វិបត្តិទេសចរណ៍ថៃ៖ ភ្ញៀវទេសចរអន្តរជាតិទៅថៃបន្តធ្លាក់ចុះកាន់តែខ្លាំង ​

ក្រសួងទេសចរណ៍ និងកីឡាថៃ បាន​ឱ្យដឹងនៅថ្ងៃអង្គារនេះថា ​ការមកដល់របស់ភ្ញៀវទេសចរបរទេសរបស់ប្រទេសថៃ ចន្លោះពីថ្ងៃទី ១ មករា ដល់ថ្ងៃទី ២៩ មិថុនា បាន​ធ្លាក់ចុះ ៤,៥៦ ភាគរយ ធៀប​នឹ​ងរយៈពេលដូចគ្នាកាលពីឆ្នាំមុន ខណៈធនាគារកណ្ដាលថៃទើបតែបន្ទាបការព្យាករភ្ញៀវសរុប​ប្រចាំឆ្នាំ។ នេះបើតាមការចុះផ្សាយរបស់កាសែតបាងកកប៉ុស្តិ៍។​

ក្នុងរយៈពេល ៦ ខែដែលបាន​បង្ហាញនោះ ថៃបាន​កត់ត្រាចំនួនភ្ញៀវទេសចរ ១៦,៦១ លាន​នាក់ ដោយ​ក្នុងនោះភ្ញៀវពីម៉ាឡេស៊ីនាំមុខគេក្នុងចំនួន ២,២៩ លាន​នាក់ ហើយបន្ទាប់មកចិន ២,២៥ លាន​នាក់។

កាលពីសប្ដាហ៍មុន ធនាគារកណ្ដាលថៃ​បាន​ទម្លាក់ការព្យាករនៃចំនួនភ្ញៀវអន្តរជាតិប្រចាំឆ្នាំមកត្រឹម ៣៥ លាននាក់ ពីប្រមាណ ៣៧,៥ លាននាក់ ដោយសារតែការធ្លាក់ចុះនៃចំនួនភ្ញៀវទេសចរចិន​ ដោយសារតែកង្វល់សុវត្ថិភាព រួមជាមួយ​បញ្ហា​ផ្សេងៗទៀត។

កាលពីឆ្នាំ ២០២៤ ថៃទទួល​ភ្ញៀវប្រមាណ ៣៥,៥៤ លាននាក់ ដែលបង្ហាញពីការស្ទុះងើបឡើងវិញនៃវិស័យនេះ ប៉ុន្តែនៅតែទាបជាកម្រិតជិត ៤០ លាននាក់ក្នុងឆ្នាំ ២០១៩ ពោលគឺមុនវិបត្តិកូវីដ១៩។

ការធ្លាក់ចុះនៃភ្ញៀវទេសចរអន្តរជាតិឥឡូវនេះ កំពុងដាក់សម្ពាធបន្ថែមលើសេដ្ឋកិច្ចថៃ ដែលរងនូវបញ្ហាផ្សេងៗរួចស្រាប់ទៅហើយ រួមទាំងកម្សោយផលិតកម្ម បំណុលគ្រួសារ និងភាពមិនប្រាកដប្រជា​សកល​។ អ្នកជំនាញបាន​ហៅ​ការធ្លាក់ចុះថាជា​ «វិបត្តិទេសចរណ៍​ថៃ​» ​ដែលរួមចំណែកដោយកត្តាផ្សេងៗ រួមទាំងកង្វល់សុវត្ថិភាព កំណើននៃការប្រកួតប្រជែងពីប្រទេសទិសដៅដទៃ បញ្ហាភូមិសាស្រ្តនយោបាយ និងភាពមិនប្រាកដប្រជានៃសេដ្ឋកិច្ចសកល ដែលប៉ះពាល់ដល់ការចំណាយរបស់ភ្ញៀវទេសចរ និងបច្ចុ​បន្នភាពនៃនយោបាយក្នុងស្រុកជាដើម៕

​