Connect with us

ព័ត៌មានអន្ដរជាតិ

Air Force One ដឹកលោកត្រាំ ទៅស្វីស មានបញ្ហាប្រព័ន្ធអគ្គិសនីលើអាកាស ត្រូវហោះបកទៅ វ៉ាស៊ីនតោនវិញ

បានផុស

នៅ

យន្តហោះ Air Force One ដែលដឹកប្រធានាធិបតីអាមេរិក ដូណាល់ ត្រាំ ធ្វើដំណើរទៅកាន់ប្រទេសស្វីស ដើម្បីចូលរួមវេទិកាសេដ្ឋកិច្ចពិភពលោក (WEF) ត្រូវហោះបកទៅទីក្រុងវ៉ាស៊ីនតោន ដោយសារតែបញ្ហាប្រព័ន្ធអគ្គិសនី។ នេះបើតាមការផ្សាយរបស់ FOX នៅថ្ងៃពុធទី២១ខែមករាឆ្នាំ២០២៦។

យន្តហោះ Air Force One (រូបថត៖ Reuters)

ដ្បិតគ្មានការទម្លាយព័ត៌មានលម្អិតអំពីរឿងនេះ ប៉ុន្តែអ្នកកាសែតនៅលើយន្តហោះ បានឲ្យដឹងថា ភ្លើងនៅក្នុងបន្ទប់របស់អ្នកសារព័ត៌មានបានរលត់មួយភ្លែត បន្ទាប់ពីយន្តហោះហោះឡើងបានបន្តិច។ លុះពេលយន្តហោះ ហោះបានប្រហែលកន្លះម៉ោង អ្នកសារព័ត៌មានទាំងអស់ ត្រូវគេប្រាប់ថា យន្តហោះនឹងបកត្រឡប់ក្រោយវិញ។ 

យ៉ាងណាក្តី លោកត្រាំ បានឡើងយន្តហោះមួយគ្រឿងទៀត ហើយធ្វើដំណើរទៅកាន់ប្រទេសស្វីស ធម្មតា។

យន្តហោះ Air Force One (រូបថត៖ Reuters)

លោក ត្រាំ ធ្លាប់សម្តែងការខកចិត្តចំពោះការពន្យារពេលក្នុងការផ្តល់យន្តហោះ 747-8 ចំនួនពីរ​គ្រឿង ដើម្បីបម្រើ​ការ​ជាយន្តហោះ Air Force One ថ្មី ព្រោះ Air Force One ប្រើសព្វថ្ងៃហាក់ចាស់ណាស់ទៅហើយ។

ក្រោយមកមានសេចក្តីរាយការណ៍ថា លោកត្រាំ ព្រមទទួលយកយន្តហោះ Boeing 747-8 ដ៏​ប្រណិត​មួយ​គ្រឿង​​ពី​ខ្សែ​រាជវង្សកាតា ក្នុង​​បំណង​យក​ទៅ​បម្រើការ​បណ្តោះអាសន្នជា​យន្តហោះ Air Force One។

យន្តហោះ Air Force One (រូបថត៖ Reuters)

យន្តហោះ​នេះ មានតម្លៃប្រហែល ៤០០​លានដុល្លារ និងត្រូវបានគេដាក់ឈ្មោះថា «រាជវាំង​លើ​អាកាស (Flying Palace)»។ វា​នឹងត្រូវប្រើប្រាស់​ជាបណ្ដោះ​អាសន្ន​សម្រាប់​ដឹក​ប្រធានាធិបតី​អាមេរិក ខណៈ​យន្តហោះ​ Air Force One ផ្លូវការ​​ដែល​ផលិត​ដោយ​ក្រុមហ៊ុន Boeing ត្រូវ​បាន​​ពន្យារ​​ពេល​​ដឹក​ជញ្ជូន។

បន្ទាប់ពី​ចប់​អាណត្តិ លោក ត្រាំ គ្រោងនឹងផ្ទេរយន្តហោះ​ដែល​ជា​អំណោយ​របស់​​កាតា​នេះ​ទៅ​ឲ្យ​​អង្គការ​មូលនិធិបណ្ណាល័យប្រធានាធិបតី៕

អត្ថបទ៖ សុខ សុវណ្ណ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម