កម្ពុជា​កំពុងគិតគូរវិនិយោគជាមួយជប៉ុន ធ្វើឱ្យកម្ពុជាស្អាត គ្មានសំណល់ប្លាស្ទិក

ដើម្បី​ធ្វើឱ្យ​កម្ពុជាស្អាត គ្មាន​សំណល់​ប្លាស្ទិក ដែល​ជា​យុទ្ធសាស្ត្រ​មួយ​អម​ជាមួយ​​យុទ្ធនាការ កាត់​បន្ថយការប្រើប្រាស់​ថង់​ប្លាស្ទិក​ ក្រសួង​បរិស្ថានបាន​នឹង​កំពុង​គិត​គូរ​បន្ថែម​ទៀត លើ​ការ​វិនិយោគ​ជា​មួយ​ជប៉ុន សំដៅ​ធ្វើ​ឱ្យ​កម្ពុជា​ស្អាត គ្មាន​សំណល់​ប្លា​ស្ទិក។

ក្នុង​ជំនួប​សម្ដែង​ការគួរសម និង​ពិភាក្សា​ការងារជាមួយ​​ប្រធាន​សមាគមជប៉ុន-កម្ពុជាកាលពីពេលថ្មីៗនេះ លោក អ៊ាង សុផល្លែត រដ្ឋ​មន្ត្រី​ក្រសួង​បរិស្ថាន​បាន​លើក​ឡើង​ថា ការ​វិនិយោគបៃតង គឺ​ជាការ​វិនិយោគ​ដែល​មានផល​ចំណេញទាំងសងខាង គឺភាគី​វិនិយោគ​ជប៉ុន​នឹងទទួលបាន​ប្រាក់ចំណេញក្នុង​ការវិនិយោគរបស់ខ្លួន ចំណែក​កម្ពុជា​វិញ​ក៏​ទទួលបាន​ផល​ចំណេញដល់បរិស្ថាន តាមរយៈ​កែច្នៃសម្ភារៈ​ប្រើប្រាស់ជំនួស​ថង់ប្លាស្ទិក ដោយ​ផលិតផល​ធម្មជាតិ​ដែល​មាន​ស្រាប់​ក្នុង​តំបន់ ហើយ​ការកែច្នៃធនធានដែលមានស្រាប់ក្នុងតំបន់នេះ នឹង​ជួយលើកស្ទួយជីវភាព​របស់ប្រជាជនកម្ពុជា​ឱ្យទទួលបានប្រាក់ចំណូលបន្ថែម ក្រៅពីចូលព្រៃបាញ់សត្វ និងកាប់ឈើ។

ការវិនិយោគដែលជួយឱ្យប្រជាសហគមន៍មានភាព​ជាម្ចាស់ឯករាជ្យក្នុងការរស់នៅ ដោយ​មិនពឹងផ្អែកតែលើរបរចូលព្រៃ ហើយ​បែរមកដាំដុះដំណាំហូបផ្លែរួមផ្សំបន្ថែម ការដាំស្តារព្រៃឈើ ថែរក្សា​ការពារសត្វព្រៃសម្រាប់ទេសចរទស្សនា និងផ្តល់សេវាកម្មទេសចរណ៍តាមរមណីយដ្ឋានសហគមន៍ទេសចរណ៍ ​គឺ​ជាឥរិយាបថវិជ្ជមាន និង​មាននិរន្តភាពក្នុងការបង្កើន​ប្រាក់ចំណូលដល់ប្រជាសហគមន៍ ហើយ​ក៏ជាវត្ថុបំណង​ដ៏ចម្បង​របស់​យុទ្ធសាស្រ្ត​ចក្រា​វិស័យ​បរិស្ថាន សម​ស្រប​តាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា។

លោករដ្ឋមន្ត្រីបានបន្ថែម​ថា ការវិនិយោគបៃតង ជាមួយដៃគូវិនិយោគ ដូច​ជា​ប្រទេសជប៉ុន និង​ប្រទេស​នានា​ដែល​ជាដៃគូវិនិយោគជាច្រើនទៀត គឺ​ជាការពង្រឹង​កិច្ចសហប្រតិបត្តិការទ្វេភាគី​រវាង​ប្រទេស និង​ការបើកឱកាសជូនដល់អ្នកវិនិយោគទាំងអស់ ដែល​មានបំណងជួយឱ្យកម្ពុជាស្អាត មិនមានសំណល់ប្លាស្ទិក ឆ្លើយតបនឹងការអនុវត្តវិធានប្រតិបត្តិ មាត្រា៦ នៃ​កិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះឆ្ពោះទៅ សម្រេចបានចក្ខុវិស័យកម្ពុជា ជា​ប្រទេសអព្យាក្រឹត​កាបូន​នៅ​​ឆ្នាំ​២០៥០៕