គ្រូបង្វឹក ហុងកុង ថា ខកចិត្ត ក្រោយមិនអាចយកឈ្នះ កម្ពុជា យប់មិញបាន

គ្រូបង្វឹកក្រុមជម្រើសជាតិ ហុងកុង លោក Ashley Westwood បានសម្តែងការខកចិត្ត ក្រោយមិនអាចយកឈ្នះលើក្រុមជម្រើសជាតិ កម្ពុជា នៅទឹកដីរបស់ខ្លួនឯង សម្រាប់ការប្រកួតមិត្តភាពកម្តៅសាច់ដុំ កាលពីយប់ថ្ងៃ ព្រហស្បតិ៍ ទី ១៣ ខែ វិច្ឆិកា ឆ្នាំ ២០២៥។

នៅក្នុងការប្រកួត ដែលធ្វើឡើងនៅទឹកដី ហុងកុង យប់មិញ ក្រុមជម្រើសជាតិ ហុងកុង បានបញ្ចប់ការប្រកួត ៩០ នាទីពេញជាមួយក្រុមគោព្រៃ កម្ពុជា ដោយលទ្ធផលស្មើគ្នា ១ ទល់នឹង ១។ ក្រុមម្ចាស់ផ្ទះ ហុងកុង បានបើកការនាំមុខមុន ដែលស៊ុតបញ្ចូលទីដោយកីឡាករ Wong Wai នៅនាទីទី ៣១។ លុះរំលង ២ នាទី នៅនាទីទី ៣៣ ក្រុម កម្ពុជា រកបានគ្រាប់បាល់តាមស្មើមកវិញ ដែលតែតបញ្ចូលទីដោយខ្សែការពារ សារ៉េត គ្រីយ៉ា។

ក្រោយបញ្ចប់ការប្រកួត ដោយលទ្ធផលស្មើគ្នា ១-១ បែបនេះ គ្រូបង្វឹក ហុងកុង លោក Ashley Westwood ​បាន​និយាយ​ក្នុងសន្និសីទសារព័ត៌មាន ថា៖ «ពួកយើង​ខកចិត្ត ដែលមិនបានទទួលជ័យជម្នះ ប៉ុន្តែអ្វីដែលពួកយើងត្រូវការ គឺការកម្តៅសាច់ដុំដ៏ល្អ ដែល កម្ពុជា បានផ្តល់ឱ្យពួកយើង»។

លោក Ashley Westwood បានបន្ត ថា៖ «ពួកគេផ្តល់ឱ្យពួកយើងនូវបញ្ហាមួយចំនួន និងរឿងមួយចំនួនដើម្បីគិត។ […] ពួកយើងចង់បញ្ជាក់រឿងមួយចំនួន ហើយស្វែងរកទម្រង់លេងឱ្យបានល្អបំផុត ដើម្បីទទួលបានលទ្ធផលល្អទល់នឹងក្រុមជម្រើសជាតិ សិង្ហបុរី»៕

គួរឱ្យដឹងថា ហុងកុង អញ្ជើញ កម្ពុជា ប្រកួតមិត្តភាពកាលពីយប់មិញ ក្នុងគោលបំណងដើម្បីត្រៀមខ្លួនការប្រកួតជាមួយក្រុមជម្រើសជាតិ សិង្ហបុរី នាថ្ងៃទី ១៨ ខែ វិច្ឆិកា ឆ្នាំ ២០២៥ ក្នុងវគ្គជម្រុះពាន AFC Asian Cup៕

ប្រែសម្រួល៖ សេម កុសល
ប្រភព៖ My News