ញ៉ែម សុគន្ធ យល់ថា កម្លាំងសាមគ្គីខ្មែរ ជាការការរួបរួមដ៏សំខាន់ជាមួយកងទ័ពកម្ពុជា ក្នុងកិច្ចការការពារដែនអធិបតេយ្យ

ទោះបីពេលនេះ កំពុងរស់នៅលើទឹកដីប្រទេសអូស្រ្តាលី តែតារាសម្តែងប្រុស ញ៉ែម សុគន្ធ នៅតែបង្ហាញឆន្ទៈរួបរួមជាមួយពលរដ្ឋខ្មែរដទៃទៀត ដើម្បីជាកម្លាំងចិត្តជូនវីរៈកងទ័ព ដែលកំពុងឈរជើងតាមបន្ទាត់ព្រំដែន ការពារដែនអធិបតេយ្យជូនជាតិ។

ជាក់ស្តែង លោក ញ៉ែម សុគន្ធ ថ្មីៗនេះ បានចូលរួមជាមួយពលរដ្ឋខ្មែរនៅអូស្រ្តាលីរាប់រយនាក់ ដោយបានប្រមូលផ្តុំគ្នាធ្វើបាតុកម្មសន្តិភាព ដើម្បីសុំឱ្យមានការដោះលែងវីរ:កងទ័ពខ្មែរទាំង ១៨នាក់ និងដើម្បីប្រើសំឡេងដ៏មានឥទ្ធិពលប្រកាសប្រាប់ទៅកាន់ពិភពលោក ពាក់ព័ន្ធជម្លោះឈ្លានពានរបស់ចោរសៀមមកលេីប្រទេសកម្ពុជា។

តារាសម្តែងលោកញ៉ែមសុគន្ធបានលើកឡើងជាឆន្ទ: ថា “បេះដូងខ្មែរ ខ្មែររួបរួម ខ្មែរសាមគ្គី ខ្មែរតែមួយ ខ្មែរទាំងក្នុងស្រុកនិងក្រៅប្រទេស រួមសាមគ្គីគ្នា ព្រោះមានឈាមជ័រខ្មែរតែមួយការពារដែនអធិបតេយ្យ ដើម្បីជាកំលាំងចិត្តដ៏មហិមារជូនវីរៈកងទ័ពនិងរាជរដ្ឋាភិបាលថ្នាក់ដឹកនាំ ខ្មែរសាមគ្គីខ្មែរខ្លាំងក្តីស្រលាញ់ និងកំលាំងចិត្តពីមហាគ្រួសារខ្មែរ នៅអាត់ឡែតប្រទេសអូស្ត្រាលី “។

សូមជម្រាបថា កាលពីថ្ងៃទី១៧ ខែសីហានេះ ពលរដ្ឋខ្មែរជាច្រើនបានជួបជុំគ្នា នៅមុខអគារដ្ឋសភាអូស្រ្តាលី រដ្ឋខាងត្បូងទីក្រុង Adelaide ដើម្បីធ្វើបាតុកម្មសន្តិភាព សុំឱ្យដោះលែងទាហានទាំង១៨នាក់ និងបញ្ឈប់ការបន្ថែមវិវាទមកលើប្រទេសកម្ពុជា ខណៈក្នុងនោះក៏មានតារាកំប្លែងអ្នកនាង គ្រត បង្ហាញវត្តមានចូលរួមផងដែរ។

នៅក្នុងការជួបជុំខាងលើនេះ ក៏មានការស្នើសុំផងដែរដល់លោក ដូណាល់ ត្រាំ ប្រធានាធិបតីរបស់សហរដ្ឋអាមេរិកក្នុងការបន្តជួយអន្តរាគមន៍ជួយដល់ប្រទេសកម្ពុជា ពីការឈ្លានពានរបស់ទាហានសៀមមកលើប្រទេសកម្ពុជា ពិសេសគឺសុំឱ្យដោះលែងវីរ:កងទ័ពកម្ពុជាទាំង ១៨នាក់ មកវិញ៕ ចាន់រ៉ា