អនុប្រធានសមាគមសិល្បករខ្មែរ សរសើរទឹកចិត្តខ្មែរចេះសាមគ្គីគ្នា សង្គ្រោះកុមារម្នាក់មានជំងឺចម្លែក

អតីតតារាសម្តែងនិងជាអនុប្រធានសមាគមសិល្បករខ្មែរ នៅ សូនិតា ថ្មីៗនេះបានចេញមុខអំពាវនាវសប្បុរសជនចូលរួមជួយឧបត្ថម្ភជួយដល់កុមារ ( ក្មេងប្រុស)ម្នាក់ដែលមានជំងឺចម្លែកម្យ៉ាងគួរឱ្យអាណិតខ្លាំង ។

បន្ទាប់ពីមានការចែករំលែក និងអំពាវនាវពីសំណាក់អនុប្រធានសមាគមសិល្បករខ្មែរលោកស្រី នៅ សូនិតា សប្បុរសជនបានស្រាក់ដៃគ្នា ជួយឧបត្ថម្ភថវិកាជួយសង្គ្រោះជីវិតក្មេងប្រុសដ៏កម្សត់ម្នាក់នោះ។ ទង្វើនេះ ត្រូវបានអនុប្រធានសមាគមសិល្បករខ្មែរ ចាត់ទុកថាជាគំរូល្អ និងបានកោតសរសើរនូវទឹកចិត្តខ្មែរជួយខ្មែរ ខ្មែរស្រលាញ់ខ្មែរ។

ឆ្លើតតបការចូលរួមចំណែករបស់សប្បុរជន អនុប្រធានសមាគមសិល្បកររូបនេះ បានឱ្យដឹងថា មកដល់ពេលនេះហើយ គណនីធនាគាររបស់ខ្លួន ទទួលបានថវិកាមិនឈប់ ដែលនេះសបញ្ជាក់ពីទឹកចិត្តនិងតម្លៃនៃសាមគ្គីភាពក្នុងការចូលរួមចំណែកទុក្ខលំបាករបស់ប្រជាជនខ្មែរ ព្រោះគ្មានអ្នកណាជួយក្រៅពីខ្មែរគ្នាឯងឡើយ ។

លោកស្រី នៅ សូនិតា បានបញ្ជាក់ថា ខ្លួនបានជួបទូរស័ព្ទជាមួយយាយរបស់ក្មេងប្រុសនេះហើយ ដើម្បីចង់ដឹងអំពីស្ថានភាពជំងឺ និងភាពខ្វះខាតជាក់ស្តែងដែលគាត់កំពុងជួបប្រទះ។ លោកស្រី នៅ សូនីតា បានសន្យាពាំនាំសម្ភារ:មួយចំនួននិងថវិកាប្រគល់ជូនផ្ទាល់ដៃទៅជូនពួកគាត់ឆាប់ៗនេះ។

ដោយឡែកតាមការបញ្ជាក់របស់លោក ផន ផល្លា បានឱ្យដឹងដែរថា ដោយបានការចូលរួមជួយពីសប្បុរសជនពេលនេះក្មេងប្រុសរូបនោះ ត្រូវបានបញ្ជូនមកកាន់មន្ទីរពេទ្យគន្ធបុប្ផាក្រុងភ្នំពេញហើយមុននេះ៕ អត្ថបទ៖ ចាន់រ៉ា