ដំណាំស្រូវពលរដ្ឋ​ជាង ៧០០ ហិកតា នៅស្រុកស្ទឹងត្រង់​រងការខូចខាតដោយសារទឹកជំនន់

ស្រែស្រូវរបស់ប្រជាកសិករជាង ៧០០ ហិកតា នៅស្រុកស្ទឹងត្រង់ ខេត្តកំពង់ចាម រងការខូចខាតដោយសារគ្រោះទឹកជំនន់។

លោក អ៊ុន ចាន់ដា អភិបាលខេត្ត និងប្រធានគណៈកម្មាធិការគ្រប់គ្រងគ្រោះមហន្តរាយ ខេត្តកំពង់ចាមនៅថ្ងៃទី ១១ ខែតុលានេះ បានដឹកនាំក្រុមការងារមន្ទីរ អង្គភាពជំនាញ និងអាជ្ញាធរ​មូលដ្ឋាន អមដំណើរដោយលោក អ៊ុម សំអាត រដ្ឋលេខាក្រសួងកសិកម្ម រុក្ខាប្រមាញ់ និងនេសាទ អញ្ជើញចុះពិនិត្យស្ថានភាពស្រែស្រូវរបស់ប្រជាកសិករទទួលរងគ្រោះដោយសារទឹកជំនន់​ទន្លេមេគង្គនៅស្រុកស្ទឹងត្រង់ ខេត្តកំពង់ចាម ប្រមាណជាង ៧០០ ហិកតា (៧៦១) ដើម្បីត្រៀមស្ដារឡើងវិញនារដូវទឹកសម្រកចុះទៅវិញ។

តាមរបាយការណ៍របស់លោក ទុន ណេត អភិបាល ស្រុកស្ទឹងត្រង់ បានឲ្យដឹងថា មកដល់ពេលនេះ ដោយសារស្រុកស្ទឹងត្រង់បានទទួលរងគ្រោះ ដោយទឹកជំនន់ទន្លេមេគង្គបានធ្វើឲ្យប៉ះពាល់ខូចខាតដំណាំស្រូវ និងមានតម្រូវការស្ដារឡើងវិញតាមឃុំ និងភូមិមួយចំនួន សរុបចំនួន ៣១ភូមិ មានចំនួន ៧៦១ ហិកតា ស្មើនឹង ១.៤៤៦គ្រួសារ ក្នុងនោះមាន៖ ឃុំពាមកោះស្នាមាន ០៨ភូមិ ចំនួន ២៧០ ហិកតា ស្មើនឹង ៤៩៨គ្រួសារ។

ឃុំខ្ពបតាងួន មាន ០៦ភូមិ មានចំនួន ១៦៣ ហិកតា ស្មើនឹង ២២២គ្រួសារ។ ឃុំអារក្សត្នោត មាន ០២ភូមិ ចំនួន ១១៥ ហិកតា ស្មើនឹង ១៨៥គ្រួសារ។ ឃុំព្រែកបាក់ មាន ០៤ភូមិ ចំនួន ៧៧ ហិកតា ស្មើនឹង ១៣៦គ្រួសារ។ ឃុំព្រែកក់មានចំនួន ០៨ភូមិ ចំនួន ៧១ ហិកតា ស្មើនឹង ២៤៩គ្រួសារ។ ឃុំព្រះអណ្ដូង មាន ០៣ភូមិ ចំនួន ៦៥ ហិកតា ស្មើនឹង ១៥៦គ្រួសារ៕

អត្ថបទ៖ ឡេក ចាន់ពេជ្រ