ឥណ្ឌូណេស៊ី បើក​ផ្លូវសម្រាប់ការនាំចូលប្រេងពីរុស្ស៊ី ចំពេលការផ្គត់ផ្គង់ពីមជ្ឈិមបូព៌ារងការរំខាន​

ឥណ្ឌូណេស៊ីបើកផ្លូវ​សម្រាប់ការនាំចូលប្រេងពីប្រទេសផ្សេងៗ រួមទាំងរុស្ស៊ី ដើម្បីរក្សាសន្តិសុខផ្គត់ផ្គង់ថាមពល ក្រោយ​ពេលការផ្គត់ផ្គង់សកលធ្លាក់ចូលទៅក្នុងភាពមិនប្រាកដប្រជាដោយសារតែជម្លោះនៅមជ្ឈិមបូព៌ា។ ​

តាមការចុះផ្សាយរបស់សារព័ត៌មាន IDNFinancials រដ្ឋមន្ត្រីក្រសួងថាមពល និងធនធានរ៉ែឥណ្ឌូណេស៊ី លោក Bahlil Lahadalia បានថ្លែងកាលពីដើមសប្ដាហ៍ថា រដ្ឋាភិបាលកំពុងចាត់វិធានការបត់បែនក្នុងការស្វែងរកប្រេងឆៅ ដើម្បីធានាបាននូវភាពអាចរកបាននៃប្រេងឥន្ធនៈក្នុងស្រុក។

ឆ្លើយតបទៅនឹងលទ្ធភាពលើកិច្ចសហប្រតិបត្តិការជាមួយ​រុស្ស៊ីពាក់ព័ន្ធនឹងបញ្ហាប្រេង លោកថ្លែងយ៉ាងដូច្នេះថា៖ «ប្រសិនបើអ្វីៗគ្រប់យ៉ាងត្រូវបានបញ្ចប់ យើងនឹងប្រកាសវា»។

​ការឱ្យដឹងរបស់រដ្ឋមន្រ្តីរូបនេះ ធ្វើឡើងបន្ទាប់ពី​ឯកអគ្គរដ្ឋទូតរុស្ស៊ីប្រចាំ​ឥណ្ឌូណេស៊ី លោក Sergei Tolchenov បាន​លើកឡើងទាក់ទងនឹង​លទ្ធភាពដែលរុស្ស៊ីអាចលក់ប្រេងឱ្យឥណ្ឌូណេស៊ី។ ​

​បើតាមលោក Bahlil ​ឥណ្ឌូណេស៊ីមិនអាច​ទម្រើសលើ​ប្រភពនាំចូលច្រើនពេកទេ ដោយសារតែស្ថានភាពកាន់តែតឹងតែង​ក្នុងទីផ្សារថាមពលសកល។ លោក​និយាយថា រដ្ឋាភិបាលឥណ្ឌូណេស៊ីនឹងផ្តល់អាទិភាពដល់ប្រទេសណាមួយដែលមានសមត្ថភាពធានាការផ្គត់ផ្គង់។

លោកបានបន្ថែមថា ការប្រកួតប្រជែងសម្រាប់ប្រេង​ក្នុងទីផ្សារពិភពលោកកាន់តែខ្លាំងក្លាឡើងៗ ​ដោយ​ការផ្គត់ផ្គង់ក៏មានកំណត់ ​ហើយ​តម្លៃក៏កើនឡើង។

លោក Bahlil មិនទាន់បានបង្ហាញព័ត៌មានលម្អិតទាក់ទងនឹងបរិមាណ ឬកាលវិភាគនៃ​លទ្ធភាព​នាំចូលប្រេង​រុស្ស៊ីនៅឡើយទេ។

គេមើលឃើញថា ចំពេលភាពតានតឹង​ភូមិសាស្ត្រនយោបាយកើនឡើង ឥណ្ឌូណេស៊ីបន្តកិច្ចខិតខំប្រឹងប្រែងដើម្បីធ្វើពិពិធកម្មប្រភពថាមពលរបស់ខ្លួន។

​កាលពីមុន លោក​ឯកអគ្គរដ្ឋទូតរុស្ស៊ី Tolchenov ​ធ្លាប់បាន​បញ្ជាក់ថា រុស្ស៊ីត្រៀមខ្លួនរួចជាស្រេចក្នុងការសហការជាមួយឥណ្ឌូណេស៊ីក្នុងវិស័យប្រេង និងឧស្ម័ន ជាពិសេសនៅពេលដែលតម្លៃថាមពលសកល​កើនឡើង ដោយសារតែការរំខាន​នៅច្រកសមុទ្រ​ហ័រមូហ្ស៕