តម្លៃប្រេងអន្តរជាតិធ្លាក់ចុះជាង៣% ម្សិលមិញ ហើយបន្តធ្លាក់ទៀត​ព្រឹក​នេះ

តម្លៃប្រេងអន្តរជាតិ​បាន​ធ្លាក់ចុះជាង ៣ ភាគរយ ពេលបិទការជួញដូរកាលពីថ្ងៃចន្ទ ហើយបន្តធ្លាក់ចុះបន្ថែមទៀត​នៅព្រឹកថ្ងៃអង្គារ​នេះ ដោយសារតែក្ដីរំពឹង​ពីកំណើន​នៃការផ្គត់ផ្គង់ចេញពីមជ្ឈិមបូព៌ា និង​ផលិតកម្មរបស់អង្គការ​នៃប្រទេសនាំចេញប្រេងកាត និងសម្ព័ន្ធមិត្ត (OPEC+)។

តម្លៃប្រេងឆៅ​សម្រាប់កុងត្រាខែវិច្ឆិកា​​ ម៉ាក​ Brent ​បានធ្លាក់ចុះ ៤៧ សេន ឬ ០,៦៩ ភាគរយ មកត្រឹម ៦៧,៥០ ដុល្លារ/បារ៉ែល គិតត្រឹមម៉ោង ៨ ព្រឹក នៅទីក្រុងហុងកុង។ ​តម្លៃប្រេងឆៅ​អាមេរិក ម៉ាក​ West Texas Intermediate (WTI) ធ្លាក់ចុះ ៤០ សេន ឬ ០,៦៣ ភាគរយ ដោយ​ជួញដូរ​នៅតម្លៃ ៦៣,០៥ ដុល្លារ/បារ៉ែល។ ​

តម្លៃប្រេងទាំង២ បាន​ធ្លាក់ចុះជាង​ ៣ ភាគរយ កាលពីថ្ងៃចន្ទ ដែល​ជាការធ្លាក់ចុះខ្លាំងបំផុត រាប់តាំងពីដើមខែសីហា។

ការធ្លាក់ចុះតម្លៃប្រេងជាប់ៗគ្នាបែបនេះ កើតឡើងនៅពេលដែល​អ៊ីរ៉ាក់បើកការនាំចេញប្រេងពីតំបន់កួដទៅកាន់អន្តរជាតិ​តាមច្រកតួកគីឡើងវិញក្រោយបិទផ្អាក ២ ឆ្នាំកន្លះ ខណៈមាន​សេចក្ដីរាយការណ៍ថា OPEC+ គ្រោង​ពិភាក្សាគ្នាស្ដីពីការបង្កើតផលិតកម្មប្រេងនៅខែវិច្ឆិកា ក្នុងជំនួបនៅចុងសប្ដាហ៍នេះ។

អ្នកជំនាញលើកឡើងថា ព័ត៌មាន​ទាំងអស់នេះ បង្កឱ្យ​មាន​ការរំពឹងទុកពីកំណើននៃផ្គត់ផ្គង់ប្រេង ចំពេលដែល​តម្រូវការសកលមិនសូវរឹងមាំខ្លាំង​ ជាហេតុធ្វើឱ្យតម្លៃប្រេងធ្លាក់ចុះ។ យ៉ាងណាមិញ វិនិយោគិន​ក៏បន្តឃ្លាំមើលពីហានិភ័យនៃការផ្គត់ផ្គង់ ពាក់ព័ន្ធនឹង​ជម្លោះអ៊ុយក្រែន-រុស្ស៊ីផងដែរ៕