សម្ដេចតេជោ ហ៊ុន សែន ៖ ការបន្តអូសបន្លាយ នៃសង្រ្គាមរុស្ស៊ី-អ៊ុយក្រែន បានបន្ទច់បង្អាក់ការស្ដារសង្គមសេដ្ឋកិច្ចឡើងវិញ

សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានលើកឡើងថា ស្ថានភាព នៃការអូសបន្លាយ នៃសង្រ្គាមរុស្ស៊ី-អ៊ុយក្រែន បានបន្ទច់បង្អាក់ការស្ដារសង្គមសេដ្ឋកិច្ចឡើងវិញ នៅក្នុងតំបន់អាស៊ាន ក៏ដូចជាសកលលោកទាំងមូល ហើយភាពតានតឹង និងការប្រកួតប្រជែងផ្នែកភូមិសាស្រ្ដនយោបាយនៅក្នុងតំបន់ យុទ្ធសាស្រ្ដមួយចំនួន រួមទាំងក្នុងទ្វីបអាស៊ីផងដែរនោះ ក៏នឹងបន្តចោទជាបញ្ហាផងដែរ។

នៅក្នុងពិធីបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ ២០២២ (ASEAN LEADERSHIP AND PARTNERSHIP FORUM) នៅព្រឹកថ្ងៃទី ១២ ខែកញ្ញា ឆ្នាំ ២០២២ នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ជាការពិតស្របពេលដែលអាស៊ាន បាននិងកំពុងងើបចេញពីវិបត្តិ នៃជំងឺកូវីដ-១៩ ឆ្ពោះទៅរកកំណើនសេដ្ឋកិច្ចប្រកបដោយចីរភាពឡើងវិញ គឺស្ថានភាពសង្គមសេដ្ឋកិច្ចបច្ចុប្បន្នក្នុងតំបន់អាស៊ាន ក៏ដូចជាសកលលោកទាំងមូលនៅតែមានភាពផុយស្រួយ និងបែកខ្ញែក។

ជាក់ស្ដែងការបន្តអូសបន្លាយ នៃសង្រ្គាមរុស្ស៊ី-អ៊ុយក្រែន បានបន្ទច់បង្អាក់ការស្ដារសង្គមសេដ្ឋកិច្ចឡើងវិញ តាមរយៈការបង្កឲ្យមានការកើនឡើង នៃសម្ពាធអតិផរណា ការកកស្ទះប្រព័ន្ធដឹកជញ្ជូន និងខ្សែសង្វាក់ផ្គត់ផ្គង់សកលកាន់តែធ្ងន់ធ្ងរ ជាពិសេសនៅក្នុងការទំនិញ ម្ហូបអាហារ។

សម្ដេចតេជោ ហ៊ុន សែន បានបន្ថែមថា ទន្ទឹមនឹងនេះ ភាពតានតឹង និងការប្រកួតប្រជែងផ្នែកភូមិសាស្រ្ដនយោបាយនៅក្នុងតំបន់យុទ្ធសាស្រ្ដមួយចំនួន រួមទាំងក្នុងទ្វីបអាស៊ីផងដែរនោះ ក៏នឹងបន្តចោទជាបញ្ហា និងហានិភ័យដល់ស្ថិរភាព និងវិបុលភាព នៅក្នុងតំបន់ និងសកលលោក។ បញ្ហាប្រឈមទាំងនេះ បានឆ្លុះបញ្ចាំងឲ្យឃើញពីភាពមានកម្រិត នៃកិច្ចសហប្រតិបត្តិការអន្តរជាតិ និងការជឿទុកចិត្តគ្នាទៅវិញទៅមក ដែលការណ៍នេះទាមទារឲ្យមានការប្ដេជ្ញាចិត្តយ៉ាងខ្លាំងក្លាឡើងវិញ ក្នុងការបង្កើតភាពជាដៃគូយ៉ាងជិតស្និត ប្រកបដោយភាពទូលំទូលាយ ​ទាំងក្នុងក្របខ័ណ្ឌតំបន់ និងសកលលោក។

ជាមួយគ្នានេះសម្ដេចតេជោ ហ៊ុន សែន បានរំលឹកឡើងវិញថា នៅពេលមានការផ្ទុះឡើងដំបូង នៃការរាលដាលជំងឺកូវីដ-១៩ ប្រទេសនីមួយៗ បានបិទព្រំប្រទល់ និងកាត់បន្ថយការទាក់ទងរវាងមនុស្ស និងទំនិញឆ្លងកាត់ព្រំដែន ដោយសារនៅពេលនោះ យើងមិនទាន់យល់ច្បាស់អំពីជំងឺនេះ។ ប៉ុន្តែការថម​ថយ នៃការឆ្លងរាលដាលកម្រិតមួយ ដែលអាចគ្រប់គ្រងបានដូចដែលយើងមើលឃើញ នាពេលបច្ចុ​ប្បន្ននេះ គឺផ្ដើមចេញពីការពង្រឹងកិច្ចសហប្រតិបត្តិការ និងភាពជាដៃគូឡើងវិញ តាមរយៈការចែករំលែកវ៉ាក់សាំង ការផ្ដល់ជំនួយហិរញ្ញវត្ថុ និងចំណេះដឹងផ្នែកបច្ចេកទេស ក្រោមស្មារតីយោគយល់ និងចេះជួយគ្នាទៅវិញទៅមក៕

អត្ថបទ ៖ ឃួន សុភ័ក្រ