អ៊ីស្រាអែល ធ្វើឃាត​មេទ័ពលីបង់ និងមន្ត្រីយោធា​ ២​នាក់​​ទៀត ​

ប្រទេសអ៊ីស្រាអែល បានបញ្ជាក់ពីការសម្លាប់មេទ័ពលីបង់ Wissam Sabra ព្រមទាំងមន្ត្រីយោធា ២នាក់ផ្សេងទៀត ដែលទង្វើនេះ ធ្វើឲ្យស្ថានភាព ឡើងកម្តៅជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Al Jazeera​ នៅថ្ងៃអាទិត្យ ទី៧ ខែមិថុនា ឆ្នាំ២០២៦ អ៊ីស្រាអែល បានបើកការវាយប្រហារអាកាស ដោយកំណត់គោលដៅលើរថយន្តយោធាមួយគ្រឿង កំពុងធ្វើដំណើរតាមដងផ្លូវ តភ្ជាប់ពីតំបន់ Khardali ទៅ Nabatieh នៅភាគខាងត្បូង ប្រទេសលីបង់។

តាមរយៈរូបភាព ដែលចែកចាយលើបណ្តាញសង្គម គេឃើញរថយន្តនោះ ត្រូវបានបំផ្លាញខ្ទេចខ្ទីទាំងស្រុង និងត្រូវភ្លើងឆេះយ៉ាងសន្ធោសន្ធៅ។

ក្រៅពីឧត្តមសេនីយ៍ត្រី Wissam, អនុសេនីយ៍ឯក Elie Khoury និងមន្ត្រីឈ្មោះ Hussein Abdel Ali Ghazal ក៏បាត់បង់ជីវិត ផងដែរ។

ជុំវិញការធ្វើឃាតនេះ ប្រធានាធិបតីលីបង់ Joseph Aoun បានថ្កោលទោសយ៉ាងខ្លាំងក្លា ដោយហៅថា ជា «ការរំលោភបំពានយ៉ាងធ្ងន់ធ្ងរ» លើអធិបតេយ្យភាព និងច្បាប់អន្តរជាតិ ខណៈនាយករដ្ឋមន្ត្រី Nawaf Salam ចាត់ទុកទង្វើនេះថា ជា «បទឧក្រិដ្ឋដ៏សាហាវយង់ឃ្នងបំផុត»។

យ៉ាងណា IDF អះអាងថា ហេតុការណ៍នេះ កំពុងស្ថិតក្រោមការពិនិត្យឡើងវិញ ព្រោះប្រតិបត្តិការរបស់ខ្លួន គឺកំណត់គោលដៅ តែលើអង្គការភេរវកម្មហេសបូឡា ប៉ុណ្ណោះ មិនមែនកងទ័ពលីបង់ ឡើយ។

យោង​តាម​របាយការណ៍ចុងក្រោយ របស់​ក្រសួងសុខាភិបាល​លីបង់ ចំនួនមនុស្ស​ស្លាប់ ​ដោយសារ​ការវាយប្រហាររបស់អ៊ីស្រាអែល លើ​លីបង់​ ចាប់តាំងពីថ្ងៃទី០២ ខែមីនាមក បានកើនដល់ ៣ ៥២៦នាក់ហើយ ខណៈ ១០ ៧៣៣ នាក់​​ទៀត​ រងរបួស៕

អត្ថបទ៖ សុខ សុវណ្ណ