នាយកដ្ឋានប្រឆាំងបទល្មើសបច្ចេកវិទ្យា ស្នើឱ្យមានការប្រុងប្រយ័ត្នកុំចុចចូលតំណភ្ជាប់ (Link) ផ្តេសផ្តាស់

នាយកដ្ឋានប្រឆាំងបទល្មើសបច្ចេកវិទ្យា បានអំពាវនាវឱ្យមហាជនមានការប្រុងប្រយ័ត្នខ្ពស់ចំពោះការផ្ញើសារឱ្យចុចដំណភ្ជាប់ (Link) ឬ ចូលគណនីធនាគារផ្ទាល់ខ្លួន ចៀសវាងត្រូវបានបោកប្រាស់តាមប្រព័ន្ធអេឡិចត្រូនិច។ នេះបើតាមការផ្សព្វផ្សាយនៅលើទំព័រហ្វេសប៊ុករបស់អគ្គស្នងការដ្ឋាននគរបាលជាតិ ថ្ងៃទី០៥ ខែមីនា ឆ្នាំ២០២៤។

រូបភាព៖ នាយកដ្ឋានប្រឆាំងបទល្មើសបច្ចេកវិទ្យា

នៅក្នុងការអំពាវនានោះបានបញ្ជាក់ថា ប្រសិនបើមានសារ (SMS) ស្នើសុំជាបន្ទាន់នូវព័ត៌មានផ្ទាល់ខ្លួន ដើម្បីចូលទៅកាន់គណនីធនាគារ ការស្នើសុំលេខអត្តសញ្ញាណ ឬក៏ដើម្បីបញ្ជាក់នូវព័ត៌មានគណនីធនាគាររបស់លោកអ្នក សូមកុំចុចទៅលើតំណភ្ជាប់ (Link) ដែលទទួលបាននោះ ឬកុំឆ្លើយតប និងផ្ដល់នូវព័ត៌មានផ្ទាល់ខ្លួន ឬព័ត៌មានគណនី ជាដាច់ខាត។ បើមានការមន្ទិលសង្ស័យ នាយកដ្ឋានប្រឆាំងបទល្មើសបច្ចេកវិទ្យា ស្នើឱ្យទំនាក់ទំនងទៅកាន់គ្រឹះស្ថានហិរញ្ញវត្ថុរបស់នោះ ដើម្បីបញ្ជាក់អោយបានច្បាស់លាស់មុននិងចុចទៅលើតំណភ្ជាប់ (Link)។ នាយកដ្ឋានប្រឆាំងបទល្មើសបច្ចេកវិទ្យា បញ្ជាក់ទៅកាន់សាធារណជនគ្រប់រូបដែលបានប្រើប្រាស់បណ្តាញសង្គមនានា សូមកុំចុចតំណរភ្ជាប់ទាំងឡាយណាដែលគ្មានប្រភពច្បាស់លាស់ ចៀសវាងការកើតឡើងនូវហានិភ័យផ្សេងៗ។

តាមការសង្កេត បច្ចុប្បន្ននេះមនុស្សគ្រប់រូបតែងនិយមប្រើប្រាស់បណ្តាញសង្គមជាច្រើន ហើយក៏ជួយផ្តល់ប្រយោជន៍ជាច្រើនមកវិញដែរ។ ទន្ទឹមនេះ ក៏មានគុណវិបត្តិនានាចំពោះបណ្តាញសង្គម ដែលមនុស្សគ្រប់រូបគួរមានការយល់ដឹងខ្ពស់ និងប្រុងប្រយ័ត្នផងដែរ។ ជាក់ស្តែង ក្នុងអំឡុងពេលនេះ ក៏មានជនឆបោកមួយចំនួន ឆ្លៀតឱកាសនេះបោកប្រាស់មនុស្សតាមរយៈបណ្តាញសង្គម ដូចជាការចុចដំណភ្ជាប់ ឬ ចូលគណនីធនាគារ និងបោកប្រាស់ឱ្យផ្ញើលុយឱ្យពួកគេថែមទៀត។ ករណីនេះនៅតែមានប្រជាជនមួយចំនួនត្រូវបានជនឆបោក បោកប្រាស់លុយកាក់អស់ជាច្រើនតាមវិធីសាស្ត្រផ្សេងៗ ដូច្នេះ មុននឹងសម្រេចថាជឿអ្វីមួយត្រូវស្វែងយល់ឱ្យបានច្បាស់ និងស៊ើបដំណឹងនោះឱ្យបានត្រឹមត្រូវជាមុនសិន៕