ថ្នាក់ដឹកនាំខេត្តឡឹមដុង(វៀតណាម) សន្យានឹងជំរុញវិនិយោគិនមកវិនិយោគក្នុងខេត្តមណ្ឌលគិរី

លោក ផាម ធីផុក អនុលេខាបក្សខេត្ត និងជាប្រធានគណរណសិរ្សមាតុភូមិវៀតណាមខេត្តឡឹមដុង បានសន្យានឹងកៀរគរវិនិយោគិន មកវិនិយោគក្នុងខេត្តមណ្ឌលគិរី ដើម្បីលើកស្ទួយសេដ្ឋកិច្ចព្រំដែន ឱ្យកាន់តែរីកចម្រើនបន្ថែមទៀត។

ការអះអាងនេះ ធ្វើឡើងឱកាសលោកស្រី ផាម ធីផុក បានដឹកនាំគណៈប្រតិភូវៀតណាម មកជូនពរកម្ពុជាក្នុងឱ្យកាសខួបអនុស្សាវរីយ៍លើកទី៧២ នៃទិវាបុណ្យឯករាជ្យជាតិ ៩វិច្ឆិកា (៩ វិច្ឆិកា ១៩៥៣-៩ វិច្ឆិកា ២០២៥) និងបានពិភាក្សាការងារជាមួយ លោក ថង សារុន អភិបាលខេត្តមណ្ឌលគិរី ដើម្បីពង្រឹងសហប្រតិបត្តិការមិត្តភាពររវាងប្រទេសទាំងពីរ។នេះបើតាមលោក នាង វណ្ណៈ អ្នកនាំពាក្យសាលាខេត្តមណ្ឌលគិរីបានប្រាប់«កម្ពុជាថ្មី»នៅថ្ងៃទី១០ខែវិច្ឆិកានេះ។

ក្នុងជំនួបពិសេសនោះ លោកស្រី ផាម ធីផុក បានជូនពរដល់កម្ពុជា ក្នុងឱ្យកាសខួបអនុស្សាវរីយ៍លើកទី៧២ នៃទិវា​បុណ្យឯករាជ្យជាតិ ៩វិច្ឆិកា នៃការរំដោះប្រទេសឱ្យរួចផុតពីរបបអាណានិគមនិយមបារាំង។ ជំនួបនាពេលនេះ ក៏ដើម្បីបន្តពង្រឹងសហប្រតិបត្តិការទាំងសន្តិសុខសណ្តាប់ធ្នាប់និងអភិវឌ្ឍសេដ្ឋកិច្ចផ្អែកទៅលើ អនុស្សរណៈរវាងរដ្ឋាភិបាលនៃប្រទេសទាំងពីរឱ្យកាន់តែដល្អប្រសើទ្វេដងបន្ថែមទៀត។

ដោយសារខេត្តចំនួនបីនៃប្រទេសវៀតណាម ទើបតែបង្រួមឱ្យប្រែក្លាយជាខេត្តតែមួយគឺខេត្តឡឹមដុង(ថ្មី) ដែលមានផ្ទៃធំទូលាយ និងមានប្រជាជនជាង៣លាននាក់ និងសម្បូរទៅដោយវិនិយោគិនប្រមាណ ៣០ម៉ឺននាក់ កំពុងតែវិនិយោគនៅក្នុងខេត្តថ្មីនេះនាពេលបច្ចុប្បន្ន លោកស្រី បញ្ជាក់ទៀតថា នឹងកៀរគរវិនិយោគិនមកសហការនិងវិនិយោគក្នុងខេត្តមណ្ឌលគិរី។ លោកស្រីបញ្ជាក់ថា៖« ក្នុងនាម ប្រទេសជិតខាងនឹងបន្តកិច្ចសហប្រតិបត្តិការ នឹងជំរុញវិនិយោគិនទាំងនោះឱ្យមកសហការជាមួយខេត្តមណ្ឌលគិរី ធ្វើយ៉ាងណាដើម្បី លើកស្ទួយសេដ្ឋកិច្ចប្រទេសទាំងពីរ ឱ្យកាន់តែរីកចម្រើនបន្ថែមទៀត»។

នាឱកាសនោះ លោក ថង សាវុន អភិបាលខេត្តមណ្ឌលគិរី ក៏បានលើកឡើងពីយុទ្ធសាស្រ្តរបស់រាជរដ្ឋាភិបាលកម្ពុជា ដោយបានកំណត់គោលដៅជំរុញការអភិវឌ្ឍសេដ្ឋកិច្ចទៅកាន់ភូមិភាគឦសាន។ លោកថ្លែងថា៖«ក្នុងនោះខេត្តមណ្ឌលគិរី បានកំណត់គោលដៅអភិវឌ្ឍ ព្រោះខេត្តនេះសម្បូរទៅដោយសក្ដានុពល ទាំងវិស័យទេសចរណ៍ឧស្សាហកម្ម និងកសិកម្ម។ ដូច្នេះខេត្តក៏មានតម្រូវការវិនិយោគិនជាច្រើនដើម្បី ធ្វើការវិនិយោគ អភិវឌ្ឍខេត្តឱ្យមានការរីកចម្រើនក៏ដូចជាលើកស្ទួយសេដ្ឋកិច្ចជាតិមួយកម្រិតទៀតផងដែរ»។

គណៈប្រតិភូនៃថ្នាក់ដឹកនាំខេត្តទាំងពីរ បានប្ដេជ្ញាចិត្តនឹងបន្តពង្រឹងសហប្រតិបត្តិការរួមគ្នា ក៏ដូចជាចូលរួមលើកស្ទួយសេដ្ឋកិច្ចនៃប្រទេសទាំងពីរ ជាពិសេសនោះនៅតាមខ្សែបន្ទាត់ព្រំដែនឱ្យកាន់តែល្អប្រសើរទ្វេដងបន្ថែមទៀត៕

អត្ថបទ៖ រៀម សុខហេង