សៀមបង្កើនកំលាំងទ័ពច្រើនទៅៗប្រឈមជាមួយកម្ពុជាតាមព្រំដែន

ច័ន្ទ, 08 កុម្ភៈ 2010 20:00

ព្រះវិហារ ៖ ភាពតានតឹងនៅតាមព្រំដែនកម្ពុជា-សៀម កាន់តែក្ដៅទៅៗ ខណៈដែលដំណើរ ទស្សនកិច្ចត្រួតពិនិត្យកងទ័ពនៅតាមព្រំដែន របស់សម្ដេចនាយក រដ្ឋមន្ត្រី ហ៊ុន សែន មិនទាន់បញ្ចប់ នៅឡើយ។

ចាប់តាំងពីថ្ងៃទី០៦ ខែកុម្ភៈ ឆ្នាំ២០១០ នៃដំណើរទស្សនកិច្ចរបស់សម្ដេចតេជោ ហ៊ុន សែន តាមព្រំដែនចាប់ផ្ដើមមុនដំបូងនៅប្រាសាទព្រះវិហារ កងទ័ពសៀមដែលបានឈរជើងនៅព្រំដែន ទល់មុខប្រាសាទបានបង្កើនភាពតានតឹងខ្លាំង ឡើងៗ ដើម្បីរំខានដំណើរទស្សនកិច្ចរបស់សម្ដេច នាយករដ្ឋមន្ត្រី។ ថ្ងៃទី០៧ ខែកុម្ភៈ ដំណើរទស្សនកិច្ចលើកទី២ ទៅកាន់តំបន់មុំ៣ ខេត្តព្រះវិហារ ដដែលដែលជាតំបន់ព្រំដែន ប្រទេស៣ជាប់គ្នាកម្ពុជា-ថៃ-ឡាវ។ ភាពតានតឹងមិនសូវជាកើនឡើង ប៉ុន្មានទេ នៅចំណុចប្រសព្វគ្នារហូតដល់៣ប្រទេស។ ពួកទ័ពសៀមបានបញ្ជូនកំលាំងរបស់ខ្លួនតិច តួចទៅទីនោះ ហើយសុំការអនុញ្ញាតចូលជួបគួរសមជាមួយសម្ដេចផងដែរ តែមិនត្រូវបានអនុញ្ញាត ពីកងទ័ពកម្ពុជា។

ទស្សនកិច្ចលើកទី៣ នៅប្រាសាទតាមាន់ ថ្ងៃទី០៨ ខែកុម្ភៈម្សិលមិញនេះ ធ្វើឲ្យភាពតានតឹង ខ្លាំងខុសធម្មតានៅប្រាសាទតាមាន់ ។ សៀមបញ្ជូនកំលាំងច្រើនមកប្រាសាទតាមាន់គឺជាបំណងរំ ខានដំណើរទស្សនកិច្ចរបស់សម្ដេចឡើងមក លើប្រាសាទ។

ដោយមានស្ថានភាពមើលឃើញថាកាន់តែធ្ងន់ធ្ងរនៅចំណុចនោះ សម្ដេច នាយករដ្ឋមន្ត្រីបាន ទៅដល់កន្លែងប្រារព្ធកម្មវិធីនៅចំណុចកងពលតូចលេខ ៤២២ ដែលមានចំងាយពីភ្នំប្រាសាទ ប្រហែល៨គីឡូម៉ែត្រ។

លោកនាក់ វង្ស មេបញ្ជាការរងកងពលលេខ៤២ បានប្រាប់កម្ពុជាថ្មីថា នៅវេលាម៉ោង ៩និង២០នាទី ព្រឹកថ្ងៃទី០៨ ខែកុម្ភៈ ខណៈដែលសម្ដេចតេជោ ហ៊ុន សែន ថ្លែងសុន្ទរកថាទៅកាន់នាយទាហាន និងពលទាហាននៅជើងភ្នំ កងទ័ពសៀមជាង១០០នាក់ មានប៉ារ៉ា ពាក់កណ្ដាល ឈុតខ្មៅពាក់កណ្ដាលបានបញ្ជូនឡើងមកលើប្រាសាទតាមាន់ ប្រដាប់ដោយអាវុធគ្រប់ដៃ ក្នុងនោះ មានប្រភេទកាំភ្លើងយន្ត និងកាំភ្លើងផ្លោង។

លោកនាក់ វង្ស បាននិយាយថា ដើម្បីរក្សាភាពអត់ធ្មត់នៅខណៈពេលដែលដំណើរទស្សនកិច្ច របស់សម្ដេចនាយករដ្ឋមន្ត្រីយើងកងទ័ពកម្ពុជាបានដកថយ ក្រោយបន្តិចចៀសវាងការផ្ទុះអាវុធ។

មេបញ្ជាការកងទ័ពសៀមប្រចាំការនៅខ្សែត្រៀមជួរមុខប្រាសាទតាមាន់ បាន ប្រាប់កងទ័ព កម្ពុជាថាបទបញ្ជាដាច់ខាតរបស់ថ្នាក់លើគេប្រាប់ថា ប្រាសាទនេះជាកម្មសិទ្ធិរបស់ប្រទេសថៃមិន អនុញ្ញាតឲ្យនាយករដ្ឋមន្ត្រីខ្មែរចូល ទស្សនកិច្ចទេ។

មេបញ្ជាការរូបនោះប្រាប់ថា បើសិនជាប្រតិភូជាន់ខ្ពស់របស់កម្ពុជាចង់ចូលទៅ ទស្សនា ត្រូវ ធ្វើខ្លួនឲ្យទៅជាជនស៊ីវិលលក្ខណៈជាភ្ញៀវទេសចរ។ ហាមដាច់ខាតមិនឲ្យឯកសណ្ឋានទាហាន និង មានអាវុធចូលទេ។

រយៈពេល៤ម៉ោងកងទ័ពសៀម ប្រដាប់ដោយអាវុធគ្រប់ដៃចុងកាណុងភ្ជង់ សំដៅមកទឹកដី កម្ពុជាគ្រប់គ្រងលើប្រាសាទនេះ។ រហូតដល់មានការចរចាដើម្បីឲ្យពួកគេដកទៅវិញ។ នៅពេលដែលសុន្ទរកថារបស់សម្ដេចតេជោបញ្ចប់ នៅចន្លោះម៉ោង១០និង៣០នាទី ពួកទ័ពសៀមដែលជញ្ជូន កំលាំងថ្មីមកលើប្រាសាទនៅតែមិនដកដដែល។ ប៉ុន្តែ រហូតដល់ម៉ោង១និង៣០នាទី កងទ័ពទាំងនេះត្រូវបានដកថយទៅក្រោយវិញ។ លោកនាក់ វង្ស បាននិយាយថា បើតាមដឹងកងទ័ពសៀម ដែលត្រូវបានបញ្ជូនមកថ្មីទៀតនៅខាងក្រោយមិនតិច ជាង១០០០នាក់គាំទ្រដោយអាវុធធ្ងន់ និងកង រថក្រោះ។ តែឥឡូវកងទ័ពទាំងនោះបានដកផុតហើយ តែស្ថានការណ៍ប្រឈមមុខដាក់គ្នានៅតែមិន ទាន់ធូរស្រាលនៅឡើយទេ។

លោកមេបញ្ជាការទ័ពសៀម ភូមិភាគ២ លោកវីវ៉ាលីត បាននិយាយថា កងទ័ពគេដែលត្រូវ បានបញ្ជូនមកឈរជើងនៅប្រាសាទ ដើម្បីការពារពួកក្រុមបាតុករអាវលឿង ដែលដង្ហែក្បួនមកតវ៉ា ប្រឆាំងជាមួយនាយករដ្ឋមន្ត្រីហ៊ុន សែន នៅលើប្រាសាទនេះ។ លោកវីវ៉ាលីត និយាយថា កងទ័ព ក៏មានភារកិច្ចការពារប្រាសាទតាមាន់នេះផងដែរ ព្រោះប្រាសាទនេះជាកម្មសិទ្ធិរបស់ប្រទេសថៃ។

លោកម៉ែន វូយ មេបញ្ជាការកងពលលេខ៤២ និយាយថា ជាការពិតណាស់សកម្មភាពរបស់ កងទ័ពសៀមដែលបញ្ជូនមកលើប្រាសាទតាមាន់ គឺជាការរំខានដំណើរទស្សនកិច្ចរបស់នាយករដ្ឋ មន្ត្រីកម្ពុជាយើង។ នរណាក៏គេដឹងថា ប្រាសាទតាមាន់ធំស្ថិតនៅក្នុងបូរណភាពទឹកដីកម្ពុជា និងជា កម្មសិទ្ធិរបស់កម្ពុជាពិតប្រាកដដែលបានចែងនៅក្នុងអនុសញ្ញា និងសន្ធិសញ្ញាបារាំង-សៀម ឆ្នាំ១៩០៤-១៩០៧ និង១៩០៨៕