សាច់រឿង នៃដំណើរទស្សនកិច្ចសម្ងាត់បំផុតរបស់លោក Biden ទៅ អ៊ុយក្រែន (មានវីដេអូ)

ដំណើរដ៏គួរឲ្យភ្ញាក់ផ្អើលរបស់ប្រធានាធិបតីអាមេរិកលោក Joe Biden ទៅកាន់ប្រទេសអ៊ុយក្រែនកាលពីថ្ងៃចន្ទទី២០ខែកុម្ភៈ ពិតជាប្រតិបត្តិការមួយដែលបានចាប់ផ្តើមក្នុងភាពងងឹត ដោយសម្ងាត់បំផុត។

អ្នកកាសែតពីរនាក់ ដែលអមដំណើរលោក Biden ក្នុងការធ្វើដំណើរនេះ បានរៀបរាប់ថា ពួកគេត្រូវបានគេប្រាប់ឲ្យទៅដល់មូលដ្ឋានទ័ពអាកាស Andrews ក្នុងរដ្ឋ Maryland នាពេលទាបភ្លឺ រួចត្រូវបានគេបង្ខំឲ្យប្រគល់ទូរស័ព្ទរបស់ពួកគេ មុនពេលឡើងជិះយន្តហោះ C-32 ដែលជាយន្តហោះតូចជាង Air Force One Boeing VC-25 ធម្មតា។

យន្តហោះ ​បាន​ចត​ក្នុង​ទីងងឹត​ក្បែរ​រោង​ចក្រ​មួយ ដោយ​រង់ចាំ​ការ​មក​ដល់​របស់​លោក Biden។ លោកបានទៅដល់ប្រហែលម៉ោង ៤ទាបភ្លឺ ហើយយន្តហោះបានចាកចេញនៅម៉ោង៤:១៥នាទីថ្ងៃអាទិត្យទី១៩ខែកុម្ភៈ។

យន្តហោះបានឈប់ចាក់ប្រេងនៅមូលដ្ឋានអាកាស Ramstein ក្នុងប្រទេសអាល្លឺម៉ង់នៅម៉ោង ៥:១៣នាទីល្ងាចថ្ងៃអាទិត្យបន្ទាប់ពីការហោះហើររយៈពេលប្រហែល៧ម៉ោង មុនពេលបន្តដំណើរទៅអាកាសយានដ្ឋាន Rzeszów-Jasionka ក្នុងប្រទេសប៉ូឡូញ។

យន្តហោះបានចុះចតនៅ Rzeszów ប្រទេសប៉ូឡូញនាម៉ោង៧:៥៧នាទីយប់។ អ្នកសារព័ត៌មានត្រូវបានបញ្ជូនឲ្យទៅជិះក្នុងរថយន្ត SUV ដែលត្រូវបានចាត់តាំងជាផ្នែកនៃក្បួនដែលមានរថយន្តប្រហែល២០គ្រឿង។

ក្បួនបានចេញ​នៅ​ម៉ោង​៨​និង​១២​នាទី​យប់ ហើយចាប់ផ្តើមធ្វើដំណើរដ៏វែងឆ្ងាយរយៈពេលប្រហែលមួយម៉ោង លើផ្លូវហាយវេឆ្ពោះទៅកាន់ស្ថានីយរថភ្លើង Przemyśl Główny។ មិនមានការបើក​ស៊ីរ៉ែនឡើយ ​ក្នុង​អំឡុង​ពេលហែក្បួន ​ដើម្បីចៀសវាង​ការ​ទាក់ទាញ​ចំណាប់​អារម្មណ៍។

ក្បួនបានទៅដល់ជិតស្ថានីយរថភ្លើង Przemyśl Główny នៅម៉ោងប្រហែល៩:១៥នាទីយប់ ជាកន្លែងដែលលោក Biden ចុះពីរថយន្តឡើងជិះរថភ្លើងដែលកំពុងរង់ចាំរួចទៅហើយ។

រថភ្លើងបានចាកចេញពីស្ថានីយនៅម៉ោង ៩:៣៧នាទីយប់ ហើយឆ្លងចូលទៅក្នុងប្រទេសអ៊ុយក្រែននៅម៉ោងប្រហែល ១០យប់។ ការធ្វើដំណើរបានកើតឡើងក្នុងភាពងងឹត និងមានរយៈពេលប្រហែល ១០ ម៉ោង។ រថភ្លើងបានឈប់ពីរបីដងដែរ ប៉ុន្តែគេមិនដឹងថា បណ្តាលមកពីមូលហេតុអ្វីនោះទេ។

ពេលព្រះ​អាទិត្យ​​រះ​ ​រថភ្លើង​ក៏បានចូល​ដល់ទី​ក្រុង កៀវ ហើយ​​ឈប់​នៅ​ស្ថានីយ Kyiv-Pasazhyrsky នា​ម៉ោង​ប្រហែល ៨ព្រឹក។ តំបន់ជុំវិញនោះត្រូវបានសម្អាត ហើយឯកអគ្គរដ្ឋទូតសហរដ្ឋអាមេរិកប្រចាំនៅអ៊ុយក្រែន Bridget Brink បានរង់ចាំលោក Biden និងបុគ្គលិករបស់គាត់នៅស្ថានីយ។

លោក Biden បានចុះពីរថភ្លើងនៅម៉ោង ៨:០៧នាទីព្រឹក ហើយបានចូលទៅក្នុងក្បួនរថយន្តមួយទៀតដែលចាកចេញពីស្ថានីយនៅម៉ោង ៨:១៨នាទីព្រឹក ធ្វើដំណើរទៅកាន់វិមាន Mariinsky ជាកន្លែងដែលលោក Biden ត្រូវបានស្វាគមន៍ដោយប្រធានាធិបតីអ៊ុយក្រែនលោក Volodymyr Zelensky៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Yahoo

ចុចអាន៖ ទៅអ៊ុយក្រែនម្សិលមិញ លោក Biden ប្រកាសផ្តល់ជំនួយបន្ថែម ៥០០លានដុល្លារឲ្យ ទីក្រុង កៀវ