ក្រសួងធម្មការ អំពាវនាវបញ្ឈប់សកម្មភាព​បិណ្ឌបាត្រ ឬរៃអង្គាសបច្ច័យតាមទីផ្សារ

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានអំពាវនាវដល់ព្រះសង្ឈ លោកអាចារ្យ ដូនជី បញ្ឈប់សកម្មភាព ដើររៃអង្គាសបច្ច័យនៅតាមផ្លូវសាធារណៈ និងទីប្រជុំជន នៅក្នុងពិធី​បុណ្យកឋិនទាន ដែលនឹងចូលមកដល់នៅថ្ងៃទី១១ តុលាឆ្នាំ២០២២។

លោកបានមានប្រសាសន៍នៅរសៀលថ្ងៃទី១០ តុលានេះ ថា «ត្រូវចៀសវាងឱ្យបានការចែកប្រូក្រាម​កម្មវិធីបុណ្យនៅតាមផ្សារឬតាមរោងចក្រ ដែលមានមនុស្សប្រមូលផ្តុំច្រើនព្រោះវាប៉ះពាល់ដល់វិន័យសង្ឈ មិនគាប់ភ្នែកមហាជន និងធ្វើឱ្យបាត់បង់ជំនឿពីពុទ្ធបរិស័ទដែលជាអ្នកកាន់ព្រះពុទ្ធសាសនា»។

លោកបានបន្តថា ទោះបីជាមានការផ្សព្វផ្សាយ និងបានប្រកាសតាមរយៈគណៈសង្ឈទាំងពីរគណៈក៏ដោយ ក៏មានព្រះសង្ឈ និងលោកអាចា្យ និងដូនជី មួយចំនួនតូចនៅតែបន្តធ្វើសកម្មភាពដើរបិណ្ឌបាត្រឬរៃអង្គាស​បច្ច័យតាមទីផ្សារ ទីប្រជុំជន និងតាមរោងចក្រ ដែលទង្វើនេះធ្វើឱ្យបាត់បង់សណ្តាប់ធ្នាប់របៀបរៀបរយសង្គម និងកិត្តិយសព្រះពុទ្ធសាសនា។

លោកសំណូមពរព្រះសង្ឃ គណៈកម្មការវត្ត លោកអាចារ្យ តាជី យាយជី ត្រូវរៀបព្រះកាយនិងរៀបចំខ្លួន ដើម្បីពង្រឹង​ការប្រតិបត្តិសន្ធាពុទ្ធបរិស័ទឱ្យបានត្រឹមត្រូវ តាមពុទ្ធានុញ្ញាតហើយសូមចៀសឱ្យបាននូវភាពអវិជ្ជមាន ដែលធ្វើឱ្យបាត់​បង់សន្ធាជ្រះថ្លារបស់ពុទ្ធបរិស័ទ។

លោកបានណែនាំឱ្យមើលគណៈសង្ឈធំៗជាគំរូ ដែលព្រះអង្គបានប្រតិបត្តិ និងបានបំពេញសេចក្តីជ្រះថ្លាបានល្អប្រសើរ។

គួរបញ្ជាក់ថា ពិធីបុណ្យកឋិនទាននៅឆ្នាំនេះ ដែលមានរយ:ពេល២៩ថ្ងៃ នឹងប្រព្រឹត្តទៅចាប់ពីថ្ងៃ១រោច ខែអស្សុជ ដល់​ថ្ងៃ១៥កើត ខែកត្តិក ត្រូវនឹងថ្ងៃទី ១១ ខែតុលា ដល់ថ្ងៃទី០៨ ខែវិច្ឆិកា ឆ្នាំ២០២២៕ សំអឿន