ស្តេច​ស៊ុតអែត​ និង​ម្ចាស់ក្សត្រិយ៍​ព្រះ​ជន្ម​ជាង​៧០​វស្សាដូច​គ្នា​ឆ្លង​កូវីដ

ព្រះបរមរាជវាំងបាននិយាយក្នុងសេចក្តីប្រកាសមួយកាលពីថ្ងៃអង្គារ៍ ទី៤ ខែមករានេះថា ព្រះមហាក្សត្រនៃប្រទេសស៊ុយអែត Carl Gustaf និងម្ចាស់ក្សត្រិយ៍ Silvia បានធ្វើតេស្តវិជ្ជមានកូវីដ-១៩។

ការឆ្លងព្រះមហាក្សត្រចំពេលដែលប្រទេសស៊ុយអែតបានកំពុងប្រឈមនឹងវីរុសបំប្លែងខ្លួនថ្មី Omicron រាតត្បាតខ្លាំង ក្នុងនោះករណីឆ្លងប្រចាំថ្ងៃកំពុងកើនឡើងជាប់កំណត់ត្រាថ្មីជាលំដាប់។

ព្រះបរមរាជវាំងបាននិយាយថា ៖«ព្រះមហាក្សត្រ និងម្ចាស់ក្សត្រិយ៍ដែលបានចាក់វ៉ាក់សាំង៣ដូសពេញមានអាការរោគសញ្ញាស្រាល និងមាន​ព្រះ​រាជ​ស្មារតីធម្មតា»។

ព្រះរាជវាំងបានបន្តថា ព្រះមហាក្សត្រដែលមានព្រះជន្ម៧៥វស្សា និងម្ចាស់ក្សត្រិយ៍ព្រះជន្ម៧៨វស្សាបានកំពុងគង់នៅដាច់ដោយឡែកពីញាតិវង្ស និងបញ្ជាក់ថា កំពុងតាមដានធ្វើតេស្តរាល់សមាជិកញាតិវង្ស ក៏​ដូច​ជា​មន្ត្រីនានាដែលបានពាក់ព័ន្ធនឹងព្រះអង្គទាំងពីរ។

ព្រះរាជា Carl Gustaf បានក្លាយជាប្រមុខរដ្ឋស៊ុតអែតតាំងពីព្រះជន្ម២៧វស្សា បន្ទាប់ពីការសោយទីវង្គតរបស់ព្រះមហាក្សត្រ Gustaf VI Adolf នៅក្នុងឆ្នាំ១៩៧៣ ហើយបានក្លាយជាស្តេចដែលសោយរាជ្យយូរបំផុតរបស់ប្រទេសមួយនេះ។

ព្រះនាងម្ចាស់ Victoria ដែលជាបុត្រីច្បង និងជាអ្នករាជសម្បត្តិបន្ត បានឆ្លងកូវីដ-១៩កាលពីខែមីនា ឆ្នាំមុន ហើយស្វាមីរបស់ព្រះនាងព្រះអង្គម្ចាស់ Daniel ក៏បានឆ្លងដែរ។ ព្រះអង្គទាំងពីរបានជាសះស្បើយ បន្ទាប់ពីកើតមានរោគសញ្ញាស្រាល។

បន្ទាប់ពីរដូវលំហើយស្ងប់ស្ងាត់ កូវីដ-១៩នៅប្រទេសស៊ុអែតបានចាប់ផ្តើមងើបឡើងវិញក្នុងរយៈពេលប៉ុន្មានសប្តាហ៍ចុងក្រោយនេះ។

ក្នុងរយៈពេល៤ថ្ងៃចាប់ពីថ្ងៃសុក្រដល់ថ្ងៃចន្ទ ស៊ុយអែតមានករណីឆ្លងកូវីដ-១៩ចំនួន ៤២ ៩៦៩នាក់ និងស្លាប់២០នាក់។ នេះបើយោងតាមទិន្នន័យរបស់ទីភ្នាក់ងារសុខភាពសាធារណៈរបស់​ប្រទេស៕

ប្រែសម្រួល៖ វីរបុត្រ
ប្រភព៖ reuters