ព័ត៌មានអន្ដរជាតិ

ចិនប្រាប់រុស្ស៊ីថា ការវាយប្រហាររបស់អាមេរិកនិងអ៊ីស្រាអែលលើអ៊ីរ៉ង់ មិនអាចទទួលយកបានទេ

បានផុស

៣ ខែ មុន

នៅ

ថ្ងៃចន្ទ ២ មីនា ២០២៦

ដោយ

រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយនៅថ្ងៃអាទិត្យថា ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់គឺមិនអាចទទួលយកបានទេ ខណៈប្រទេសចិនអំពាវនាវឱ្យមានបទឈប់បាញ់ជាបន្ទាន់និងបន្តកិច្ចចរចាឡើងវិញ ដើម្បីទប់ស្កាត់ជម្លោះក្នុងតំបន់កាន់តែខ្លាំង។

រដ្ឋមន្ត្រីការបរទេសចិន លោក វ៉ាង យី! រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន Xinhua របស់រដ្ឋប្រទេសចិនកាលពីថ្ងៃអាទិត្យ ថ្ងៃទី០១ ខែមីនា, លោក វ៉ាង ប្រាប់រដ្ឋមន្ត្រីការបរទេសរុស្ស៊ី លោក Sergei Lavrov តាមទូរស័ព្ទថា៖«ការសម្លាប់មេដឹកនាំនៃរដ្ឋអធិបតេយ្យដោយចេតនា និងញុះញង់ឱ្យមានការផ្លាស់ប្តូររបបគឺមិនអាចទទួលយកបានទេ»។

សហរដ្ឋអាមេរិក និងអ៊ីស្រាអែល បានវាយប្រហារលើរបបដឹកនាំអ៊ីរ៉ង់ នៅព្រឹកថ្ងៃសៅរ៍ ដោយបានសម្លាប់មេដឹកនាំកំពូលអ៊ីរ៉ង់ លោក អាលី ខាមេនី (Ali Khamenei)។

លោក វ៉ាង បានបន្តថា ប្រទេសចិនចង់បានការបញ្ឈប់សកម្មភាពយោធាដ៏ឃោរឃៅនេះជាបន្ទាន់ និងការវិលត្រឡប់ទៅរកការសន្ទនាវិញឱ្យបានឆាប់តាមដែលអាចធ្វើទៅបាន។

យ៉ាងណាមិញ នៅថ្ងៃអាទិត្យស្ថានទូតចិនប្រចាំអ៊ីស្រាអែលបានណែនាំប្រជាជនរបស់ខ្លួនឱ្យជម្លៀសទៅកាន់តំបន់ដែលមានសុវត្ថិភាព ក្នុងប្រទេស ឬចាកចេញទៅកាន់ប្រទេសអេហ្ស៊ីបតាមរយៈច្រកព្រំដែនតាបា។

ក្រសួងការបរទេសចិនលើកឡើងថា ពលរដ្ឋចិនបានរងរបួសនៅក្នុងការវាយប្រហារនេះ ហើយពួកគេមួយចំនួនបានជាប់គាំង ដោយព្រមានជនជាតិចិនកុំឱ្យធ្វើដំណើរទៅកាន់តំបន់នេះឱ្យសោះ។

ក្នុងការអត្ថាធិប្បាយមួយកាលពីថ្ងៃអាទិត្យ ទីភ្នាក់ងារសារព័ត៌មាន Xinhua បានរិះគន់ការវាយប្រហារនេះ ដោយហៅថា៖ «ជាការឈ្លានពានដ៏ឃោរឃៅប្រឆាំងនឹងប្រទេសអធិបតេយ្យនិងជាការត្រួតត្រាដោយអំណាចនយោបាយ»។

ភ្នាក់ងារ Xinhua បន្តថា៖ «ការប្រើប្រាស់កម្លាំងយោធារបស់ទីក្រុងវ៉ាស៊ីនតោន គឺជាការរំលោភបំពានយ៉ាងធ្ងន់ធ្ងរលើគោលការណ៍ធម្មនុញ្ញអង្គការសហប្រជាជាតិ និងជាការចាកចេញពីបទដ្ឋានជាមូលដ្ឋាននៃទំនាក់ទំនងអន្តរជាតិ»។

គួរបញ្ជាក់ថា ជម្លោះនេះបណ្តាលឱ្យមានការរំខាន និងការលុបចោលជើងហោះហើរយ៉ាងច្រើន៕

ប្រែសម្រួល៖ ណឺ មិនា

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា