ព័ត៌មានជាតិ

លោក ត្រាំ ថា លោក ជាប្រធានសន្តិភាពនៃកម្ពុជានិងថៃ

បានផុស

១១ ខែ មុន

នៅ

ថ្ងៃចន្ទ ២៨ កក្កដា ២០២៥

ដោយ

វិមានប្រធានាធិបតីសហរដ្ឋអាមេរិក (White House) បានបង្ហោះសាររបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald J. Trump) ដោយបានអះអាងពីវត្តមានរបស់លោក ទើបធ្វើឲ្យកម្ពុជានិងថៃសម្រេចបាននូវកិច្ចព្រមព្រៀងបទឈប់បាញ់មួយដែលនឹងចូលជាធរមាននៅពាក់កណ្តាលយប់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារបង្ហោះនៅលើបណ្តាញសង្គម ប្រធានាធិបតី ដូណាល់ ត្រាំ បានសរសេរថា៖«[ខ្ញុំ] ទើបតែបាននិយាយជាមួយនាយករដ្ឋមន្រ្តីស្តីទីនៃប្រទេសថៃ និងនាយករដ្ឋមន្រ្តីកម្ពុជា ខ្ញុំរីករាយសូមប្រកាសថា បន្ទាប់ពីការចូលរួមពីប្រធានាធិបតី Donald J. Trump ប្រទេសទាំងពីរបានឈានដល់បទឈប់បាញ់ និងសន្តិភាព… ខ្ញុំពិតជាមានមោទនភាពដែលបានធ្វើជាប្រធានសន្តិភាព»។

ការប្រកាសរបស់លោកដូណាល់ ត្រាំ បន្ទាប់ពីនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត និង លោក Phumtham Wechayachai នាយករដ្ឋមន្ត្រីស្តីទីនៃព្រះរាជាណាចក្រថៃ បានជួបប្រជុំគ្នានៅប្រទេសម៉ាឡេស៊ី ក្រោយការសម្របសម្រួលរបស់លោក អាន់វ៉ា អ៊ីប្រាហ៊ីម ដែលជាប្រធានអាស៊ាន ដើម្បីស្វែងកដំំណោះស្រាយក្នុងជម្លោះប្រដាប់អាវុធដែលបានផ្ទុះឡើងកាលថ្ងៃទី២៤ខែកក្កដានេះ។

ក្រោយលទ្ធផលនៃការចរចានោះ ភាគីទាំងពីរ គឺកម្ពុជានិងថៃ បានឯកភាពគ្នាដូចខាងក្រោម៖

បទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង ២៤៖០០នាទី ថ្ងៃទី២៨ ខែកក្កដា ឆ្នាំ២០២៥។ នេះជាលក្ខខណ្ឌដែលនាយករដ្ឋមន្ត្រីកម្ពុជាចាត់ទុកថា ជាជំហានដ៏សំខាន់ ឆ្ពោះទៅការបន្ថយការតានតឹង នឹងការស្តារឡេីងវិញនៅសន្តិភាព និងសន្តិសុខ។
រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ (ភាគីថៃ យោធភូមិភាគទី1 និងទី2 និងភាគីកម្ពុជាយោធភូមិភាគទី4 និងទី5) នៅវេលាម៉ោង៧ព្រឹក ថ្ងៃទី២៩ ខែកក្កដា ឆ្នាំ២០២៥ និងបន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បេីមានការឯកភាពពីភាគីទាំងពីរ និង
រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ។

សម្តេចធិបតី ហ៊ុន ម៉ាណែន បានបង្ហោះសារលើបណ្តាញសង្គមថា៖«ខ្ញុំសូមអរគុណឯកឧត្តមនាយករដ្ឋមន្ត្រី Anwar Ibrahim ដែលបានផ្តួចផ្តើមគំនិតសម្របសម្រួលអោយមានកិច្ចប្រជុំ និងធ្វើជាម្ចាស់ផ្ទះ។ ខ្ញុំក៏សូមអរគុណឯកឧត្តមប្រធានាធិបតី Donald Trump ដែលបានផ្តល់ការគាំទ្រដល់ដំណើរការចរចាររកការឈប់បាញ់ភ្លាមដើម្បីកសាងសន្តិភាព តាមរយៈសហរដ្ឋអាមេរិកធ្វើជាសហអ្នករៀបចំនៃជំនួបថ្ងៃនេះ។ ខ្ញុំក៏សូមអរគុណដល់រដ្ឋាភិបាលចិនដែលតែងតែគាំទ្រលើកទឹកចិត្តអោយភាគីទាំងពីរស្វែងរកការឈប់បាញ់និងចូលរួមយ៉ាងសកម្មគាំទ្រដល់ជំនួបពិសេសនេះផងដែរ»៕

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា