រិះគន់ផ្អើលវៀតណាម! មន្ត្រីបក្សកុម្មុយនិស្ត ចូលហាង Salt Bae (មានវីដេអូ)

វីដេអូមួយ ដែលបង្ហាញពីមន្ត្រីបក្សកុម្មុយនិស្តម្នាក់ កំពុងញ៉ាំសាច់អាំងស្រោបមាស ដែលបញ្ចុកដោយមេចុងភៅល្បីឈ្មោះ Salt Bae ក្នុងភោជនីយដ្ឋានទីក្រុង ឡុងដ៍ បានទទួលរងការរិះគន់យ៉ាងចាស់ដៃ នៅក្នុងប្រទេសវៀតណាម។

វីដេអូរបស់លោក To Lam រដ្ឋមន្ត្រីក្រសួងសន្តិសុខសាធារណៈវៀតណាម ដែលហាក់ដូចជាពេញចិត្តនឹងសាច់អាំងតម្លៃជិត ២ពាន់ដុល្លារនៅភោជនីយដ្ឋាន Nusr-Et Steakhouse ក្នុងសង្កត់ Knightsbridge នៃទីក្រុងឡុងដ៍ បានលេចឡើងនៅលើប្រព័ន្ធផ្សព្វផ្សាយសង្គមកាលពីយប់ថ្ងៃសុក្រទី ៥ ខែវិច្ឆិកា។

ចាប់តាំងពីបើកដំណើរការមក ភោជនីយដ្ឋានដែលដាក់ឈ្មោះតាមមេចុងភៅជនជាតិតួកគី Nusret Gokce ឬត្រូវបានគេស្គាល់ថា Salt Bae បានទទួលការចាប់អារម្មណ៍យ៉ាងខ្លាំង ជាពិសេសពីសំណាក់តារាល្បីៗរួមមាន Beckhams, Leonardo DiCaprio និង Wayne Rooney ជាដើម។

នៅក្នុងវីដេអូនោះ មេចុងភៅជនជាតិតួកគី បានកាត់សាច់អាំងឲ្យលោក Lam ដោយរោយអំបិល រួចយកកាំបិតចាក់សាច់ យកទៅបញ្ចុកមន្ត្រីវៀតណាមរូបនេះ។

វីដេអូ​នេះ​ក៏​បង្ហាញ​ពី​អ្នក​នាំពាក្យ​ក្រសួង​វៀតណាម ​លោក To An Xo អង្គុយ​ក្បែរ​លោក Lam ផងដែរ។

វីដេអូនេះត្រូវបានបង្ហោះនៅលើទំព័រ Tiktok របស់ភោជនីយដ្ឋាន ហើយបានលុបចោលភ្លាមៗកាលពីម្សិលមិញ ប៉ុន្តែបានបង្កភាពល្បីល្បាញរួចទៅហើយនៅវៀតណាម ដែលជាប្រទេស ប្រជាជនរកចំណូលជាមធ្យមបានត្រឹមតែ ១៥០ដុល្លារប៉ុណ្ណោះ ក្នុងមួយខែ។

អ្នក​ប្រើ​ប្រព័ន្ធ​ផ្សព្វផ្សាយ​សង្គម​ បាន​ថ្កោល​ទោស​លោក Lam ​ចំពោះ​ការ​ទទួល​ទាន​អាហារ​ដ៏​ខ្ជះខ្ជាយ​បែប​នេះ។

អ្នកលេងបណ្តាញសង្គមឈ្មោះ Dang Hoang Luong បានសរសេរថា “មនុស្សរាប់លាននាក់កំពុងរងគ្រោះដោយសារ កូវីដ។ គ្មានវាចានឹងថ្លែង”។

ចំណែក Nguyen Huu Truong បាននិយាយថា “តើគាត់បានលុយពីណា? ប្រាក់​ខែ​ប្រចាំ​ឆ្នាំ​របស់​គាត់​មិន​អាច​ទិញ​អាហារ​នោះ​បាន​ទេ!”។ រីឯ Bui Mang Tung សរសេរ​ថា “លុយ​ពន្ធ​របស់​ខ្ញុំ ​ត្រូវ​បាន​គេ​យក​ទៅ​ប្រើ​សម្រាប់របស់​ប្រណីតៗ​ហើយ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចង់ស្គាល់ភោជនីយដ្ឋានរបស់​Salt Bae បុរសម្នាក់ស្លុតចិត្ត ពេលគិតលុយ