មន្រ្តីវប្បធម៌៖ ពលរដ្ឋមិនគួរបារម្ភជ្រុលហួស​ករណីថៃស្នើដាក់សម្លៀកបំពាក់ប្រពៃណីគេ ក្នុងបញ្ជីយូណេស្កូ

មន្ត្រីក្រសួងវប្បធម៌ សុំមិនបញ្ចេញឈ្មោះ បានលើកឡើងថា ប្រជាជនកម្ពុជា មិនគួរបារម្ភជ្រុលហួស ករណីប្រទេសថៃ​ស្នើដាក់សម្លៀកបំពាក់ប្រពៃណីថៃ ក្នុងបញ្ជីបេតិកភណ្ឌអរូបីរបស់យូណេស្កូនោះទេ  ទោះបីសម្លៀកបំពាក់ប្រពៃណី​រវាងប្រទេសទាំងពីរស្រដៀងគ្នា តែមានលក្ខណៈខុសគ្នា។  អ្វីដែលប្រជាជនកម្ពុជា គួរពិចារណា និងជាការបារម្ភ គឺប្រជាជនកម្ពុជា ដែលប្រើប្រាស់សម្លៀកបំពាក់ថៃ ដោយមិនគិតពិចារណា។

មន្រ្តីរូបនេះ បានបង្ហើបថា« តាមដឹង ក្រសួងវប្បធម៌កម្ពុជា កំពុងរៀបចំឯកសារដើម្បីស្នើដាក់សម្លៀកបំពាក់ប្រពៃណីខ្មែរ ក្នុងបញ្ជីបេតិកភណ្ឌអរូបីនៃមនុស្សជាតិ របស់យូណេស្កូដែរ»។

បើតាម Page បុរាណាចា្យ បានឱ្យដឹងថា ថៃកំពុងប្រមូលឯកសារដើម្បីដាក់បញ្ចូលឈុត​ថៃដ៏សំខាន់ចូលជាបេតិ​កភណ្ឌពិភព​លោក។

ក្រសួងវប្បធម៌ថៃ កំពុងសហការជាមួយស្ថាប័នសិក្សានានា ក៏ដូចជាស្ថាប័នឯកជនផ្សេងៗ និងគ្រប់ភាគីពាក់ព័ន្ធទាំងអស់ ដើម្បីរៀបចំឯកសារស្នើសុំបញ្ចូលឈុតថៃ ជាសម្បត្តិបេតិកភណ្ឌអរូបីនៃមនុស្សជាតិ របស់អង្គការយូណេស្កូ ឆាប់ៗនេះ។ 

គួរបញ្ជាក់ផងដែរថា ឈុតថៃ មានសារៈសំខាន់យ៉ាងខ្លាំងចំពោះ Soft power ការផ្សព្វផ្សាយវប្បធម៌ថៃ ព្រមទាំងមានសារៈសំខាន់ក្នុងសេដ្ឋកិច្ចថៃយ៉ាងខ្លាំង។ ជាក់ស្តែងនៅរៀងរាល់ឆ្នាំតម្លៃសេដ្ឋកិច្ចនៃការ​ចរាចរណ៍​ឈុតថៃក្នុងទីផ្សារក្នុងស្រុក និងការនាំចូលទៅផ្សារប្រទេសជិតខាង ជាពិសេសប្រទេសកម្ពុជា ឡាវ ចិន និង មីយ៉ាន់ម៉ា មានតម្លៃរាប់សិបលានដុល្លារ។ ដោយសារសារសំខាន់ដូចនេះហើយ ទើបក្រសួងវប្បធម៌ថៃ និងគ្រប់ភាគីពាក់​ព័ន្ធទាំងអស់​កំពុងជំរុញធ្វើយ៉ាងណាឱ្យមានការដាក់បញ្ចូលឈុតថៃ ចូលជាសម្បត្តិបេតិកភណ្ឌពិភពលោក ដោយលឿនបំផុត។

ជាមួយគ្នានេះ មានមហាជនចូលបញ្ចេញយោបល់ថា៖ «យើងរមានបៀបយើង គេមានរបៀបគេ ដល់គេដាក់បញ្ជី គេចោទយើងទាំងស្រុង ថាយើងប្រើរបស់គេ  គួរឱ្យព្រួយបារម្មណ៍»។

ចំណែកមហាជនផ្សេងទៀត លើកឡើងថា «គេស្នើដាក់អ្វីចូលក៏ដាក់ទៅកុំឈឺចិត្តស្អិតទ្រូងរឿងគេពេក ព្រោះវាមិនមែន​ជាការដាក់ស្នើកម្មសិទ្ធិបញ្ញាផ្ដាច់មុខអ្វីទេ… សិល្បៈវប្បធម៌មួយនេះបានរីកចម្រើនដុះដាល់នៅស្រុកថៃ ជាកេរដំណែល​វប្បធម៌ឆ្លងគ្នាទៅមក ហើយគេបន្តរក្សា និងអភិវឌ្ឍន៍ ដូចនេះគេដាក់ចូលត្រឹមត្រូវតាមទឡ្ហីករណ៍​របស់គេគ្មានអ្វីត្រូវភ័យ​ត្រូវឈឺចាប់ទេ។ ទន្ទឹមនឹងនេះយើងក៏មានសិទ្ធិដាក់ស្នើបានដែរ បើយើងចងក្រងឯកសារត្រឹមត្រូវតាមលំដាប់​ដែលខាងយូណេស្កូតម្រូវ។ ដឹងទេការរើសអើង ការទាមទារសិទ្ធិផ្ដាច់មុខ នៃវប្បធម៌ គឺប្រាសចាកពីគោលការណ៍​យូណេស្កូរហើយ»៕