នគរបាលខណ្ឌចំការមន ឆ្មក់បង្ក្រាបទីតាំងបើក​ល្បែងស៊ីសងអនឡាញលើអគារ៣៤ជាន់ ឃាត់ខ្លួនមនុស្ស៨០នាក់

កម្លាំងគណៈបញ្ជាការឯកភាពរដ្ឋបាលខណ្ឌចំការមន បើកប្រតិបត្តិការចុះបង្ក្រាបទីតាំងល្បែងស៊ីសងអនឡាញខុសច្បាប់នៅលើអគារជាន់ទី៣៤មួយកន្លែង ឃាត់ខ្លួនជនសង្ស័យ ៨០នាក់ មាន០៧សញ្ជាតិ។

ប្រតិបត្តិការបង្ក្រាបនេះ បានធ្វើឡើងកាលពីវេលាម៉ោង០៤ល្ងាច ថ្ងៃទី១១ ខែតុលា ឆ្នាំ២០២៥ ស្ថិតនៅចំណុចអគារ​MORGAN TOWER ជាន់ទី៣៤ ផ្លូវកោះពេជ្រ សង្កាត់ទន្លបាសាក់ ខណ្ឌចំការមន រាជធានីភ្នំពេញ ។

តាមការបញ្ជាក់ពីសមត្ថកិច្ចបានអោយដឹងថា មុនឈានដល់ការចុះបង្រ្កាប កម្លាំងជំនាញបានធ្វើការស្រាវជ្រាវចំណុចអគារខាងលើ និងសង្ស័យថា មានការលួចលាក់ប្រព្រឹត្តបើកល្បែងសុីសងអនឡាញ ដែលជាអំពើល្មើសច្បាប់។ ជាក់ស្តែងពេលសមត្ថកិច្ចចុះមកដល់ទីតាំងខាងលើ បានត្រួតពិនិត្យរកឃើញមានមនុស្សជាច្រើនកំពុងបម្រើការងារនៅចំណុចជាន់ទី៣៤ សរុប ៨០នាក់ មានស្រ្តី ១៥នាក់ និងមាន ០៧សញ្ជាតិ។

បើតាមសមត្ថកិច្ច ជនសង្ស័យទាំង ៨០នាក់ទាំងនោះ មានជនជាតិចិន ៥៧នាក់(ស្រ្តី ០៤នាក់) ,នេប៉ាល់ ០២នាក់, ម៉ាឡេស៊ី ០២នាក់ (ស្រ្តី ០២នាក់) ,វៀតណាម ០២នាក់(ស្រ្តី ០១នាក់ ), មីយ៉ាន់ម៉ា ០៩នាក់(ស្រ្តី ០៩)  និងស្រ្តីជនជាតិខ្មែរ០៥នាក់ និងដកហូតវត្ថុតាងរួមមាន ម៉ូនីទ័រ ២០៤គ្រឿង, ធុងCPU ១២៨គ្រឿង, និងកុំព្យូទ័រយួរដៃ ០៣គ្រឿង។

ក្រុមជនសង្ស័យត្រូវបានកម្លាំងសមត្ថកិច្ចនាំខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី៕

អត្ថបទ៖ រដ្ឋា