ម៉េដវ៉េដេហ្វ ព្រមាន ត្រាំ ថា៖ «រុស្ស៊ី មិនមែនអ៊ីស្រាអែល ឬអ៊ីរ៉ង់ ទេ»

ក្រោយពេលប្រធានាធិបតីអាមេរិក ដូណាល់ ត្រាំ ដាក់ឱសានវាទឲ្យមេដឹកនាំវិមានក្រឹមឡាំង វ្ល៉ាឌីមៀរ ​ពូទីន បញ្ចប់សង្គ្រាមនៅអ៊ុយក្រែន យ៉ាងយូរ១២ថ្ងៃទៀតនោះ ស្រាប់តែអនុប្រធានក្រុមប្រឹក្សាសន្តិសុខរុស្ស៊ី ឌីមីទ្រី ម៉េដវ៉េដេហ្វ ចេញមុខព្រមានទៅលោកត្រាំថា «រុស្ស៊ីមិនមែនអ៊ីស្រាអែលឬអ៊ីរ៉ង់ទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បង្ហោះសារលើបណ្តាញសង្គម X កាលពីថ្ងៃចន្ទទី២៨ខែកក្កដាឆ្នាំ២០២៥ អតីតប្រធានាធិបតីរុស្ស៊ីរូបនេះ សរសេរថា «សូម លោកត្រាំ ចងចាំរឿងពីរ៖ ទីមួយគឺថា «រុស្ស៊ីមិនមែនជាអ៊ីស្រាអែលឬអ៊ីរ៉ង់ទេ។ ទីពីរ រាល់ឱសានវាទថ្មីៗគឺជាការគំរាមកំហែង និងជំហានឆ្ពោះទៅរកអរិភាពរវាងរុស្ស៊ី និងសហរដ្ឋអាមេរិក។ កុំដើរតាមផ្លូវ ចូ បៃដិន ឲ្យសោះ!»។

ទោះបីជាយ៉ាងណាក៏ដោយ ក្នុងន័យនោះ លោក ម៉េដវ៉េដេហ្វ មិនបញ្ជាក់លម្អិតឡើយ។

ដោយលើកឡើងពីកង្វះវឌ្ឍនភាព ទើបលោក ត្រាំ ហ៊ានដាក់ឱសានវាទឲ្យរុស្ស៊ី បញ្ឈប់សង្គ្រាមនៅអ៊ុយក្រែន យ៉ាងយូរត្រឹមថ្ងៃទី៩ខែសីហា ។

ទន្ទឹមនោះ លោកត្រាំក៏ព្រមានអំពីការដាក់ពន្ធធ្ងន់ធ្ងរនិងទណ្ឌកម្មថ្មី រួមទាំងការដាក់ទណ្ឌកម្មលើដៃគូពាណិជ្ជកម្មរបស់រុស្ស៊ីផងដែរ ប្រសិនបើការប្រយុទ្ធនៅតែបន្ត៕

អត្ថបទ៖ សុខ សុវណ្ណ

ចុចអាន៖ ត្រាំ​ ទុកពេលឲ្យ​ ​ពូទីន ១០ទៅ១២ថ្ងៃបញ្ចប់សង្គ្រាមជាមួយអ៊ុយក្រែន