ថ្ងៃនេះ ខេត្តកំពង់ចាម រៀបចំកម្មពិធីប្រណាំងទូក រយៈពេល២ថ្ងៃ តាមដងទន្លេមេគង្គ

ថ្ងៃនេះ រដ្ឋបាលខេត្តកំពង់ចាម រៀបចំពិធីប្រណាំងទូក ង បណ្តែតប្រទីប រយៈពេល២ថ្ងៃ គឺនៅថ្ងៃទី២៨-២៩ ខែតុលា ឆ្នាំ២០២៣ តាមបណ្តោយដងទន្លេមេគង្គ មុខវេទិកាអុំទូកខេត្ត ដើម្បីបង្កភាពសប្បាយរីករាយជូនប្រជាពលរដ្ឋក្នុងការលើកស្ទួយវិស័យ ទេសចរណ៍ និងថែរក្សាប្រពៃណីទំនៀមទម្លាប់។

លោក ស្រី សុភក្ត្រ័ អភិបាលរងខេត្តកំពង់ចាម និងជាអ្នកនាំពាក្យរដ្ឋបាលខេត្តកំពង់ចាម បានដឹងថា កម្មវិធីសប្បាយៗ  ក្នុងពិធីបុណ្យអុំទូក នៅឆ្នាំនេះរបស់រដ្ឋបាលខេត្ត មិនត្រឹមតែចូលរួមការថែរក្សាប្រពៃណីរបស់ដូនតាខ្មែរនោះទេ ប៉ុន្តែបង្កើតឡើងដើម្បីបង្ករភាពសប្បាយរីករាយជូនប្រជាពលរដ្ឋ ក្នុងការលើកស្ទួយវិស័យទេសចរណ៍ និងថែរក្សាទំនៀមទម្លាប់។

បើតាមលោក ស្រី សុភក្ត្រ័ កម្មវិធីបុណ្យអុំទូក រយៈពេល ២ថ្ងៃនេះ នៅថ្នាក់ខេត្ត មានទូក ង ទាំងខ្នាតខ្លី  និងខ្នាតវែង  ចំនួន៤៨ទូក ចូលរួមប្រណាំង និងបានរៀបចំស្តង់តាំងពិរពណ៌ចំនួន១១០ស្តង់ ដោយក្នុងនោះ មានស្តង់តាំងពិព័រណ៍ផលិតផលរបស់រដ្ឋបាលក្រុងស្រុកទាំង១០​ មានស្តង់មន្ទីរអង្គភាពជុំវិញខេត្ត និងមានស្តង់លក់ដូរទំនិញជាច្រើនប្រភេទ ទាំងម្ហូបអាហារ ភេសជ្ជៈ ផលិតផលភូមិមួយផលិតមួយ ហេីយមានការប្រគុំតន្រ្តីជូនប្រជាពលរដ្ឋទស្សនាកំសាន្ត។

រដ្ឋបាលខេត្តកំពង់ចាម ក៍បានអំពាវនាវ និងផ្សព្វផ្សាយដល់សាធារណៈជន ប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិទាំងអស់ អញ្ជើញមកទស្សនាកំសាន្តសប្បាយរីករាយក្នុងកម្មវិធីនេះប្រកបដោយទំនួលខុសត្រូវខ្ពស់៕

អត្ថបទ និង រូបភាព ៖  ឡេក ចាន់ពេជ្រ