អេភូថង និងខុន រាជ ជួបប្រកួតជាមួយ ESTONIA ខណៈយុគ យក្សគីលជួប បារាំង

ព្រហស្បតិ, 04 កុម្ភៈ 2010 16:00

អេភូថង អ្នកប្រដាល់ជើងខ្លាំង នៅក្នុងសមាគមកីឡាក្រសួងការពារជាតិរបស់ព្រះរាជាណាចក្រកម្ពុជា នឹងត្រូវឡើងប្រកួត ជាមួយកីឡាករ LEBDEV HENRI មកពីប្រទេស ESTONIA។

អេភូថង និង LEBDEV HENRI ត្រូវប្រកួតនៅក្នុងប្រទេសទម្ងន់ ៧៨គ.ក្រ ដែលជាទម្ងន់មួយ ផ្ដល់ការលំបាកដល់អេភូថង ក្នុងការសម្រកទម្ងន់របស់ខ្លួន ព្រោះថាអេភូថង មានទម្ងន់ពិតប្រាកដ លើស៨០គ.ក្រ បន្តិចបន្តួច។ ដូច្នេះ អេភូថង ទាមទារត្រូវហ្វឹកហាត់ឲ្យបានច្រើនមែនទែន ទើបអាច ស្រកមកនៅទម្ងន់៧៨គ.ក្រនេះបាន។

ការជួបប្រកួតជាមួយ LEBDEV HENRI នេះ អេភូថងមានតែពឹងផ្អែកលើកណ្ដាប់ដៃ និងជើង ទាត់តែប៉ុណ្ណោះ ឯការប្រើកែង និងជង្គង់បែបមិនអាចទៅរួចបានទៀតទេ ព្រោះគេមិនអាចចាប់គូប្រ កួតជាប់ដូចមុនទេ។ អេភូថង ក្រោយគ្មានដៃគូប្រកួត គេបានទៅហ្វឹកហាត់ប្រដាល់សាកល ហើយ ទទួលបានមេដាយសំរិទ្ធ នៅក្នុងការប្រកួតកីឡាស៊ីហ្គេម លើកទី២៥ នៅប្រទេសឡាវ កាលពីដើម ខែធ្នូ ឆ្នាំ២០០៩កន្លងមក។

ខុនរាជ អ្នកប្រដាល់ជើងខ្លាំងនៃក្លឹបកងពលតូចអន្តរាគមន៍លេខ៨ ត្រូវជួបជាមួយ MARCO អ្នកប្រដាល់មកពីប្រទេស ESTONIA ដែរ។ គេទាំងពីរនាក់នេះ ប្រកួតគ្នាក្នុងប្រភេទទម្ងន់ ៦៧គ.ក្រ។

យុគ យក្សគីល អ្នកប្រដាល់ក្លឹបក្រុងប៉ោយប៉ែត ខេត្តបន្ទាយមានជ័យ នឹងជួបប្រកួតជាមួយ SEBASTIAN អ្នកប្រដាល់មកពីប្រទេសបារាំង ក្នុងប្រភេទទម្ងន់ ៦៧គ.ក្រដែរ។ យក្សគីលនេះ គេក៏ មិនធ្លាប់ដែលប្រកួតជាមួយអ្នកប្រដាល់បរទេសដែរ៕