លោក បៃដិន ទំនងជាមិនចូលរួមកិច្ចប្រជុំកំពូលអាស៊ាននៅ ឥណ្ឌូណេស៊ី នាខែក្រោយឡើយ

ប្រភពព័ត៌មានធំៗជាច្រើនបាននិយាយដូចៗគ្នាថា ប្រធានាធិបតីអាមេរិកលោក ចូ បៃដិន ទំនងជានឹងមិនចូលរួមកិច្ចប្រជុំកំពូលជាមួយមេដឹកនាំអាស៊ាននៅទីក្រុងហ្សាការតានៅខែក្រោយនេះនោះទេ ។

លោក បៃដិន គ្រោងនឹងចូលរួមកិច្ចប្រជុំកំពូល G20 នៅថ្ងៃទី៩ ដល់ថ្ងៃទី១០ ខែកញ្ញា នៅក្នុងប្រទេសឥណ្ឌា ហើយនឹងបន្តដំណើរទស្សនកិច្ចនៅប្រទេសវៀតណាម ដែលជាដៃគូដ៏សំខាន់នៅតំបន់អាស៊ីអាគ្នេយ៍ដើម្បីបង្កើនទំនាក់ទំនងកាន់តែល្អប្រសើរ ប៉ុន្តែចំពោះវត្តមានរបស់លោក បៃដិន នៅក្នុងកិច្ចប្រជុំកំពូលអាស៊ាននៅថ្ងៃទី៤ ដល់ថ្ងៃទី៧ ខែកញ្ញា ស្ថិតក្នុងការមន្ទិលសង្ស័យនៅឡើយ ។

ទន្ទឹមនោះ នៅពេលអ្នកសារព័ត៌មានចាក់សួរថាតើលោក បៃដិន ពិតជានឹងមិនមកប្រទេសឥណ្ឌូណេស៊ីមែនឬ? មន្ត្រីជាន់ខ្ពស់សេតវិមានបានបញ្ជាក់ប្រាប់កាលពីថ្ងៃពុធថា “យើងមិនមានអ្វីនិយាយបន្ថែមលើរឿងរ៉ាវនេះនោះទេ ប៉ុន្តែយើងនៅតែធ្វើការលើបញ្ហានេះ ព្រោះកាលវិភាគរបស់លោក បៃដិន សម្រាប់តំបន់អាស៊ី មិនទាន់ចេញជាផ្លូវការនៅឡើយទេ ហើយវាអាចនឹងមានការផ្លាស់ប្ដូរទៅតាមនោះដែរ” ។

ពាក់ព័ន្ធនឹងបញ្ហានេះដែរ អ្នកការទូតអាស៊ានមួយចំនួនបាននិយាយថា វានឹងក្លាយជាការខកចិត្តដ៏សំខាន់មួយ ប្រសិនបើលោក បៃដិន មិនចូលរួមកិច្ចប្រជុំកំពូលនៅទីក្រុងហ្សាការតា ប៉ុន្តែទោះជាយ៉ាងណា ប្រធានាធិបតីអាមេរិករូបនេះ អាចនឹងបញ្ជូនអនុប្រធានាធិបតីលោកស្រី កាម៉ាឡា ហារីស មកអង្គុយប្រជុំជំនួសលោក ។

គួរបញ្ជាក់ថា ជាធម្មតាកិច្ចប្រជុំកំពូលអាស៊ាន កំណត់ពេលរៀបចំឡើងនៅក្នុងកញ្ញា ដើម្បីឲ្យមេដឹកនាំកំពូលៗ ជាពិសេសប្រធានាធិបតីអាមេរិកតែម្ដងបានអញ្ជើញចូលរួមផងដែរ ក្រោយពេលបញ្ចប់កិច្ចប្រជុំ G20 ដែលក៏រៀបចំឡើងក្នុងខែកញ្ញាដូចគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ មកដឹងអាយុថ្នាក់ដឹកនាំប្រទេស អាស៊ាន ទាំង ១០ ខណៈឯកឧត្តមបណ្ឌិត ហ៊ុន ម៉ាណែត មានវ័យក្មេងជាងគេ