ប្រេស៊ីល ចាប់ផ្ដើមផលិតវ៉ាក់សាំងការពារកូវីដខ្លួនឯង ដោយមិននាំចូលវត្ថុធាតុដើមពីបរទេស

អភិបាលរដ្ឋលោក Joao Doria បានប្រកាសថា វិទ្យាស្ថាន Butantan ដែលមានមូលដ្ឋាននៅទីក្រុង Sao Paulo ប្រទេសប្រេស៊ីល ដែលជាកន្លែងស្រាវជ្រាវវេជ្ជសាស្រ្ត គ្រប់គ្រងដោយរដ្ឋកាលពីថ្ងៃពុធ បានចាប់ផ្តើមផលិតវ៉ាក់សាំង ButanVac ដែលជាវ៉ាក់សាំងដំបូងបង្អស់របស់ប្រេស៊ីល ប្រឆាំងនឹងជំងឺកូវីដ ១៩ ។

លោក Doria បាននិយាយនៅក្នុងសន្និសីទកាសែត នៅវិទ្យាស្ថានដែលត្រូវបានផ្តល់មូលនិធិ ដោយរដ្ឋាភិបាលរដ្ឋថា “វានឹងក្លាយជា វ៉ាក់សាំងដំបូងបង្អស់ ដែលផលិតទាំងស្រុងនៅក្នុងប្រទេសប្រេស៊ីល ដោយមិនចាំបាច់នាំចូលវត្ថុធាតុដើម ពីបរទេស” ។

ការផលិតដំបូង ត្រូវបានរំពឹងថា នឹងមានចំនួន ១៨ លានដូស នៅពាក់កណ្តាលខែកក្កដា ទោះបីជាទីភ្នាក់ងារគ្រប់គ្រងសុខភាពរបស់ប្រទេសប្រេស៊ីល (Anvisa) មិនទាន់អនុញ្ញាតឲ្យចាក់វ៉ាក់សាំងនេះក៏ដោយ ។

លោក Doria បាននិយាយថា “នៅក្នុងឆមាសទីមួយនៃខែកក្កដា វ៉ាក់សាំង ButanVac នឹងត្រៀមរួចរាល់សម្រាប់ប្រើប្រាស់ ក្នុងពេលឆាប់ៗនេះ ។

ទន្ទឹមនោះ ទីភ្នាក់ងារ Anvisa កាលពីថ្ងៃអង្គារ បានស្នើសុំឯកសារបន្ថែមពីវិទ្យាស្ថាន មុនពេលអនុញ្ញាតឲ្យមានការចាប់ផ្តើម នៃការសាកល្បងវ៉ាក់សាំង ButanVac លើមនុស្ស ។

វិទ្យាស្ថាន Butantan ដែលជាអ្នកផលិតវ៉ាក់សាំងផ្តាសាយដ៏ធំ នៅភាគខាងត្បូងនៃអឌ្ឍគោលខាងត្បូង និងជាអ្នកផ្គត់ផ្គង់ឈានមុខគេនៃក្រសួងសុខាភិបាលប្រេស៊ីល តំណាងឲ្យ ៨៥ ភាគរយនៃសម្ព័ន្ធអន្តរជាតិ ដែលចូលរួមក្នុងការស្រាវជ្រាវវ៉ាក់សាំងថ្មីនេះ ។

ស្របពេលជាមួយគ្នានេះ រដ្ឋាភិបាលទីក្រុង Sao Paulo បាននិយាយថា អ្នកស្ម័គ្រចិត្តចំនួន ១,៨០០ នាក់ នឹងចូលរួមនៅក្នុងការសាកល្បងដំណាក់កាលដំបូង និងដំណាក់កាលទី ២ នៅពេលដែលវ៉ាក់សាំងនេះត្រូវបានអនុញ្ញាត ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ទោះឆ្លង និងស្លាប់ដោយកូវីដច្រើនក៏ដោយ តែ ប្រេស៊ីល មិនខ្ចីប្រើវ៉ាក់សាំង Sputnik V របស់រុស្ស៊ី

ចុចអាន ៖ អ្នកស្លាប់ដោយកូវីដនៅ ប្រេស៊ីល ភាគច្រើនជាប្រជាជនវ័យក្មេងអាយុក្រោម ៣០ ឆ្នាំ ហើយកើនឡើងជាង ១ ពាន់ភាគរយ