​អនុរដ្ឋមន្ត្រីរុស្ស៊ី​ ចោទ​អឺរ៉ុប​ថា ធ្វើឲ្យ​ការ​ចរចា​សន្តិភាព​រុស្ស៊ី-អ៊ុយក្រែន​ជាប់​គាំង​​

នៅក្នុងបទសម្ភាសន៍ជាមួយទីភ្នាក់ងារសារព័ត៌មាន​​រុស្ស៊ី​ TASS កាលថ្ងៃទី ១៩ខែកុម្ភៈ អនុរដ្ឋមន្ត្រីការបរទេសរុស្ស៊ី ​លោក Alexander Grushko បានធ្វើការរិះគន់យ៉ាងខ្លាំងចំពោះតួនាទីរបស់ប្រទេសលោកខាងលិចនៅក្នុង​វិបត្តិ​រុស្ស៊ី​និង​អ៊ុយក្រែន​នាពេល​បច្ចុប្បន្ន​។ លោក​បញ្ជាក់ថា អឺរ៉ុបមិនមានសុច្ឆន្ទៈក្នុងការបញ្ចប់ជម្លោះនោះទេ ប៉ុន្តែគ្រាន់តែចង់ឲ្យការប្រយុទ្ធបន្តឲ្យបានយូរ ដោយអូសបន្លាយតាមដែលអាចធ្វើទៅបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកការទូតជាន់ខ្ពស់រុស្ស៊ីរូប​​នេះ​ បានវាយតម្លៃថា រហូតមកដល់ពេលនេះ ទីក្រុងមូស្គូមិនទាន់បានឃើញការចូលរួមចំណែកស្ថាបនាជាក់ស្តែងណាមួយពីបណ្តាប្រទេសនៅអឺរ៉ុបនៅឡើយទេ។ ផ្ទុយទៅវិញ ជំហរដ៏រឹង​ត្អឹង​​ និងលំអៀងរបស់បស្ចឹមប្រទេស​ បានធ្វើឲ្យកិច្ចខិតខំប្រឹងប្រែងផ្សះផ្សាទាំងអស់​​ជាប់គាំង​។

អនុរដ្ឋមន្ត្រីការបរទេសរុស្ស៊ី បាន​ទាញ​ចំណាប់អារម្មណ៍ថា ប្រសិនបើក្រឡេកមើលចលនាជាក់ស្តែងនៅលើឆាកអន្តរជាតិ ​គេ​អាចមើលឃើញថា អឺរ៉ុបកំពុងធ្វើអ្វីគ្រប់យ៉ាង ប្រឆាំងនឹងបំណងប្រាថ្នាចង់ស្តារសន្តិភាពនៅអ៊ុយក្រែនឡើងវិញ។ គោលនយោបាយពិតប្រាកដរបស់ពួកគេ គឺធ្វើឲ្យជម្លោះកាន់តែអូសបន្លាយ ដើម្បីទប់ស្កាត់ ឬធ្វើឲ្យវាកាន់តែលំបាកតាមដែលអាចធ្វើទៅបានក្នុងការឈានដល់កិច្ចព្រមព្រៀងសន្តិភាព។

លោក Grushko បានចង្អុលបង្ហាញបន្ថែមទៀតថា សកម្មភាពរារាំងទាំងនេះរួមមានការផ្តល់កញ្ចប់ជំនួយយ៉ាងច្រើនជាបន្តបន្ទាប់ទាក់ទងនឹងនយោបាយ សេដ្ឋកិច្ច ហិរញ្ញវត្ថុ និងជាពិសេសជំនួយយោធាដល់រដ្ឋាភិបាល​អ៊ុយក្រែន​។ ទីក្រុងមូស្គូបានចាត់ទុកជាយូរមកហើយថា ការ​បញ្ជូនអាវុធ និងគ្រាប់រំសេវជាបន្តបន្ទាប់របស់លោកខាងលិចទៅកាន់អ៊ុយក្រែន ជាមូលហេតុចម្បងនៃភ្លើងជម្លោះដែលបន្តឆាបឆេះយ៉ាងសាហាវនិងកាន់តែអូសបន្លាយ។

លើសពីនេះ អនុរដ្ឋមន្ត្រីការបរទេសរុស្ស៊ីក៏បានបដិសេធដាច់​អហង្ការ​ថា ចំពោះលក្ខខណ្ឌជាមុនដែលលោកខាងលិចបានកំណត់សម្រាប់កិច្ចព្រមព្រៀងសន្តិភាព។ លោកថា សំណើពីអឺរ៉ុបគឺឯកតោភាគី ហើយមិនអើពើទាំងស្រុងចំពោះរុស្ស៊ី។ គ្មាននរណាម្នាក់នៅអឺរ៉ុបនិយាយអំពីរូបមន្តសន្តិភាពដែលរួមបញ្ចូលការប្តេជ្ញាចិត្តដើម្បីធានាសន្តិសុខរឹងមាំ និងអាចទុកចិត្តបានសម្រាប់ប្រទេសរុស្ស៊ីនោះទេ។ ដូច្នេះវាត្រូវតែបញ្ជាក់ជាថ្មីថា នេះគឺជាលក្ខខណ្ឌស្នូល និងសំខាន់សម្រាប់ដំណោះស្រាយណាមួយដើម្បីបញ្ចប់ជម្លោះនៅអ៊ុយក្រែន។

ការចោទប្រកាន់ពីក្រសួងការបរទេសរុស្ស៊ី ត្រូវបានធ្វើឡើងនៅក្នុងបរិបទដែលកិច្ចខិតខំប្រឹងប្រែងចរចាការទូត ជាពិសេសការពិភាក្សាជុំចុងក្រោយនៅទីក្រុងហ្សឺណែវ នៃប្រទេសស្វីស នៅតែជាប់គាំង​​នៅឡើយ​ ខណៈដែលអ៊ុយក្រែន និងលោកខាងលិចបដិសេធយ៉ាងដាច់អហង្ការ ចំពោះការទាមទាររបស់ពួកគេសម្រាប់​កា​រធ្វើ​សម្បទាន​ណាមួយ​នោះ​ ចំណែកឯទីក្រុងមូស្គូវិញ​ក៏មិនថយក្រោយក្នុងការទាមទាររបស់ខ្លួន សម្រាប់កន្លែងសន្តិសុខជាយុទ្ធសាស្ត្រដែរ ដែលធ្វើឲ្យរូបភាពសន្តិភាពទាំងមូលនៅតែអាប់អួរយ៉ាងខ្លាំង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កាណាដា និងអូស្ត្រាលី ជំរុញវិស័យការពារជាតិខ្លួនឯង ដោយលែងពឹងផ្អែកអាមេរិក