ជនរងគ្រោះពីការរញ្ជួយដីនៅ ឥណ្ឌូណេស៊ី ជិត ៦ ម៉ឺននាក់ កំពុងត្រូវការ​ជំនួយជាបន្ទាន់

អាជ្ញាធរឥណ្ឌូណេស៊ី កំពុងតស៊ូដើម្បីជួយសង្គ្រោះអ្នកនៅរស់រានមានជីវិត និងផ្តល់ជំនួយដល់ជនជម្លៀសជិត ៦០,០០០ នាក់ បន្ទាប់ពីគ្រោះរញ្ជួយដីកម្រិត​ ៥.៦ រ៉ិចទ័រ បានវាយប្រហារខេត្ត West Java កាលពីថ្ងៃចន្ទ ។

អាជ្ញាធរគ្រោះមហន្តរាយឥណ្ឌូណេស៊ី​បាននិយាយថា យ៉ាងហោចណាស់មនុស្ស ២៦៨ នាក់ត្រូវបានស្លាប់ ហើយ ១៥១ នាក់នៅតែបាត់ខ្លួន និង​មនុស្ស​ជាង ១,០០០ នាក់​បាន​រង​របួស ។

រហូតមកដល់ពេលនេះ ក្រុមអ្នកជួយសង្គ្រោះនៅតែកំពុងព្យាយាមស្វែងរកមនុស្សដែលជាប់នៅក្នុងកម្ទេចកម្ទី ដោយសារតែការរំញ័រខ្លាំង ដែលបណ្តាលឲ្យមានការរអិលបាក់ដីជាច្រើនកន្លែងទៀត ។

ការរញ្ជួយដីជាង ១០០ កន្លែងនេះបានកើតឡើង បន្ទាប់ពីការរញ្ជួយដីដំបូងដែលបង្ខំឲ្យមនុស្សប្រហែល ៥៨,០០០ ត្រូវបានជម្លៀសចាកចេញ ។

ជាមួយគ្នានោះ អ្នករងគ្រោះ​ជា​ច្រើន​នាក់​ត្រូវ​បាន​គេ​ទុក​ចោល​ដោយ​មិនមាន​ការ​ផ្គត់ផ្គង់​ជំនួយ​ជាង ​២៤​ ម៉ោង ​បន្ទាប់​ពី​ការ​រញ្ជួយ​ដីដ៏ខ្លាំងក្លានេះ ។

ប្រព័ន្ធផ្សព្វផ្សាយ​ឥណ្ឌូណេស៊ី ចុះផ្សាយថា អ្នកជម្លៀសជិត ៦០,០០០ នាក់ត្រូវការអាហារ ភួយ និងក្រណាត់កន្ទបទារក ។ ប៉ុន្តែ​តំបន់​ជា​ច្រើនផ្សេងទៀត មិនអាចផ្គត់ផ្គង់ទៅដល់ឡើយ ដោយសារតែ​ការរអិលបាក់ដី ស្របពេលដែលអ្នកស្រុក Cianjur ប្រហែល ១០០ នាក់កំពុងប្រើបន្ទះប្លាស្ទិកដើម្បីសង់តង់ស្នាក់នៅជាបណ្តោះអាសន្ន ៕

ប្រែសម្រួលដោយ ៖ នាង រតនៈ

ប្រភព ៖ NHK

ចុចអាន ៖ ចំនួនមនុស្សស្លាប់ និងរបួសក្នុងគ្រោះរញ្ជួយដីនៅ ឥណ្ឌូណេស៊ី កើនឡើងបន្ថែមទៀត