ហ្វីលីពីនឱ្យបុគ្គលិករដ្ឋទៅធ្វើការ​ត្រឹម ៤ថ្ងៃ/​សប្តាហ៍ ​ដើម្បីដោះស្រាយបញ្ហាប្រេង​ឡើងថ្លៃ

ប្រទេសក្សត់ប្រេង ហី្វលីពីន គ្រោង​កាត់បន្ថយថ្ងៃទៅធ្វើការងារនៅការិយាល័យសម្រាប់បុគ្គលិករដ្ឋ មកត្រឹម ៤ ថ្ងៃ ក្នុង ១ សប្ដាហ៍ ដើម្បីឆ្លើយតបទៅនឹង​ការហក់ឡើងនៃតម្លៃប្រេងដោយសារតែសង្រ្គាមអ៊ីស្រាអែល/សហរដ្ឋអាមេរិក និងអ៊ីរ៉ង់។ នេះបើតាមការឱ្យដឹងរបស់លោកប្រធានាធិបតី ហ្វឺរឌីណង់ ម៉ាកូស (Ferdinand Marcos) កាលពី​សប្ដាហ៍មុន​។

លោក ម៉ាកូស បាន​គូសបញ្ជាក់ថា ការផ្លាស់ប្ដូរនេះ នឹងអនុវត្តចំពោះការិយាល័យការងាររដ្ឋទាំងអស់ដោយចាប់ផ្ដើមពីថ្ងៃចន្ទនេះតទៅ ហើយវាគឺជាផ្នែកមួយនៃវិធានការឆ្លើយតបរបស់រដ្ឋាភិបាល ដើម្បីបន្ធូរបន្ថយភាពតានតឹងផ្នែកសេដ្ឋកិច្ចដោយសារតែជម្លោះនៅមជ្ឈិមបូព៌ា។

លោកបាន​ព្រមានថា ការបិទច្រកហ័រមូហ្ស (Hormuz) ដែលជាផ្លូវដឹកប្រេងប្រមាណ ២០% នៃតម្រូវការពិភព​លោក​ អាចធ្វើឱ្យតម្លៃប្រេងសាំងកន្លែងស្ថានីយចាក់សាំងក្នុងស្រុកហ្វីលីពីន កើនដល់ ៧,៤៨ ប៉េសូ(០,១២ ដុល្លារ)/លីត្រ ១៧,២៨ ប៉េសូ/លីត្រ សម្រាប់ប្រេងម៉ាស៊ូត និង ៣២,៣៥ ប៉េសូ/លីត្រ សម្រាប់ប្រេងសាំង Kerosene។

លោក​បាន​និយាយនៅក្នុងសេចក្ដីថ្លែងការណ៍មួយ​កាលពីថ្ងៃសុក្រ យ៉ាងដូច្នេះថា៖ «យើងគឺជាជនរងគ្រោះនៃសង្រ្គាម ដែលយើងមិនបាន​ជ្រើសរើស»។ លោកបន្ថែមថា គេមិនច្បាស់ថាវានឹងបញ្ចប់ពេលណាទេ ប៉ុន្តែ «យើងគ្រប់គ្រងពីរបៀបដែលយើងការពារប្រជាជនហ្វីលីពីន»។ ​

​គួរគូសបញ្ជាក់ថា ហ្វីលីពីននាំចូលប្រេងឆៅភាគច្រើនរបស់ខ្លួនពីមជ្ឈិមបូព៌ា ហើយនៅតែពឹងផ្អែកលើរោងចក្រថាមពល ដែលដំណើរការដោយប្រេងដើម្បីបង្កើតអគ្គិសនី។ សង្គ្រាម​​មជ្ឈិមបូព៌ា ក៏គំរាមកំហែងដល់សុវត្ថិភាព និងសន្តិសុខការងាររបស់ប្រជាជនហ្វីលីពីនជាង ២ លាននាក់ ដែលកំពុង​ធ្វើការនៅមជ្ឈិមបូព៌ាផងដែរ។

លោក ម៉ាកូស ​ក៏​បានបញ្ជាឱ្យភ្នាក់ងាររដ្ឋាភិបាលទាំងអស់កាត់បន្ថយការប្រើប្រាស់ប្រេងឥន្ធនៈ និងថាមពលរបស់ពួកគេ​ចន្លោះពី ១០-២០% ​បិទ​ដំណើរទស្សនកិច្ចសិក្សារបស់រដ្ឋាភិបាល និងសកម្មភាពកសាងក្រុមផ្សេងៗ​ ក៏ដូចជា «បើកកិច្ចប្រជុំនានា​តាមអនឡាញតាមដែលអាចធ្វើបាន»។

លោកបានជំរុញឱ្យសភា​បើកផ្លូវឱ្យលោកកាត់បន្ថយពន្ធលើផលិតផលប្រេងឥន្ធនៈ ប្រសិនបើតម្លៃប្រេងឆៅឡើងដល់ ៨០ ដុល្លារ​/បារ៉ែល ​ក៏ដូចជាធ្វើវិសោធនកម្មច្បាប់ប្រេងឥន្ធនៈជីវ​ ដើម្បីឱ្យ​ថ្លៃអេតាណុលជីវចុះថោក ហើយអាច​ប្រើសម្រាប់លាយជាមួយផលិតផលប្រេងឥន្ធនៈ។ ​​

តម្លៃប្រេងឆៅអន្តរជាតិម៉ាក Brent និង WTI គិតត្រឹមថ្ងៃចន្ទ (៩ មីនា) បាន​កើនឡើងដល់ជិត ១២០ ដុល្លារ/បារ៉ែល រួចទៅហើយ៕