្លាប់មានការកើនឡើងម្នាក់៕