Oxford ផ្អាកការធ្វើតេស្តវ៉ាក់សាំង AstraZeneca លើកុមារ ដោយសារក្តីបារម្ភអំពីបញ្ហាកំណកឈាម

អ្នកនាំពាក្យនៃសាកលវិទ្យាល័យ Oxford បានប្រាប់ CNN កាលពីថ្ងៃអង្គារថា ការសាកល្បងវ៉ាក់សាំង Oxford-AstraZeneca លើកុមារ ត្រូវបានផ្អាកដោយរង់ចាំការពិនិត្យឡើងវិញដោយនិយតករថ្នាំចក្រភពអង់គ្លេស លើករណីកំណកឈាមចំពោះមនុស្សពេញវ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរូបនេះបាននិយាយថា ការធ្វើតេស្តលើកុមារមិនបានបង្កឲ្យមានការព្រួយបារម្ភអំពីសុវត្ថិភាពនោះទេ ប៉ុន្តែវានឹងត្រូវផ្អាកខណៈទីភ្នាក់ងារត្រួតពិនិត្យថ្នាំនិងផលិតផលសុខភាពចក្រភពអង់គ្លេសឬ MHRA កំពុងពិនិត្យលើករណីកម្ររបស់មនុស្សដែលទទួលរងការកកឈាមនិងមានកម្រិតប្លាកែតឈាមទាប។

អ្នកនាំពាក្យបាននិយាយថា “ឪពុកម្តាយនិងកូនៗ គួរតែបន្តចូលរួមរាល់ដំណើរការដែលបានគ្រោងទុក ហើយអាចទាក់ទងកន្លែងធ្វើតេស្តប្រសិនបើពួកគេមានសំណួរ”។

កាលពីសប្តាហ៍មុន និយតករថ្នាំបាននិយាយថា មនុស្សយ៉ាងតិច៣០នាក់នៅក្នុងប្រទេស បានជួបប្រទះនឹងប្រភេទនៃការកកឈាមដ៏កម្រ បន្ទាប់ពីចាក់វ៉ាក់សាំងរួចប៉ុន្តែបានព្រមានថា វាឆាប់ពេកក្នុងការដឹងថា តើការចាក់វ៉ាក់សាំងនេះបង្កឲ្យមានកំណកឈាមពិតឬក៏យ៉ាងណា។

ប្រធាន MHRA លោកស្រីវេជ្ជបណ្ឌិត June Raine បានប្រាប់ទូរទស្សន៍ CNN កាលពីថ្ងៃអង្គារថា “MHRA បានដឹងអំពីការសម្រេចចិត្តរបស់សកលវិទ្យាល័យ Oxford ក្នុងការផ្អាកចាក់វ៉ាក់សាំងនៅក្នុងការធ្វើតេស្ត ខណៈការត្រួតពិនិត្យសុវត្ថិភាពរបស់ MHRA កំពុងបន្ត”។

លោកស្រីបានបន្ថែមថា “សុវត្ថិភាពរបស់អ្នកចូលរួមក្នុងការធ្វើតេស្ត គឺជាអាទិភាពកំពូលរបស់យើង ហើយគ្មានការព្រួយបារម្ភអំពីសុវត្ថិភាពណាមួយត្រូវបានរាយការណ៍នោះទេ”។

គួរបញ្ជាក់ថា វ៉ាក់សាំង AstraZeneca នេះគឺជាវ៉ាក់សាំងរបស់សកលវិទ្យាល័យ Oxford នៃប្រទេសអង់គ្លេស មិនមែនជាវ៉ាក់សាំង AstraZeneca របស់ឥណ្ឌា ដែលប្រទេសកម្ពុជាយើងបានចាប់ផ្តើមយុទ្ធនាការចាក់នោះទេ៕

ប្រែសម្រួលដោយ៖ Vann Vann

ប្រភព៖ CNN

ចុចអាន៖ វ៉ាក់សាំង AstraZeneca មានប្រសិទ្ធភាពការពារកូវីដ ៧៩ ភាគរយក្នុងការសាកល្បងនៅអាមេរិក