តារាសម្តែង Yoo Ah In មានគេគប់ដបភេសជ្ជៈដាក់ ក្រោយដីកាចាប់ខ្លួនបានច្រានចោល

តារាសម្តែងYoo Ah In ដែលត្រូវបានចោទប្រកាន់ពីបទប្រើប្រាស់គ្រឿងញៀន និងទទួលរងនូវភាពអាម៉ាស់ដោយសារត្រូវគេគប់ដបភេសជ្ជៈដាក់នៅពេលធ្វើដំណើរទៅផ្ទះរបស់លោក បន្ទាប់ពីដីកាចាប់ខ្លួនបានច្រានចោល ។

ឧបទ្ទវហេតុនេះត្រូវបានគេនិយាយថាបានកើតឡើងក្រោយពី Yoo Ah In បានបញ្ចប់ការសួរចម្លើយរបស់លោកនៅឯអគារតុលាការកណ្តាលទីក្រុងសេអ៊ូលនៅថ្ងៃទី ២៤ ខែឧសភា។ មុននោះតារាសម្ដែងរូបនេះបានរង់ចាំនៅខាងក្នុងអគារ ខណៈពេលដែលតុលាការសម្រេចថាតើត្រូវយល់ព្រម ឬមិនយល់ព្រមតាមដីកាចាប់ខ្លួនរបស់ប៉ូលីសប្រឆាំងនឹងលោក ។

បន្ទាប់ពីទទួលបានព័ត៌មានថាសំណើ ដីកាចាប់ខ្លួនត្រូវបានបដិសេធ Yoo Ah In បានធ្វើអត្ថាធិប្បាយខ្លីមួយទៅកាន់អ្នកសារព័ត៌មានមុន នឹងដឹកតាមរថយន្តដើម្បីត្រឡប់ទៅផ្ទះវិញ។ទោះបីជាយ៉ាងណាក៏ដោយ នៅតាមផ្លូវរបស់ Yoo Ah In ចេញពីតុលាការ ជនមិនស្គាល់អត្តសញ្ញាណម្នាក់បានបង្ហាញខ្លួន ហើយបានគប់ដបភេសជ្ជៈដាក់ខ្នងរបស់តារាសម្តែងនេះ។ ហេតុការណ៍នេះបានកើត ឡើងដោយមិននឹកស្មានដល់ ធ្វើឲ្យតារាសម្ដែងរូបនេះមានការភ្ញាក់ផ្អើល ។

អ្នកដែលគប់ដបទឹកដាក់ Yoo Ah In ត្រូវបានគេនិយាយថាបានចាកចេញពីកន្លែងកើតហេតុយ៉ាងលឿនដោយមានក្រណាត់គ្របលើក្បាលថែមទៀត។ ភ្លាមៗបន្ទាប់ពីព័ត៌មានអំពីហេតុការណ៍នេះ ត្រូវបានផ្សព្វផ្សាយអ្នកនិយមលេងអ៊ីនធឺណិតបានសម្តែងការមិនពេញចិត្តចំពោះទង្វើរបស់ជនអនាមិកនេះទេ។ ភាគច្រើនបាននិយាយថា ទោះបីជាមានការមិនពេញចិត្តចំពោះទង្វើរបស់ Yoo Ah In ក៏ដោយក៏មិនគួរប្រើហឹង្សា គួរតែទុកឲ្យតុលាការដោះស្រាយហើយអ្នកដែលមិនពាក់ព័ន្ធមិនគួរប្រើហិង្សាទេ។

ដោយឡែក បច្ចុប្បន្ន Yoo Ah In កំពុងប្រឈមមុខនឹងការចោទប្រកាន់ពីបទប្រើប្រាស់គ្រឿងញៀន ខុសច្បាប់ចំនួនប្រាំផ្សេងគ្នាចាប់តាំងពីឆ្នាំ ២០២០ រួមទាំងកញ្ឆា ប្រូហ្វុល ខេតាមីន ហ្សូលភីឌឹម និងកូកាអ៊ីន៕

ប្រែសម្រួល៖នាងតូច

ចុចអាន៖ភស្តុតាងនៃការប្រើប្រាស់គ្រឿងញៀន រកឃើញនៅក្នុងផ្ទះតារាសម្តែង Yoo Ah In