អ៊ីរ៉ង់ ប្រាប់ទៅអាមេរិក ថា៖ «ពេលនេះមិនមែនជាពេលត្រូវចរចាគ្នាទេ»

បន្ទាប់ពីលេចឮព័ត៌មានអំពីការបញ្ជូនផែនការ១៥ចំណុចរបស់អាមេរិក ដើម្បីបញ្ចប់សង្គ្រាមជាមួយអ៊ីរ៉ង់មក ឥឡូវទីក្រុងតេហេរ៉ង់ បានចេញមុខបញ្ជាក់យ៉ាងច្បាស់ទៅវិញថា៖ «ពេលនេះ មិនមែនជាពេលត្រូវចរចាគ្នាទេ»។

សម្តីនេះគឺចេញពីមាត់រដ្ឋមន្ត្រីការបរទេសអ៊ីរ៉ង់ Abbas Araghchi ដែលថ្លែងក្នុងបទសម្ភាសជាមួយទូរទស្សន៍រដ្ឋ កាលពីថ្ងៃពុធទី២៥ខែមីនាឆ្នាំ២០២៦។

ក្នុងអំឡុងពេលនោះ ប្រមុខការទូតអ៊ីរ៉ង់វ័យ៦៣ឆ្នាំរូបនេះប្រាប់ថា៖ «ប៉ុន្មានថ្ងៃមកនេះ សហរដ្ឋអាមេរិកបាន ចាប់ផ្តើមផ្ញើសារជាច្រើនតាមរយៈអ្នកសម្របសម្រួលផ្សេងៗគ្នា។ សារទាំងនេះត្រូវបាន បញ្ជូនតាមរយៈបណ្តាប្រទេសជាមិត្ត ហើយអ៊ីរ៉ង់បានឆ្លើយតបវិញដោយការបញ្ជាក់ពីគោលជំហរ និងព្រមានចំៗថា នោះគឺមិនមែនជាកិច្ចសន្ទនាឬការចរចា ឬអ្វីដែលស្រដៀងនឹងនោះឡើយ»។

លោក Araghchi អះអាងថា គោលនយោបាយរបស់អ៊ីរ៉ង់នាពេលនេះ គឺបន្តការពារខ្លួន ហើយឥឡូវពួកគេគ្មានបំណងចរចាទេ។ នេះគឺជាសង្គ្រាមរបស់អ៊ីស្រាអែល ប៉ុន្តែប្រជាជនក្នុងតំបន់ និងប្រជាជនសហរដ្ឋអាមេរិក គឺជាអ្នកដែលត្រូវសងតម្លៃចំពោះសង្គ្រាមនេះ។

រឿងនេះកើតឡើងបន្ទាប់ពី អ៊ីរ៉ង់ និយាយផ្លែផ្កាទៅលោក ដូណាល់ ត្រាំ ថា ទីក្រុងតេហេរ៉ង់ មិនបានចរចាជាមួយអាមេរិកទេ តែអាមេរិកកំពុងចរចាជាមួយខ្លួនឯង។

បង្ហាញមុខតាមកញ្ចក់ទូរទស្សន៍រដ្ឋនៅថ្ងៃពុធទី២៥ខែមីនាឆ្នាំ២០២៦, អ្នកនាំពាក្យបញ្ជាការដ្ឋានចម្រុះនៃកងកម្លាំងប្រដាប់អាវុធអ៊ីរ៉ង់ នៃទីបញ្ជាការកណ្តាល Khatam al-Anbiya លោក Ebrahim Zolfaqari បាននិយាយឌឺដងទៅកាន់ថ្នាក់ដឹកនាំសហរដ្ឋអាមេរិកថា៖ «តើកម្រិតនៃការតស៊ូរបស់អ្នក បានឈានដល់ដំណាក់កាលត្រូវចរចាជាមួយខ្លួនឯងហើយមែនទេ? មនុស្សដូចយើង មិនងាយចុះញ៉មជាមួយមនុស្សដូចអ្នកបានឡើយ»។

ការវាយបកទៅលោកត្រាំបែបនេះទៀតសោត កើតឡើងក្រោយមានការបែកធ្លាយប្រភពពីក្នុងជួររដ្ឋាភិបាលទីក្រុងវ៉ាស៊ីនតោន ដែលថា អាមេរិក បានបញ្ជូនផែនការ១៥ចំណុចទៅអ៊ីរ៉ង់ហើយតាមរយៈប្រទេសប៉ាគីស្ថាន ដើម្បីបញ្ចប់សង្គ្រាមមជ្ឈិមបូព៌ា៕

អត្ថបទ៖ សុខ សុវណ្ណ